Bagyong Huaning, pumasok na sa PAR

ni Ronalyn Seminiano Reonico | August 7, 2021

Pumasok na sa Philippine area of responsibility (PAR) ang namataang tropical storm sa north northwest ng Itbayat, Batanes ngayong Sabado, alas-5:00 nang umaga, at pinangalanan itong Huaning, ayon sa PAGASA.

Kaninang 11:00 AM, naglabas ng tropical cyclone bulletins ang PAGASA para sa TS Huaning na may international name na Lupit.

Samantala, bandang alas-3 nang umaga, nang wala pa sa loob ng PAR ang TS Lupit, mabagal ang pagkilos nito at taglay ang lakas ng hangin na umaabot sa 65 kph mula sa sentro nito at pagbugsong umaabot sa 80 kph.

Show cause order ng DILG vs. Mayor Isko, binawi

ni Ronalyn Seminiano Reonico | August 6, 2021

Umapela si Manila Mayor Isko Moreno sa inihaing show cause order ng Department of the Interior and Local Government (DILG) laban sa kanya dahil nabigo umano ang lokal na pamahalaan sa laban kontra droga batay sa kanilang pagsusuri sa 2018 Anti-Drug Abuse Council performance audit, gayung naging alkalde lang ng Manila si Mayor Isko noong taong 2019.

Kaagad na nag-post si Mayor Isko sa kanyang Facebook page ng screenshot ng isang pahayagan kaugnay ng naturang isyu at aniya, “Wow, galing, ha! Sunud-sunod na! #AlamNaThis.”

Binawi naman ni Secretary Eduardo Año ang naturang show cause order at ayon sa kanya, para ito sa dating alkalde ng Manila.

Saad pa ni Año, "That show cause order was intended for the past mayor since the performance audit was for year 2018 while Mayor Isko assumed only in June 2019.

"The show cause order has been recalled and Mayor Isko does not have to answer it.”

Libu-libong pulis, ikinalat na para sa ECQ sa NCR

ni Ronalyn Seminiano Reonico | August 6, 2021

Nag-deploy na ng libu-libong kapulisan ang Philippine National Police (PNP) para masiguro na nasusunod ang ipinatutupad na health and safety protocols sa ilalim ng enhanced community quarantine (ECQ) sa Metro Manila at bantay-sarado na ang 89 Quarantine Control Points (QCPs) sa rehiyon, sa tulong ng Inter-Agency Task Force for the Management of Emerging Infectious Diseases (IATF-MEID) ngayong Agosto 6.

Hanggang sa Agosto 20 isasailalim ang NCR sa ECQ.

Nasa 4,346 iba pang PNP personnel naman ang inatasan para sa Mobile Control Points sa iba’t ibang lugar sa Metro Manila para sa uniformed curfew hours.

Nanawagan naman si PNP Chief Guillermo Eleazar sa publiko lalo na sa mga residente ng NCR Plus na makiisa sa ipinatutupad na paghihigpit sa mga borders dahil sa banta ng COVID-19 Delta variant.

Aniya pa, “Nauunawaan namin ang sinasabing quarantine burnout na nararamdaman ng ating mga kababayan subalit maling-mali ang pananaw na walang epekto ang mga paghihigpit na ito dahil ang mga public experts na mismo ang nagrekomenda nito at kami mismo sa PNP ay napatunayan namin kung gaano kaepektibo ito upang maiwasan ang pagkalat ng virus.

“This security personnel are under strict instructions to ensure that public health protocols are observed and mass gatherings are disallowed.”

Nasa 7,337 pulis naman ang ipinadala sa 2,745 vaccination centers habang 4,877 naman ang nasa 2,535 quarantine areas.

Sa labas naman ng NCR Plus bubble, nagpadala na umano ng 9,180 police personnel ang PNP para sa 1,103 Quarantine Control Points.

Saad pa ni Eleazar, “Despite the uphill battle against COVID-19 and surmounting challenges we are facing, the PNP remains resilient in assisting the government to quell the community transmission of the Delta variant. At bilang dating commander ng Joint Task Force COVID shield, hindi na bago sa inyong Pambansang Pulisya ang anumang uri ng quarantine restrictions kaya makakaasa ang lahat ng aming kahandaan sa anumang plano at ipag-uutos ng ating IATF at mga lokal na pamahalaan.

“Ngunit tayong lahat ay dapat kumilos para mapigilan ang pagkalat ng mas nakahahawang Delta variant. Bukod sa bakuna at pagsunod sa minimum public health safety standards, disiplina po ang kailangan ng bawat isa sa atin.”