Patay sa magnitude 7.2 na lindol sa Haiti, umakyat na sa mahigit 1,200

ni Ronalyn Seminiano Reonico | August 16, 2021

Pumalo na sa mahigit 1,200 ang bilang ng mga nasawi sa tumamang magnitude 7.2 na lindol sa Haiti noong Sabado at patuloy pa ring nagsasagawa ng search and rescue operations ang mga awtoridad sa pag-asang may mahahanap pang mga survivors mula sa mga gumuhong gusali.

Ayon sa Civil Protection Agency ng naturang bansa, tinatayang aabot sa 13,600 gusali ang nasira at libu-libong katao ang sugatan dahil sa insidente.

Samantala, nahihirapang magsagawa ng operasyon ang mga rescuers dahil sumabay pa ang Tropical Depression Grace na nagdulot ng pag-ulan at pagbaha, ayon sa US National Weather Service.

Nangako naman ang United States, Chile, Argentina, Peru, Venezuela at iba pang bansa na magpapadala ng tulong sa Haiti.

Nagpadala na rin ang Dominican Republic ng 10,000 food rations at mga medical equipments. Nagpadala rin ang Cuba at Ecuador ng mga medical at search and rescue teams sa Haiti.

32 Pinoy sa Afghanistan, pauuwiin na — DFA

ni Ronalyn Seminiano Reonico | August 16, 2021

Inilikas ang 32 Pilipino sa Afghanistan dahil sa lumalalang tensiyon matapos pasukin ng militanteng grupong Taliban ang capital city ng naturang bansa na Kabul.

Ayon sa Department of Foreign Affairs (DFA), inaayos at pinoproseso na ang pagpapauwi sa mga Pinoy na nananatili pa sa Kabul, Afghanistan.

Saad pa ng DFA, “The Department and its Foreign Service Posts in the region and beyond are exploring all avenues of cooperation and are closely coordinating with governments and international partners to guarantee their immediate and safe passage.”

Ang mga inilikas na 32 Pinoy ay kasalukuyan na umanong nasa Doha at naghihintay ng flights pauwi sa Pilipinas at mayroon pang 19 Pilipino na nakatakda nang umalis ng Afghanistan.

Una nang itinaas ng DFA ang Alert Level 4 sa Afghanistan dahil sa walang katiyakang seguridad sa bansa.

Samantala, nananawagan ang DFA sa iba pang mga Pinoy sa Afghanistan na makiisa sa isinasagawang repatriation effort ng ahensiya.

Saad pa ng DFA, kontakin lamang ang +923335244762 sa Whatsapp/Viber sa mga Pilipino na nangangailangan ng tulong.

Maaari rin umanong kontakin o i-message ang facebook.com/atnofficers.islamabadpe o facebook.com/OFWHelpPH at ang email na isbpeatn@gmail.com.

Patay sa baha sa Turkey at Niger, umakyat na sa 108

ni Ronalyn Seminiano Reonico | August 15, 2021

Patuloy pa ring nagsasagawa ng rescue operations dahil sa matinding pagbaha sa northern Turkey kung saan umabot na sa 44 ang mga nasawi.

Ayon sa disaster agency ng Turkey na AFAD, bumuo na ng special team upang maghanap ng mga posibleng survivors sa mga nalubog sa tubig na mga gusali at kabahayan dahil sa pagbaha na tumama sa Black Sea regions noong Miyerkules.

Noong Sabado, kinumpirma ng AFAD na umabot na sa 44 ang death toll at siyam na katao ang isinugod sa mga ospital. Samantala, nakaranas din ng pagbaha at landslides ang Niger dahil sa matinding pag-ulan kung saan umabot na sa 64 ang bilang ng mga nasawi.

Ayon sa opisyal ng Niger, 32 katao ang nasawi mula sa mga gumuhong gusali at 32 ang mga nalunod. Tinatayang aabot sa 70,000 katao ang apektado ng insidente at mahigit 5,000 kabahayan ang nasira. Ang mga lubos na naapektuhang rehiyon ay ang Maradi, Agadez sa Sahara Desert, at ang capital na Niamey.