Walang trabaho, umabot na sa 3.76 milyon

ni Ronalyn Seminiano Reonico | August 3, 2021

Bahagyang tumaas ang bilang ng mga Pinoy na walang hanapbuhay noong Hunyo na umabot sa 3.76 million kumpara sa 3.73 million noong Mayo, ayon sa tala ng Philippine Statistics Authority (PSA).

Nananatili naman sa 7.7% ang unemployment rate sa bansa, ayon sa PSA. Samantala, inaasahan na tataas pa ang bilang ng mga walang hanapbuhay ngayong buwan dahil sa ipatutupad na enhanced community quarantine (ECQ) sa Metro Manila.

Simula noong July 31 hanggang sa Agosto 5 ay isinailalim ang Metro Manila sa general community quarantine (GCQ) “with heightened restrictions” at simula naman sa August 6 hanggang sa 20 ay ipapatupad na ang enhanced community quarantine (ECQ) sa rehiyon.

Pasaway sa ECQ, aarestuhin

ni Ronalyn Seminiano Reonico | August 3, 2021

Papairalin ang mas mahigpit na enhanced community quarantine (ECQ) sa Metro Manila simula sa Agosto 6 kumpara sa dating ipinatupad na ECQ restriction, ayon kay Interior and Local Government Secretary Eduardo Año.

Aniya sa isang panayam, huhulihin na rin ang sinumang lalabag sa ipinatutupad na minimum public health standards at magpapakalat din ng mga pulis sa mga mataong lugar. Aniya, “Mas mahigpit tayo ngayong ECQ na 'to.

Ang tawag nga natin hard lockdown… Kung may makikita riyan [na violator], talagang aarestuhin ng ating mga pulis.”

Nilinaw naman ni Año na babalaan muna ang mga violators ngunit kapag hindi pa rin sila sumunod sa awtoridad ay saka sila aarestuhin. Depende rin umano ang magiging penalty base sa ipinatutupad na ordinansa ng nakasasakop na local government unit sa mga violators.

Samantala, inatasan na rin ni Philippine National Police Chief General Guillermo Eleazar ang National Capital Region Police Office (NCRPO) na maging istrikto sa pagpapatupad ng mas mahabang curfew hours sa rehiyon na magsisimula nang alas-8:00 ng gabi hanggang alas-4:00 ng umaga.

Aniya pa, “The strict border control and the longer curfew hours are but some of the necessary interventions to prevent the spread of the Delta variant of COVID-19.”

Bakuna sa mga seniors, pahirapan

ni Ronalyn Seminiano Reonico | August 3, 2021

Pahirapan ang pagbabakuna sa mga senior citizens dahil umano sa "hesitancy", ayon kay Secretary Carlito Galvez, Jr.. Ani Galvez sa weekly Cabinet meeting, "Mr. President, ang talagang medyo challenge natin, sa mga senior citizens.

Nakita natin na hindi umaangat ang first dose natin... dahil sa some sort of hesitancy sa ating mga A2."

Ayon sa datos ng pamahalaan, nasa 2,616,273 pa lamang ang mga fully vaccinated nang mga senior citizens at sa kabuuang bilang ay umabot na sa 9,115,963 ang mga Pinoy na nakakumpleto na ng bakuna habang 11,747,581 naman ang nakatanggap na ng first dose.

Samantala, ayon kay Galvez, sa kabila ng pag-aalangan, plano pa rin ng pamahalaan na maipamahagi ang 5 million doses ng bakuna sa mga senior citizens.