Pagpasok sa Pampanga at Bulacan, sinimulan nang higpitan

ni Ronalyn Seminiano Reonico | August 2, 2021

Nagsimula nang magpatupad ng mahigpit na border control sa ilang probinsiya sa Luzon katulad ng Pampanga at Bulacan. Isinailalim sa general community quarantine (GCQ) "with heightened restrictions" ang NCR hanggang sa Agosto 5.

Ipatutupad naman ang enhanced community quarantine (ECQ) sa rehiyon sa Agosto 6 hanggang 20. Sa Malolos, Bulacan, mahigpit na sinusuri ng mga awtoridad ang mga dokumento ng mga motorista sa mga checkpoints.

Sa Pampanga naman, simula ngayong araw, Agosto 2 hanggang sa 15, kailangang magpakita ng negative RT-PCR o antigen test result upang makapasok sa naturang lugar ang mga non-residents.

Mahigpit ding binabantayan ang mga borders at mga barangay sa Pampanga dahil sa banta ng COVID-19 Delta variant. Samantala, umabot na sa 1,597,689 ang kabuuang bilang ng kaso ng COVID-19 sa bansa matapos maitala ang karagdagang 8,735 bagong kaso noong Linggo.

Sa naturang bilang, 63,646 ang aktibong kaso habang 1,506,027 naman ang mga gumaling na at 28,016 ang mga pumanaw.

6 patay sa wildfire sa Turkey

ni Ronalyn Seminiano Reonico | August 2, 2021

Patay ang anim na katao at inilikas naman ang mga residente mula sa dose-dosenang villages sa southern Turkey matapos manalasa ang wildfire.

Ayon sa mga eksperto, lumalawak ang mga naaapektuhang lugar dahil sa malakas na hangin. Maging ang mga residente sa tourist city na Bodrum ay inilikas din dahil nadamay na rin ang naturang lugar sa wildfire na nararanasan sa kalapit na distrito nito na Milas dahil sa malakas na hangin.

Mahigit 540 residente na rin ang inilikas gamit ang mga bangka dahil hindi na madadaanan ang mga kalsada. Ayon sa datos ng EU, nakaranas na ang Turkey ng 133 wildfires ngayong 2021.

Pumapalo rin sa 49.1 degrees Celsius (120.3 Fahrenheit) ang temperatura sa southeastern town ng Cizre. Samantala, nagbabala rin ang mga awtoridad sa posibleng pananatili ng mataas na temperatura sa ilang lugar sa bansa.

First alarm, itinaas sa Marikina River

ni Ronalyn Seminiano Reonico | August 2, 2021

Itinaas sa First Alarm ang Marikina River matapos umabot sa 15.7 meters mark ang lebel ng tubig ngayong Lunes nang umaga, ayon sa Marikina Public Information Office.

Binuksan din ang lahat ng gate ng Manggahan Floodway dahil sa biglaang pagtaas ng lebel ng tubig. Bandang 6:29 AM, umakyat pa sa 15.8 meters ang lebel ng tubig kaya patuloy na nakaantabay ang Marikina rescuers at mino-monitor ito.

Kapag umabot pa sa 16 metro ang tubig, ito ay nangangahulugang kailangan nang maghanda ng mga residente para sa posibleng evacuation dahil sa ganoong estado ay itataas na ang Second Alarm.

Samantala, ayon sa PAGASA, patuloy pa ring magdudulot ng kalat-kalat na pag-ulan sa Ilocos Region, Cordillera Administrative Region, Cagayan Valley, Zambales, at Bataan ang Southwest Monsoon o Habagat. Makararanas din umano ng maulap na panahon at isolated rain showers ang Metro Manila.