Public transportation, tuloy para sa vaccination

ni Ronalyn Seminiano Reonico | August 01, 2021

Tuloy pa rin ang operasyon ng pampublikong transportasyon sa kabila ng pagpapatupad ng enhanced community quarantine (ECQ) sa Metro Manila para sa vaccination program ng pamahalaan, ayon kay National Task Force against COVID-19 Spokesperson Restituto Padilla, Jr..

Sa isang panayam, saad ni Padilla, "Hindi na hihigpitan siguro nang lubos ang transportation sector dahil sa isang anunsiyo na inilabas ni (Presidential Spokesperson) Secretary (Harry) Roque kamakailan, 'yung pagpapatuloy ng vaccination.

“Maski tayo ay naghihigpit sa ECQ, increased ramp up ang pagbabakuna ng mga kababayan.” Samantala, wala pang inilalabas na guidelines ang Palasyo para sa transportation sector kapag tuluyan nang isinailalim ang Metro Manila sa dalawang linggong ECQ na magsisimula sa Agosto 6 hanggang 20.

Budget Chief Avisado, nagpositibo sa COVID-19

ni Ronalyn Seminiano Reonico | August 01, 2021

Nagpositibo sa COVID-19 si Budget Secretary Wendel Avisado kung kaya’t naka-medical leave ang opisyal, ayon sa Department of Budget and Management (DBM) noong Sabado nang gabi.

Saad ng DBM, simula sa Lunes, Agosto 2 hanggang sa Biyernes, Agosto 13 ay sasailalim si Avisado sa mga pagsusuri, ayon na rin sa advise ng kanyang doktor.

Ayon sa DBM, kamakailan lamang ay naospital si Avisado sa loob ng walong araw at sumailalim sa quarantine sa loob nang mahigit isang buwan dahil din sa COVID-19.

Samantala, si DBM Undersecretary Tina Rose Marie Canda ang pansamantalang tatayo bilang officer-in-charge habang naka-medical leave si Avisado.

Saad pa ng ahensiya, “Rest assured that the DBM remains steadfast and committed to its mandate of promoting the efficient and effective management of the national budget to support its budget priorities, especially in the midst of the pandemic.”

Mahigpit na border control sa NCR Plus, sinimulan na

ni Ronalyn Seminiano Reonico | August 01, 2021

Nagsimula nang magsagawa ng mahigpit na border control sa NCR Plus ang Joint Task Force (JTF) simula kagabi kaugnay ng banta ng COVID-19 Delta variant. Inatasan ni Department of the Interior and Local Government (DILG) Secretary Eduardo M.

Año si JTF COVID Shield Commander PLt. Gen. Israel Dickson na magsagawa ng quarantine control points sa borders ng NCR Plus sa Cavite, Bulacan, Laguna at Rizal.

Ayon sa DILG, ito ay upang masiguro na ang mga Authorized Persons Outside of Residence (APORs) lamang ang makakapagbiyahe papasok at palabas ng NCR Plus.

Ayon kay Año, kailangang magpakita ng mga sumusunod sa Philippine National Police (PNP) upang mapayagang makapasok at makalabas ng NCR Plus: “IATF IDs issued by regulatory agencies; and “Valid IDs or pertinent documentation issued by establishments allowed to operate under the current quarantine classification.”

Samantala, ang mga unauthorized persons outside of residence (UPOR) ay hindi papayagang makadaan at pauuwiin lamang ng awtoridad. Saad pa ni Año, “The implementation of strict border controls in the NCR+ areas is critical to stopping the spread of the Delta variant.”

Ipinaalala rin ni Año sa mga pulis ang free movement para sa mga cargo o delivery vehicles lalo na ang mga magdadala ng pagkain sa mga quarantine control points.

Samantala, ang Metro Manila ay isasailalim sa enhanced community quarantine classification simula sa Agosto 6 hanggang 20 dahil sa banta ng COVID-19 Delta variant.