Senyales na masuwerte dahil makikinabang sa magandang kapalaran na pinaghirapan ng iba

ni Seigusmundo Del Mundo - @Panaginip, salamin ng inyong buhay | January 8, 2021

Salaminin natin ang panaginip ni Alfred na ipinadala sa Facebook Messenger.

Dear Professor,

Gusto kong malaman kung ano ang ibig sabihin ng panaginip ko. Ganito kasi ‘yun, ‘yung itlog ng manok ay nililimliman, tapos nagulat ako dahil ‘yung mga itlog ay nakabitin na marami at magkakadikit. Nang wala na ‘yung inahin, tinuklap ng apo ko ‘yung balat, kaya lumabas ‘yung sisiw. Natuwa ako at ‘yung mga sisiw ay malalaki na, tapos mayroong kakaunti ang mga balahibo at mayroon namang puti na ang mga balahibo. Ano ang kahulugan ng panaginip kong ito?

Naghihintay,

Alfred

Sa iyo, Alfred,

Maraming pinanggagalingan ang mga suwerte sa buhay.

Ang una ay dahil sa sikap. Ito ang mga taong nagsikap nang nagsikap hanggang sa matupad ang kanilang mga pangarap at nang makita ng lahat na siya ay maunlad na, ang sabi ng mga nakakikilala sa kanya, “Ang taong ito ay sinuwerte sa buhay.”

May mga nagsunog ng kilay o buhok matapos lang sa pag-aaral at nang umasenso dahil sa natapos na larangan, ang sabi ng mga tao sa kanya, “Ang suwerte naman niya!”

Ganito rin ang naranasan ng mga nagtipid na halos hindi na kumain para lang makaipon at nang makaipon na, ang sabi sa kanya ng mga tao, “Ang suwerte naman niya!”

Mayroon ding ang magulang ay nangutang nang ngautang para maitaguyod ang kanyang pamilya at nang lumaon ay yumaman na nga, ang sabi ng kanyang mga kapitbahay, “Siya ay suwerte!”

Pero suwerte nga ba sila o kaya lang sila nagsiyaman ay dahil sa mga pinagdaanang hirap, pawis, dugo at buwis-buhay na pagpupunyagi? Kumbaga, hindi basta-basta o agad-agad na nagsiganda ang buhay nila, kaya hindi rin agad masasabi na siya ay suwerte o sinuwerte.

Kung ganu’n, sino ang tunay na masusuwerteng nilalang? Sino pa nga ba kundi ang nakaranas ng “Iba ang nagbayo at iba ang kumain!” Nage-gets mo ba? Nakatutuwa, hindi ba? Dahil sa ehemplong binanggit sa itaas, may mga nagpakahirap pero iba ang umani ng kanilang pinaghirapan.

At ibinabalita ng iyong panaginip na ikaw ay isa sa makakakain sa mga butil ng palay na pinaghirapang gawing bigas ng ibang tao. Kaya ayon sa panaginip mo, isa ka rin sa aani ng magandang kapalaran nang dahil sa paghihirap ng iyong kapwa. Kaya naman, ikaw, Alfred ang tunay na masuwerte.

Hanggang sa muli,

Professor Seigusmundo del Mundo

Kabaong, pahiwatig na ilibing ang pangit na karanasan at kaugalian

ni Seigusmundo Del Mundo - @Panaginip, salamin ng inyong buhay | January 7, 2021

Salaminin natin ang panaginip ni Lannie na ipinadala sa Facebook Messenger.

Dear Professor,

Nanaginip ako na may nagyaya sa akin na lalaking hindi ko kilala. Binigyan niya ako ng P500, tapos bibili ako ng damit para may masuot akong pang-alis, tapos ibinili niya ako ng tatlong blouse at pinasakay sa kabaong. Sabi ko, “Bakit kabaong? Ayaw ko rito.”

Ano ang kahulugan ng panaginip kong ito? Natatakot ako sa kabaong.

Naghihintay,

Lannie

Sa iyo, Lannie,

Nakakatakot talaga ang kabaong. Ang totoo nga, sa panaginip, hindi gaanong nakakatakot mapanaginipan ang patay o kaluluwa, pero kapag kabaong na ang napanaginipan, agad kang makadarama ng takot.

Hindi ba, sa kabaong nakalagay ang patay na ililibing? Kaya ang kabaong ay nagpapahiwatig ng kamatayan, pero sa panaginip, ang kamatayan ay hindi aktuwal na pagkawala ng buhay o talagang patay o namatay na.

Dahil ang kabaong sa panaginip ay nagsasabing ang mga dapat patayin ay ang mga ugali mong pangit o ang mga ito ay kailangan mo nang ilibing sa limot. Ang “limot” ay hindi simpleng paglimot kundi ililibing nang tuluyan o buburahin mo na sa iyong alaala at pagkatapos ay mabubuhay ka nang payapa, tahimik at may panatag at matiwasay na kalooban.

Minsan, iha, bilang pagtatapat sa iyo, sa panaginip, ang kabaong ay nagsasabi rin na ang ililibing o ibabaon sa limot ay ang mga karanasan mo na pagkapangit-pangit, masasaklap at mga pahirap sa kalooban. Gayundin, kabilang sa mga ito ang kabiguan.

Hindi kasi puwedeng magpatuloy ang tao na nasa kanya ang masasaklap na alaala ng lumipas at ang masasakit na kabiguan sa nakaraan dahil kapag dala-dala ang mga ito, hindi siya liligaya at magkakaroon ng kaganapan o ‘yung sinasabi ng marami na “move on!”

Dahil paano ka nga ba makaka-move-on kung patuloy mong niyayakap ang lungkot? Tunay ngang malabong maka-abante sa buhay ang taong pasan-pasan pa rin ang kanyang kabiguan sa nakaraan, kumbaga, ang pagsulong ay makakamit lamang kung ang tao ay malaya at maginhawang lalakad sa bagong landas ng buhay na kanyang tatahakin.

Napansin mo ba ang sinabi ko na “bago” sa bagong landas ng buhay? Ito mismo ang postibong kahulugan ng kabaong kung saan para mas malinaw, ito ay nagsasabing ang kabaong ay nagbabalita ng darating na bagong buhay. Ito ay makakamit lamang kapag ganap mong nalimot ang mga pangit na karanasan, ganundin sa sandaling naibaon mo na sa limot at tuluyang binura ang mga pangit mong katangian, kahinaan at bulok na nakaugalian.

Hanggang sa muli,

Professor Seigusmundo del Mundo

Permanenteng trabaho at relasyon, darating sa 2023 kung aayusin ang pirma

ni Maestro Honorio Ong - @Kapalaran ayon sa Numero| January 7, 2021

Dear Maestro,

Naisipan kong sumangguni sa inyo dahil nagtataka ako, kasi hanggang ngayon ay hindi pa rin ako nakakatagpo ng permanenteng trabaho at girlfriend, gayundin, puro panandalian lang ang relasyong nararanasan ko. Gusto kong malaman kung kailan ako magkakaroon ng magandang trabaho at magkaka-girlfriend ng seryoso at pangmatagalan? At panghuli, pakianalisa na ang aking lagda— kung okey o may dapat pa akong baguhin upang gumanda at magbago rin ang kapalaran ko?

Sa edad kong 28, gusto ko nang magka-girlfriend, makapag-asawa at magkaroon ng maunlad at masayang pamilya, mangyayari ba ito, kung oo, sa paanong paraan? June 5, 1992 ang birthday ko.

Umaasa,

Edwin ng Panilao, Pilar, Bataan

Dear Edwin,

Ayon sa zodiac sign mong Gemini at birth date na 5 sa destiny number na nagkataong 5 rin (6+5+1992=2003/ 20+03=23/ 2+3=5), para makatagpo ka ng permanenteng trabaho, ang dapat mong hanaping kumpanya, opisina o kahit factory na ang nature ng kanilang negosyo ay may kaugnayan sa sa komunikasyon, mass media, social media, internet at travel, dahil dito ka susuwertehin at may naghihitantay sa iyong magandang kapalaran.

Bukod sa nasabing mga kumpanya na may kaugnayan sa modernong komunikasyon at paglalakbay, puwede ka ring sumubok mag-abroad dahil sa pangingibang-bansa o pagnenegosyo, kapag may sapat kang puhunan, sigurado at tiyak kang yayaman.

Hinggil naman sa paghahanap ng permanente at pangmatagalang karelasyon, ayon pa rin sa zodiac sign mong Gemini at birth date na 5, “Mercurian type of personality” na babae ang dapat mong ligawan at maging kasintahan upang makaranas ka ng masaya at pangmatagalang karelasyon.

Ang mga babaeng nagtataglay ng “Mercurian type of personality” ay silang mga babaeng medyo maliit o mababa ang height, cute at pang-pocket size ang dating, bilugan hanggang sa korteng puso at pa-square ang hugis ng mukha, gayundin ang hugis ng buhok ay pa-square. Habang maliit na payat ang sulat kamay, na mabilis niyang isinusulat. Dagdag pa rito, mabilis din siyang magsalita, kumilos, laging aligaga at mabilis ding lumakad.

Ang ganyang uri ng babae ang ka-compatible mo, na tiyak ang magaganap kung saan sa sandaling siya ang naging girlfriend mo at tuluyang napangasawa, magiging maligaya ang itatayo n’yong pamilya at panghabambuhay mo na rin siyang makakasama.

Habang hinggil naman sa iyong lagda, okey at maganda na ‘yan. Ang dapat na lang gawin ay bahagyang inobasyon kung saan imbes na maikli ang krokes sa ibabaw ng letrang “t” sa iyong apilido, habaan mo ito nang mahabang-mahaba, at mas maigi ring tapusin ito sa isang straight line.

Sa ganyang paraan, kapag mahabang-mahaba na ang korkes ng letrang “t” sa iyong pirma at tinapos mo sa straight line, tuluy-tuloy mo nang makakamit ang lahat ng ambisyon at pangarap mo sa buhay.

Ayon sa Decadens ng Kapalaran, habang patuloy kang naghahanap ng trabaho at babaeng inilarawan sa itaas, tiyak ang magaganap sa 2023 hanggang 2024. Isa-isa nang matutupad ang mga pangarap mo sa buhay – isang matatag na trabaho at kasabay nito, magkakaroon ka na rin ng girlfriend kung saan ang nasabing babae na may zodiac sign na Aquarius ang siya mo na ring mapapangasawa at makakasama sa pagbuo ng simple pero maunlad at maligayang pamilya habambuhay.