Extended ECQ sa Metro Manila, ‘fake news’ — DTI

ni Ronalyn Seminiano Reonico | August 14, 2021

Pinabulaanan ni Trade Secretary Ramon Lopez ang kumakalat na balitang palalawigin pa ang pagsasailalim sa Metro Manila sa enhanced community quarantine (ECQ) dahil wala pa umanong nagaganap na pagpupulong ang Inter-Agency Task Force for the Management of Emerging Infectious Diseases (IATF) sa extension ng hard lockdown sa rehiyon.

Aniya sa isang teleradyo interview, “Siguro kailangang malinawan din natin na isa pong fake news o rumor ang lumabas kahapon na mag-e-extend ang ECQ.

“Wala pang ganoong usapan. In fact, hanggang August 20 lang ‘yung napag-agree-han.”

Noong Agosto 6, isinailalim ang National Capital Region (NCR) sa ECQ hanggang sa August 20.

Samantala, ayon kay Lopez, ibabase sa numero ng COVID-19 cases ang pagluluwag o paghihigpit ng quarantine classification sa bansa.

Aniya pa, “Marami-rami na ring nag-a-agree ngayon na mag-modified ECQ at mag-granular lockdown na lang dahil nga sa idinudulot na pagpatay nito sa ekonomiya pati rin sa mga kabuhayan ng ating mga kababayan.”

Travel restrictions sa India, Indonesia, atbp. bansa, pinalawig pa

ni Ronalyn Seminiano Reonico | August 13, 2021

Pinalawig pa ng pamahalaan ang ipinatutupad na travel restrictions sa India, Pakistan, Bangladesh, Sri Lanka, Nepal, United Arab Emirates, Oman, Thailand, Malaysia, at Indonesia hanggang sa Agosto 31 dahil sa COVID-19 Delta variant.

Ayon kay Presidential Spokesperson Harry Roque, inaprubahan ni Pangulong Rodrigo Duterte ang naturang rekomendasyon ng Inter-Agency Task Force on Emerging Infectious Diseases (IATF) na pagpapalawig ng travel ban kasabay ng pag-apruba sa pagpapatuloy ng operasyon ng international transit hub. Saad ni Roque, "These international transit hub operations shall be limited to airside transfers between Terminals 1 and 2, and within Terminal 3 of the Ninoy Aquino International Airport, and further limited for countries/jurisdictions/territories in the Green List."

Samantala, ang mga bansang nasa Green List ay ang Albania, American Samoa, Anguilla, Australia, Benin, Bosnia and Herzegovina, Brunei, Burkina Faso, Cameroon, Cayman Islands, Chad, China, Comoros, Cote d’ Ivoire (Ivory Coast), Djibouti, Equatorial Guinea, Falkland Islands, Gabon, Grenada, Hong Kong, Hungary, Mali, Federated States of Micronesia, Montserrat (British Overseas Territory), New Caledonia, New Zealand, Niger, Nigeria, Northern Mariana Islands, Palau, Poland, Romania, Saint Pierre and Miquelon, Slovakia, Sudan, at Taiwan. Saad pa ni Roque, "As such, protocols for the controlled movement of passengers and health and safety protocols within the terminals shall be strictly observed."

Laguna, Iloilo City, Cagayan De Oro, MECQ simula sa Aug. 16

ni Ronalyn Seminiano Reonico | August 13, 2021

Luluwagan ang ipinatutupad na quarantine restrictions sa Laguna, Cagayan De Oro, at Iloilo City simula sa susunod na linggo, ayon sa Malacañang.

Ang nabanggit na mga lugar ay isinailalim sa enhanced community quarantine (ECQ) hanggang sa Aug. 15. Ayon naman kay Presidential Spokesperson Harry Roque, inaprubahan ni Pangulong Rodrigo Duterte na pairalin ang modified ECQ sa mga naturang lugar simula sa Agosto 16 hanggang sa August 31.

Mananatili naman sa ilalim ng ECQ ang Metro Manila hanggang sa Agosto 20, ayon kay Roque. Samantala, ang mga sumusunod na lugar ay isasailalim sa MECQ mula sa Aug. 16 hanggang 31: Aklan, Apayao, Bulacan, Cebu City, Cavite, Ilocos Norte, Iloilo Province, Lapu-Lapu City, Lucena City, Mandaue City, at Rizal Ayon kay Roque, mananatili naman sa general community quarantine (GCQ) with heightened restrictions ang mga sumusunod na lugar simula sa Aug. 16 hanggang 31: Luzon: Ilocos Sur; Cagayan; Quezon at Batangas sa Calabarzon; at Naga City; Visayas: Antique, Bacolod City at Capiz sa Region 6; at Negros Oriental at Cebu; Mindanao: Zamboanga del Sur; Misamis Oriental; Davao City, Davao del Norte, Davao Occidental, at Davao de Oro.

Simula naman ngayong araw hanggang sa katapusan ng buwan ng Agosto ay isasailalim ang Tarlac sa GCQ, ayon kay Roque. GCQ rin ang papairalin sa mga sumusunod na lugar mula sa Agosto 16 hanggang sa 31: Luzon: Baguio City sa Cordillera Administrative Region; Santiago City, Quirino, Isabela at Nueva Vizcaya sa Region 2; Puerto Princesa sa Region 4-B; Guimaras at Negros Occidental sa Region 6; Zamboanga Sibugay, Zamboanga City; at Zamboanga del Norte sa Region 9; Davao Oriental at Davao del Sur sa Region 11; General Santos City, Sultan Kudarat, Sarangani, North Cotabato at South Cotabato sa Region 12; Agusan del Norte, Agusan del Sur, Surigao del Norte, Surigao del Sur at Dinagat Islands sa CARAGA; Cotabato City sa Bangsamoro Autonomous Region sa Muslim Mindanao.