Robin Hood panalo sa Travel Grand Cup

ni Green Lantern @Renda at Latigo | December 21, 2023

Kumaripas sa home stretch si Robin Hood upang sikwatin ang korona sa 10th Pasay "The Travel City" Grand Cup na nilarga sa Metro Turf, Malvar - Tanauan City sa Batangas, noong Linggo ng gabi.

Full gate ang aparato kaya naman kumpulan sa arangkadahan at bahagyang naipit si Robin Hood kaya hindi agad nakasabay at pumuwesto na lamang sa pang-pito habang nagsosolo sa unahan ang matulin na si King Tiger.

Umabot sa kalagitnaan ang labanan ay lamang pa rin ang King Tiger ng walong kabayo sa mga humahabol, nasa pang-lima naman si Robin Hood.

Pagsapit sa far turn ay nanatiling namamayagpag sa unahan si King Tiger na sinakyan ni dating Philippine Sportswriters Association, (PSA) - Jockey of the Year awardee Jonathan Basco Hernandez.

Papasok sa home turn ay unti-unti ng kinakapitan si King Tiger nina Moderne Cong, Life Gets Better, La Liga Filipina at Gusto Mucho habang nasa malayong pang-anim pa rin si Robin Hood.

Nadikitan nina Moderne Cong at Life Gets Better si King Tiger sa rektahan pero biglang sumulpot si Robin Hood na malakas ang dating sa huling 150 metro ng karera para agawin ang unahan.

Nagwagi si Robin Hood ng may dalawang kabayo ang agwat sa pumangalawang si Life Gets Better.

Nirendahan ni jockey Jomer Estorque, inirehistro ni Robin Hood ang tiyempong 1:54.6 minuto sa 1,800 meter race sapat upang hamigin ang P600,000 premyo sa event na suportado ng Philippine Racing Commission, (PHILRACOM) ni Chairman Reli de Leon. 

Nakopo ni Life Gets Better ang second place prize na P225,000 habang inuwi ng third na si Magna Cum Laude ang P125,000 at P50,000 ang sinikwat ni Nuclear Bomb. 

Hombre, sumiklab ang galing sa Unos Dos Race

ni Green Lantern @Renda at Latigo | December 14, 2023

Hindi nagpadaig si Hombre, nagpasiklab din ito noong Linggo nang manalo sa Uno Dos Corporation Trophy Race na inilarga sa Metro Turf, Malvar sa Tanauan City, Batangas.

Sinakyan ni jockey FA Tuazon, ipinuwesto nito si Hombre sa pang-apat paglabas ng aparato habang nasa unahan ang mabibilis sa largahan na sina Tulak Ng Bibig at One Of A Kind.

Naka-puwesto sa tersero si Alalum Falls nang ungusan siya ni Hombre papasok ng far turn habang nasa kalahating kabayo na lang ang agwat ni Tulak Ng Bibig.

Pagdating ng home turn ay kumuha ng bandera si Hombre at maging ang One Of A Kind ay nilampasan si Tulak Ng Bibig sa segunda puwesto.

Patuloy ang pagdomina ng winning horse, nakalamang ng dalawang kabayo ang Hombre pagsapit ng rektahan at umalagwa pa ito sa apat na kabayo sa huling 150 meter ng karera.

Magaan na tinawid ng Hombre ang meta ng may anim na kabayong lamang sa pumangalawang si One Of A Kind sa event na suportado ng Philippine Racing Commission, (PHILRACOM) ni Chairman Reli de Leon. Inirehistro ni Hombre ang tiyempong 1:27.2 minuto sa 1,400 meter race sapat upang hamigin ang P180,000 premyo, nasungkit naman ni One Of A Kind ang second place prize na P67,500.

Tersero si Hiroshima na nag-uwi ng P37,500 habang P15,000 ang nakopo ng fourth placer na Tulak Ng Bibig. 

Morning After inangkin ang titulo sa Lagdameo Race

ni Green Lantern @Renda at Latigo | December 13, 2023

Nagpasikat si Morning After matapos angkinin ang titulo sa Amb. Antonio M. Lagdameo Juvenile Championship Cup na inilarga sa Metro Turf, Malvar - Tanauan City, Batangas noong Linggo ng hapon.

Sinabayan ni Morning After ang matutulin sa largahan na sina Ghost at Gameir Winner para magtagisan sila ng bilis sa unahan na isang dahilan kung bakit nasiyahan ang mga karerista, naging mainitan ang bakbakan sa banderahan.

Pero sa huling 400 meter ng karera ay kumuha ng unahan si Morning After at inungusan nito ang matibay na Ghost.

Pagdating ng huling kurbada ay nasa dalawang kabayo na ang abante ni Morning After sa pumapangalawang si Ghost habang nasa pangatlo si Gameir Winner.

Rumeremate naman sa tabing balya si King James subalit hindi na rin ito umabot sa nangungunang Morning After.

Tinawid ni Morning After ang meta ng may isang kabayo ang agwat sa pumangalawang si King James, tersero si Be Smart.

Sinakyan ni jockey Kelvin Abobo, inirehistro ni Morning After ang tiyempong 1:43.2 minuto sa 1,600 meter race sapat upang hamigin ng winning horse owner na si Melaine Habla ang P900,000 premyo.

Nasikwat ni King James ang second place prize na P300,000 habang P150,000 ang nakopo ng third placer na si Be Smart.

Napunta sa fourth placer na si Ghost ang P105,000 habang kumolekta rin ang winning breeder ng P30,000 sa event na suportado ng Philippine Racing Commission, (PHILRACOM) ni Chairman Reli de Leon.  

Mga Tip ni Green Lantern: Race 1 - Road s Safety (1), Chiller (2) Race 2 - Grandi Moments (4), Feel The Burn (3),Extra Addition, (10) Race 3 - Laughing Tiger (1), Winsome Maxinne (2) Race 4 - Destiny (5), Double Strike (2), Preethi (6) Race 5 - Don Damiano (1), Money For Gabriel (3), Tifosi (7) Race 6 - Indelible Quaker (6), Manila Boy (1), Boni Avenue (3) Race 7 - Sultanov (4), Chef Kat (7), Ariana (3), Oh Lala (5)