Superhawk sasabak sa pista ng Metro Turf

ni Green Lantern @Renda at Latigo | Pebrero 10, 2024

Sasalang  sa pista si Superhawk para sabakan ang PHILRACOM Rating Based Handicapping System na gaganapin sa Metro Turf, Malvar - Tanauan City, Batangas, ngayong araw.

Panigurado na mapapalaban si Superhawk sa limang tigasing kabayong kasali sa distansiyang 1,400 meter race. Rerendahan ni jockey ME De Ocampo, makakatagisan ng bilis ni Superhawk sina Sinag, Happy Maggie, Manila Boy, Queen Margaux at Honey Ryder.

May added prize na P15,000 na ikakalat sa unang tatlong kabayong tatawid sa meta sa event na suportado ng Philippine Racing Commission, (PHILRACOM) ni Chairman Reli de Leon.

Ayon sa komento ng mga karerista, posibleng maging karibal ni Superhawk sa asam na panalo ay sina Sinag at Happy Maggie na gagabayan ni star jockey Jeffril Tagulao Zarate.

Hahamig din ang winning horse owner ng karagdagang P11,000 premyo, habang P4,500 ang ibubulsa ng breeder ng mananalong kabayo at tig- P1,000 at P500 ang second at third ayon sa pagkakasunod. Pasisibatin sa unang race ang nasabing karera, simula rin ng Pick 5.

Isa pang aabangan ng mga karerista ang labanan ng pitong kabayo sa isa pang PHILRACOM Rating Based Handicappng System na ikakasa sa pangalawang karera.

Ang mga maglalaban ay sina Ruby Bell, Full Control, Ano Noventa Y Seis, Top Grosser, King Hans, Savawani at Magandang Dilag.

Samantala, may walong races ang pakakawalan ng Metro Manila Turf Club Inc. (MMTCI) ngayong araw ng Biyernes kaya medyo mahaba ang paglilibang ng mga karerista. 

Mga Pili ni Green Lantern:

Race 1 - Superhawk (2), Happy Maggie (3), Manila Boy (4)

Race 2 - Ruby Bell (1), Magandang Dilag (7), King Hans (5)

Race 3 - Sapin Sapin (1), Isla Puting Bato (3), Noh Sen Young Yana (6)

Race 4 - Captain Det Det (5), Seychelles (4), Eyeshot (2)

Race 5 - Double Time/Gold N Silver (1/1A), Etnad (7), Spoiled Brat (4)

Race 6 - Sky Lover (1), Pendant (2), Jambo (7)

Race 7 - Mandatum (8), Spaghetting Pababa (1), Antonio Delamugis (4)

Race 8 - Hakeem (10), Great Britain (1), Kaboom (12), Matikas (7)

Louiseville at Captain Bob maghaharap sa 3-YO Race

ni Green Lantern @Renda at Latigo | Pebrero 9, 2024

Magtatagisan ng bilis sina Louiseville at Captain Bob pagharap nila sa 3-Year-Old & Above Maiden Race na ilalarga sa Metro Turf, Malvar - Tanauan City, Batangas, ngayong araw.

May distansiyang 1,400 meter race, makakalaban din nina Louiseville at Captain Bob ang pito pang batang kabayo na kasali sa event na suportado ng Philippine Racing Commission, (PHILRACOM) ni Chairman Reli de Leon.

Paglalabanan ang added prize na P22,000 para sa horse owner ng mananalong kabayo, ang ibang kasali ay sina Sunshine Jeune, Great Samaritan, Animo La Salle, Dynamic Dyna, Star Of The Future, Naughty Angel at Summerlin.

Gagabayan ni class A jockey Kelvin Abobo si Louiseville habang si Andreu Villegas ang rerenda kay Captain Bob.

Inaasahang magbibigay ng magandang laban kina Louiseville at Captain Bob ang mga kalahok na sina Summerlin at Animo La Salle. "Magandang laban panigurado, magagaling daw mga kasali kaya dapat mapanood para maabangan at makita ang kanilang husay," saad ni Emilio Ventura, veteran karerista.

Makakatanggap din ang breeder ng winning horse na P4,500 habang tig-P1,000 at P500 at second at third ayon sa pagkakasunod. Pakakawalan ang nasabing karera sa unang race simula din ng Pick 5, magsisimula ang bakbakan sa alas-5 ng hapon.

Samantala, walong races ang pakakawalan ng Metro Manila Turf Club Inc. (MMTCI) ngayong araw ng Biyernes kaya tiyak na masisiyahan ang mga karerista sa kanilang paglilibang.

Authentikation sasabak sa pista ng 3-YO Race

ni Green Lantern @Renda at Latigo | Pebrero 8, 2024

Handang-handa na si Authentikation sumabak sa pista dahil nagsaad ito ng pagsali sa 2024 PHILRACOM "3-Year-Old Maiden Stakes Race" na ilalarga sa Metro Turf, Malvar-Tanauan City, Batangas sa Pebrero 18.

Kahit hindi pa nakitaan ng pruweba ay posibleng makakuha ng maraming suporta sa karerista si Authentikation na sasakyan ni reigning Philippine Sportswriters Association, (PSA) - Jockey of the Year awardee John Alvin Guce.

Bukod kay Authentikation, ang ibang nominado sa nasabing karera ay sina Astig, Caring Melody, Creation Of Adam, King Edward, Matilda, Sandstorm, Spirit Of Might, Sting at War Chief.

Base sa komento ng mga karerista, malaki rin ang tsansang manalo ng magka-kuwadrang Creation Of Adam at Spirit Of Might sa distansiyang 1,400 meter race.

May nakalaan ang P1.2M guranteed prize na ikakalat sa unang anim na kabayong tatawid sa meta sa event na suportado ng Philippine Racing Commission, (PHILRACOM) ni Chairman Reli de Leon.

Kukubrahin ng mananalong kabayo ang P720,000, mapupunta ang P240,000 sa pangalawa, P120,000 sa third at tig-P60,000, P36,000 at P24,000 ang fourth hanggang sixth placers ayon sa pagkakasunod.

Magbubulsa rin ang breeder ng nanalong kabayo ng P60,000 habang tig-P36,000 at P24,000 ang second at third.

Paniguradong naghahanda na ang trainers at hinete ng mga sasaling kabayo upang masikwat ang inaasam na premyo.

Samantala, patuloy na nagtatanong ang mga karerista kung kailan pasisibatin ang naudlot na labanan ng mga tigasing kabayo sa Japan Cup.