The Kiss nagwagi sa 28th MARHO C'Ships

ni Green Lantern @Renda at Latigo | November 25, 2023

Hindi pinaporma ni The Kiss ang mga nakatunggali matapos manalo sa 28th MARHO Breeders' Championship - 2-Year-Old Juvenile Fillies na inilarga sa Metro Turf, Malvar - Tanauan City, Batangas, noong Linggo ng hapon.

Nakitaan ng magandang diskarte si former Philippine Sporstwriters Association, (PSA) - Jockey of the Year awardee Patricio Ramos Dilema matapos nitong ipuwesto si The Kiss sa segundo sa largahan at hayaang makalayo ng bahagya ang matulin na Victorious Angel.

Pagdating ng half mile ay saka nilapitan ni The Kiss si Victorious Angel kaya naman pagsapit ng far turn ay naagaw ng winning horse ang bandera.

Sa huling 200 metro sa rektahan ay bumibibo na sa unahan si The Kiss kaya naman tinawid nito ang finish line ng may tatlong kabayo ang agwat sa pumangalawang si Maid For Trouppei.

Inilista ni The Kiss ang tiyempong 1:28.4 sa 1,400 meter race sapat upang hamigin ng winning horse owner na si M.V. Tirona ang P600,000 premyo.

"May magandang hinaharap si The Kiss, tingin ko magiging champion horse yan," saad ni Johnny Del Castillo, veteran karerista.

Nasikwat ni Maid For Trouppei ang second place prize na P225,000 habang ang third placer na Over Azooming ay nag-uwi ng P125,000 sa event na suportado ng Philippine Racing Commission, (PHILRACOM).

Samantala, hinahanda si The Kiss sa susunod niyang sasalihang stakes race kaya aabangan ito ng kanyang mga tagahanga.

Morning After nakuha ang korona sa MARHO

ni Green Lantern @Renda at Latigo | November 24, 2023

Nasungkit ni Morning After ang korona sa 28th MARHO Breeders' Championship - Andok's Litson Baka 2-Year-Old Juvenile Colts na nilarga sa Metro Turf, Malvar sa Tanauan City, Batangas noong Linggo.

Nirendahan ni class A rider Kelvin Abobo, ipinuwesto nito si Morning After sa pangatlo paglabas ng aparato at saka pinagmasdan ang mga nasa unahan na sina Spolarium at Gameir Winner.

Habang lumalapit sa far turn ay kumakapit na si Morning After sa nangungunang si Spolarium at nagkapanabayan sila papuntang hometurn.

Pagsungaw ng rekta ay nakisali ang kakampi ni Spolarium na si Bill Jordan, pinagkaisahan nila si Morning After para maagaw ang bandera.

Pero naging matatag sa unahan si Morning After at tinawid nito ang meta ng may tatlong kabayo ang agwat sa pumangalawang si Bill Jordan habang tersero si Spolarium.

"Sa ipinakitang husay ni Morning After, posibleng manalo siya sa mas malaking karera kaya aabangan siya sigurado ng mga karerista," saad ni Jerry Sayson, veteran karerista.

Inilista ni Morning After ang tiyempong ang 1:27 minuto sa 1,400 meter race sapat upang hamigin ng winning horse owner na si Melaine Habla ang P600,000 premyo.

Napunta ang P225,000 sa second placer na si Bill Jordan sa event na suportado ng Philippine Racing Commission, (PHILRACOM) ni Chairman Reli de Leon.

Race 1 - Bantay Shore/Yeng Von Yang (3/3A), King James (6), Skywolf (1)

Race 2 - Jambo (2), Lord Luis (3), Shining Angel (5)

Race 3 - Hee Nieve Rahh (2), Luke Skywalker (6)

Race 4 - Yabadabadur (9), Oh Rootie (6), Corona (1), Lady Of Peace (10)

Race 5 - Stripe Of Pink (8), Sakalam (14), Darna (13), Iikot Lang/Cash Is King (3/3A)

Race 6 - Todo Pong (7), Charm N Luck/Can You Giub (4/4A), Bullet (3)

Race 7 - Havana Ohhnana (7), Jacqueline (8), Kentucky Rain (5), Buwayang Bato (11)

Race 8 - Advance Party (7), Tatler Story (11), Cat's Whiskers (13), National Treasure (8)

Secretary Pinetiks ang mga kalaban

ni Green Lantern @Renda at Latigo | November 23, 2023

Pinaglaruan lang ni Secretary ang mga nakatunggali matapos sikwatin ang korona sa MARHO Breeders' 3-Year-Old Colt Filly Mile race na inilarga noong Linggo sa Metro Turf, Malvar - Tanauan City, Batangas.

Pagsalida sa aparato ay biglang humangos si Secretary papunta sa unahan para hawakan agad ang dalawang kabayong agwat sa humabol na Make Or Break, Winner Parade at Sister Moon.

Dinikitan si Secretary ni Winner Parade sa kalagitnaan ng karera pero pagsapit ng far turn ay umungos na ng apat na kabayo ang winning horse.

Kaya naman papasok ng huling kurbada ay halos mag-isa na lang na tumatakbo si Secretary, umabot pa sa anim na kabayo ang bentahe sa rektahan.

Walang naging sagabal sa rektahan kaya tinawid ni Secretary ang finish line ng may mahigit 10 kabayo ang lamang sa pumangalawang si Winner Parade habang tersero ang Sister Moon.

Ginabayan ni Mark M. Gonzales, inirehistro ni Secretary ang tiyempong 1:39.6 minuto sa 1,600 meter race sapat upang hamigin ng winning horse owner na si Ronaldo David ang P600,000 premyo.

Nakopo ng second placer na si Winner Parade ang P225,000 habang P125,000 ang napunta sa pumangatlong si Sister Moon at P50,000 ang inuwi ni Make Or Break na dumating na pang-apat.

Ang nasabing event ay suportado ng Philippine Racing Commission, (PHILRACOM) ni Chairman Reli de Leon.