‘Di porke matagal na kayo ay petiks ka na… Mga paraan para panatilihin ang kilig sa relasyon

ni Mharose Almirañez | September 18, 2022

Masasabi bang hindi mo na siya mahal kapag hindi ka na kinikilig sa kanya? Iba’t iba man ang paraan ng ating pagmamahal ay mahalaga pa rin kung mame-maintain natin ang pagpapakilig sa ating partner, lalo na’t isa ‘yan sa importanteng paraan upang mapatibay ang relasyon.

Bilang eksperto sa pagpapakilig, narito ang ilang tips upang pakiligin ang iyong pinakamamahal araw-araw:

1. HINDI DAPAT MAWALA ANG ELEMENT OF SURPRISE. Kapag matagal na kayong magkarelasyon, madalas ay mahirap na siyang i-surprise dahil kabisado niya na ang mga galawan mo. Gayunman, love is full of surprises kaya makakaisip at makakaisip ka pa rin ng paraan para surpresahin siya, lalo na’t alam na alam mo na ang kiliti niya.

2. HUWAG KALIMUTAN ANG WORDS OF AFFIRMATION. Purihin mo pa rin ang beauty niya kahit kayo na. Sabihin mo kung gaano siya kaganda/kapogi at huwag na huwag mo kalilimutang mag-I love you sa kanya. Maliit o malaking bagay man ay mag-thank you ka palagi sa kanya. Hindi ka man makapag-update from time-to-time ay sikapin mong ipaalam sa kanya kung nasaan ka o kung anuman ang mga plano mong gawin for the whole day o kaya naman ay mag-catch up kayo sa mga nangyari sa inyong maghapon. Kumustahin mo siya palagi.

3. LIGAWAN PA RIN SIYA KAHIT KAYO NA. Gaanuman ka-busy ang schedule n’yo individually, as a man, dapat ay maglaan ka pa rin ng oras para sunduin siya sa work o school. Huwag mo hayaang umuwi siya nang mag-isa knowing na malakas ang ulan o marami siyang bitbit na gamit. Itrato mo pa rin siyang special. Huwag kang maging kampante na porke kayo na ay magpapaka-easy ka na lamang sa relasyon n’yo. Ligawan mo pa rin siya araw-araw dahil isa ‘yan sa sikreto para tumagal at ma-maintain ang kilig. Ask yourself, paano mo ba siya napa-oo?

4. BALIKAN KUNG PAANO KAYO NAGSIMULA. Masarap sa feeling ‘yung moment na sabay n’yong nire-reminisce kung paano kayo nagkakilala, nagkamabutihan, at naging magkarelasyon. Puwede n’yo ring i-reenact ang first meet and date n’yo. Isa ito sa mga happenings na dapat n’yong i-cherish, lalo na ‘yung time na nagkakahiyaan pa kayo dahil paniguradong abot hanggang tainga ang mga ngiti n’yo kapag ‘yan ang topic.

5. MAG-GIVE AND TAKE. May ibang boys na ayaw nilang pinapagastos ang girlfriend nila dahil nakakawala raw ng pagkalalaki nila, pero hindi dapat ganu’n. For the girls, hindi porke babae kayo ay magte-take advantage na kayo sa pagiging in love sa inyo ng dyowa n’yo. Treat him fair, mag-give ka rin at hindi puro receive o take na lang. To be honest, ang lakas kaya maka-strong independent woman kapag may ambag ka sa date, hindi ‘yung puro ganda lang. Ano ka, palamuti lang d’yan?! Anyway, hindi lamang ito tungkol sa kung sino ang gumagastos sa date kundi pati na rin sa ibang aspeto. Dapat ay pareho kayong mag-effort sa relasyon, hindi ‘yung isa lang.

6. MANATILI SA TABI NIYA. Ikaw ang unang tao na dapat makaalam sa tuwing may bumabagabag sa kanya o mayroon siyang good news. Magsilbi kang ‘one call away’ sa bawat ganap sa buhay niya. Nakakawalang-gana kasi ang relasyon kapag palagi kang out of reach o kapag palagi kang missing in action sa tuwing kailangan ka niya. So please, beshie, always be in touch. Okie?

Ngayong alam mo na kung paano pakikiligin ang iyong partner, sana ay manatiling strong ang inyong relasyon despite of all the challenges. Mawala man ang kilig kalaunan, sana ay piliin n’yo pa rin ang isa’t isa.

Tandaang ang pakikipagrelasyon ay hindi lamang puro kilig. ‘Yung tipong, porke ‘di ka na kinikilig sa kanya ay hihiwalayan mo na siya agad. You should be matured when it comes to relationship. Hindi ka naman na siguro teenager para magpadala lamang sa sparks, ‘di ba?

Akala mo ay oks, pero red flag pala… Alamin: mga ugali ng partner na ‘di dapat i-tolerate

ni Jersy L. Sanchez - @Life & Style| September 12, 2022

Sabi nga, “Love is blind” — true ‘yan, at isa pa, minsan ay pagmamahal ang dahilan kaya nananatili ang isang tao sa ‘bad relationship’.

Well, wala namang perpektong relasyon, pero mahalaga na malaman natin ang mga behavior o ugali na “major red flag” para makatagpo tayo ng fulfilling relationship.

Siyempre, kailangan nating malaman ang mga bagay o ugali ng ating partner na hindi dapat kunsintihin, anu-ano nga ba ang mga ito?

1. CONTROLLING BEHAVIOR. Kapag kinokontrol ng iyong partner ang mga ginagawa mo o gusto niya na pareho kayo ng values kahit pa iba ang mga gusto mo. Gayunman, binigyang-linaw ng mga eksperto na maraming paraan para makontrol ka ng iyong partner at hindi okay ang mga ganitong behavior.

2. GASLIGHTING. Sey ng experts, ang gaslighting ay isang common trait para sa mga controlling partner. Halimbawa, ipinaparamdam niya sa iyo na ang mga bagay na inaalala mo ay katawa-tawa. Maaari niya ring iparamdam na may mali sa ‘yo kapag nagpapahayag ka ng iyong feelings tungkol sa isang bagay.

3. ABUSE. Knows n’yo ba na ang controlling behavior ay maaaring mauwi sa abusive relationship? Ayon sa mga eksperto, maaari itong maging emotional o verbal abuse. Halimbawa umano nito ang pangmamaliit niya sa iyo, ginagawa kang katatawanan sa harap ng ibang tao, gayundin ang panga-gaslight tuwing nag-e-express ka ng iyong feelings. Kabilang din ang physical abuse, kung saan madalas kang sinasaktan ng iyong partner tuwing may hindi kayo pagkakaunawaan. Kapag ganito ang sistema n’yo, inirerekomenda ng mga eksperto na humingi ng tulong sa mga propesyunal.

5. DOESN’T BRING OUT THE BEST IN YOU. ‘Yun bang, pakiramdam mo ay hindi nakakatulong ang partner mo para mailabas ang “best version of yourself”. Kapag ganyan ang nararamdaman mo, sign ‘yan na may mali. Kung ang partner mo ay may mga sinasabi o ginagawa na hindi nakakatulong para ma-boost ang iyong confidence, senyales din ‘yan na hindi ka niya nirerespeto. Ang sakit, ‘no?

6. HE/SHE ISOLATES YOU. Paano? Kapag umabot na sa puntong kinokontrol niya kung sino ang mga taong dapat o hindi mo dapat makasama, red flag ‘yan, besh. Alam nating mahalaga ang independence sa isang relasyon, pero kapag inilalayo ka niya sa iyong pamilya at mga kaibigan, sign ito na gusto niyang ipakita na siya ang dominante, kahit pa ang kapalit nito ay ang iyong happiness, personal relationships at self-care.

7. HE/SHE WANTS YOU TO CHANGE. Bukod sa inilalayo ka niya sa mga taong mahalaga sa iyo, red flag din ‘yung pinipilit ka niyang magbago. Halimbawa nito ay ang mga hobbies, personality traits at iba pang mahalaga para sa iyo. Paalala ng mga eksperto, kung gusto ng partner mo na baguhin ang mga nabanggit, mali ‘yun. Kapag totoong mahal ka ng isang tao, susuportahan niya ang mga gusto mo at hindi ka niya pipiliting magbago for his/her own convenience.

8. HE/SHE JUDGES YOU. Kapag ginagawa niya ito sa iyo, tiyak na hindi ka niya nirerespeto. Ang partner na palaging ipinupunto ang mga imperfection mo ay isang red flag. Halimbawa, palagi siyang may sinasabi sa iyong personality, gayundin, madalas ka niyang i-body shame — ang mga ito ay immature at manipulative ways para makontrol ang inyong relasyon.

9. IGNORES YOUR SEXUAL NEEDS & LIMITS. Na-experience mo na bang ma-pressure sa sexual activity dahil hindi ka willing o wala kang consent, o kaya naman, hindi na niya naibibigay ang sexual needs mo? Well, ayon sa mga eksperto, normal na magkaiba ang turn-ons at libido ng magkarelasyon, pero ang hindi normal ay ang pag-overstep sa sexual boundaries.

10. HE/SHE DOESN’T SUPPORT YOU. Sa totoo lang, hindi healthy ang isang relationship kung ang partner mo ay hindi naniniwalang magtatagumpay ka sa iyong mga pangarap. Kung iniinsulto niya ang iyong work ethic, minamaliit ang iyong mga achievements at kinukumbinsi ka niyang tanggihan ang mga bagong oportunidad para mapalago ang iyong career, isip-isip ka na, besh.

Ang red flag ay puwedeng lantaran o subtle lamang.

Bagama’t kailangang mag-compromise ng bawat isa para mag-work ang isang relasyon, may mga ugali na sobrang toxic at hindi dapat i-tolerate. Higit sa lahat, kailangan itong solusyunan, pero kung hindi na kaya, bitaw na.

Sa totoo lang, may mga isyu na hindi madaling mapansin, at minsan ay in-denial tayo dahil mahal natin ang tao, pero mga beshy, importanteng malaman ang mga ito upang maiwasang mabulag at hindi masyadong magbuhos ng atensyon at oras sa isang toxic na relasyon.

Oks lang din na humingi ng tulong sa mga propesyunal o sa mga taong malapit sa atin dahil ang mahalaga ay maisalba mo ang iyong sarili sa maling tao.

Gets mo?

4 isyu na ‘di dapat pag-awayan ng mag-dyowa

ni Mharose Almirañez | September 11, 2022

Magpapasko na naman, may love life ka na ba? Okey lang naman ang maging single sa Pasko—lalo na kung sanay ka na maging single taun-taon. Pero ang hindi okey ay ‘yung in a relationship ka, tapos bigla ka na lamang magiging single dahil sa nagbabadyang hiwalayan.

Bilang concerned citizen, to the rescue ulit ang inyong beshie Mharose upang mabigyan kayo ng relationship tips. Pero bago ang lahat, alamin muna natin kung anu-ano nga ba ang mga bagay na hindi dapat pinag-aawayan ng magkasintahan:

1. MALILIIT NA BAGAY. Hangga’t maaari ay pag-usapan n’yong maigi ang kaunting tampuhan. Kahit pa sabihin na hindi naman big deal dahil maliit na bagay lamang ‘yun, ngunit isipin mo na lamang na kapag naipon nang naipon ang kinikimkim niyang maliliit na bagay na ‘yun ay baka umapaw na siya sa tampo, selos, at galit.

2. ORAS. Walang masama sa pagde-demand ng oras sa iyong karelasyon, pero isipin mo rin na kailangan din niyang paikutin ang oras niya sa ibang bagay—hindi lamang sa iyo. Halimbawa, trabaho, kaibigan, pamilya, church, household chores, exercise, social media, at iba pang bagay without you. Bigyan mo siya ng freedom para gawin ang ilang bagay na gusto niyang gawin on his/her own. Unawain mo rin na hindi niya palaging hawak ang cellphone niya, kaya please, beshie, huwag kang magagalit kung hindi ka niya ma-update from time-to-time. Sabihin na nating nag-aalala ka sa kanya at nami-miss mo siya, for sure ay siya rin naman, ‘di ba?

3. PERA. Mapa-short term goals o long term goals man ‘yan, dapat ay mayroon kayong ipon o enough funds to spend. It’s a give and take process, kaya dapat ay pareho kayong gumagastos sa relasyon. Huwag kayong magbilangan kung sino ang may pinakamaraming ambag sa date. Kung mayroon man kayong joint account sa bangko ay huwag na huwag mong gagalawin ‘yun nang hindi ipinapaalam sa iyong partner.

4. DISTANSYA. Ipagpalagay nating taga-South Luzon ang dyowa mo, habang taga-North Luzon ka naman. Kung talagang mahal n’yo ang isa’t isa ay hindi hadlang ang distansya para magkita kayo. Hindi rin dahilan na busy siya o wala siyang pamasahe para hindi ka niya kitain, sapagkat ‘ika nga, “Kung may gusto, may paraan. Kung ayaw, maraming dahilan.” Jusko, beshie, North and South Luzon lang ‘yan, nahiya naman sa inyo ‘yung mga nasa long distance relationship na pilit inilalaban ang relasyon, ‘di ba?!

‘Ika nga nila, “A strong relationship requires vast communication.” Huwag kang pumayag na action speaks louder than words dahil walang mangyayari sa relasyon n’yo kung puro lamang coldness ang ipararamdam n’yo sa isa’t isa. Hangga’t maaari ay pag-usapan n’yo ang problema. Ibalik ang nawalang tiwala at sikaping magpatawad. Tandaan na ang pakikipagrelasyon ay hindi lamang puro saya. Huwag mo siyang isantabi porke nawala na ‘yung kilig— be mature enough sa pag-handle ng relationship. After all, pagsubok ang nagpapatibay ng relasyon kaya mainam kung ‘yan ang gagawin n’yong pundasyon.

High standards, red flags, self-ego… lahat ‘yan ay mawawala kapag natuto kang magmahal. Kaya kung sakaling mapunta kayo sa alanganing sitwasyon ng iyong karelasyon ay isipin mo na lamang ang mga bagay na minsan mong isinantabi nang dahil sa pagmamahal mo sa kanya.

Ngunit kung tunay ngang natauhan ka na o namulat sa pagiging bulag sa pag-ibig, well, sino nga ba ang inyong beshie para mangaral? Gayunman, sa susunod na magmamahal ka, sana ay ‘yung sigurado kang may natutunan ka sa ‘yong nakaraan. Mahirap kasi kung mauulit lamang ang pattern, ‘di ba?