Ginawa pang titser ng mga gustong matuto... Kambing na magaling mag-surfing, kilalanin

ni Jenny Rose Albason @Gulat Ka 'No?! | September 24, 2023

Gusto mo rin bang matuto mag-surfing? Kakaiba ang trip ng isang instructor sa Pismo Beach, California na si Dana McGregor dahil kambing lang naman ang kanilang ginagamit na titser sa mga nais matuto mag-surfing.

Magaling daw kasing magbalanse sa bundok ang mga kambing lalo na sa matatarik na lugar kaya naisipan niya ito. Kahit marami nang aso ang natutong mag-surf at kadalasan ay nananalo pa ng award, madalas pa rin umano itong mahulog sa surfboard. Noong 2011 ay nagdesisyon si McGregor na kumuha ng isang kambing upang linisin ang poison oak at iba pang damo sa hardin ng kanyang nanay. Balak sanang lutuin ni McGregor ang kambing pagkatapos nitong maglinis ngunit siya ay napamahal na rito at pinangalanan niya pang “Goatee”.

Noong kaarawan ni McGregor ay sinama niya si Goatee sa beach at sinubukan niya itong turuan ng surfing.

Simula noon ay nagsama na si McGregor ng mga kambing upang mag-surfing. Gumawa rin siya ng YouTube videos at 2 children’s book kaya naman binansagan siyang “Goatfather”.

Natutuwa si McGregor na nakakapagbigay siya ng saya sa mga tao sa pamamagitan ng kanyang mga kambing at surfing. Para sa isang first-time surfer na si Rebekah Abern, nakakapagpakalma umano na makita kung paano magbalanse ang kambing na si Chupacabra sa surfboard. Minsan ay nagugulat pa rin si McGregor sa kakayahan ng kanyang mga kambing. Si Pismo, isa sa kanyang alagang kambing, ay nakikita niya umano na patuloy pa ring nagsu-surfing kahit nahulog na ang kanyang owner sa alon na may taas na 2 metro.

Ayon kay McGregor, naniniwala siya na balang araw ay makakaya na ng mga kambing na mag-surf sa loob ng isang barrel-wave. Ang barrel-wave ay ang pinakamahirap na hamon para sa mga surfer.

Aba, dinaig pa tayo ng mga kambing! Patunay ito na kung kaya ng mga hayop ay isipin natin na kaya rin natin. Wala namang imposible kung talagang gusto nating gawin ang isang bagay basta tayo'y determinadong matuto.

Sa mga gustong matuto mag-surfing d’yan, gawin nating inspirasyon si Goatee dahil kung kaya niya ay kaya mo rin!

Alamin: Kung paano ipinapakita ng aso ang kanilang pagmamahal

ni Jenny Rose Albason @Gulat Ka 'No?! | September 1, 2023

Bilang isang dog owner, handa nating gawin ang lahat para sa ating mga alagang aso. Katulad na laman ng pagbanggon sa umaga para lang sila ay ipasyal, pagpapatawad matapos nilang sirain ang ating paboritong tsinelas at marami pang iba.

Ang ilan ay naniniwala sa kasabihang ang mga aso ay ang isang “man’s bestfriend” pero ang tanong na gustong malaman ng lahat, mahal din kaya tayo ng ating mga alagang aso? Kung oo, paano natin ito malalaman? Simple lang, dahil sa artikulong ito malalaman na rin natin ang mga sign na mahal ka ng iyong alagang aso nang higit pa sa sarili nilang buhay. Halina’t isa-isahin na natin ‘to!

1. MASAYA SILA T’WING NAKIKITA KA. Kadalasan sa mga aso t’wing nakikita nila ang kanilang mga amo ay labis ang kanilang galak. Biruin mo ‘yun, ‘yung simpleng pagtahol at pagtalon ay isang na rin pala kung paano nila maipapakita ang kanilang pagmamahal sa iyo.

2. PAGBIBIGAY SA IYO NG REGALO. Tuwing inaabutan nila tayo ng kanilang paboritong laruan ang buong akala natin ay nais nilang makipaglaro, ngunit kadalasan, binibigay nila ito bilang isang regalo. Gusto nilang i-share ang kanilang paboritong gamit sa mga taong mahal nila.

3. GUSTO KANG MAKATABI MATULOG. Ang mga aso ay likas na alerto sa mga banta na maaaring mangyari sa ating kapaligiran. Kaya mas nais nilang tumabi sa ating pagtulog ay dahil sa tingin nila ligtas sila sa kapahamakan tuwing katabi nila tayo.

4. WALANG PAKIALAM SA HITSURA MO. Kung nilalambing ka pa rin ng iyong alagang aso kahit na mabaho ang iyong hininga sa umaga, pawis na pawis sa pag-e-ehersisyo, kahit magulo ang iyong buhok, at haggard, malamang na ito ay isang senyales na mahal talaga tayo ng ating mga alagang aso.

5. SINUSUNDAN KA. Consider yourself loved kung sa tingin mo ay hindi ka makagawa ng isang hakbang nang wala ang iyong alagang aso. Ang mga aso ay laging nakabuntot sa iyo nang higit pa sa seguridad. Mas gusto nilang makasama ka kaysa sa ibang tao.

Knows n’yo rin ba mga ka-BULGAR na ang brain activity ng mga aso ay tumataas kapag nakakarinig sila ng masasayang tunog, tulad ng mga papuri. Ang pag-aaral na ito ay nagpapakita rin kung paano binibigyang-kahulugan ng mga aso at kanilang mga amo.

Samantala, ang mga aso ay may kakayahan na makita ang mga pagbabago sa boses at kilos ng tao. Kaya naman, sa lahat ng hayop sa mundo, ang mga aso ang itinuturing nating ‘best friend’ hindi ba?

Practical money tips para sa bagong kasal

ni Jenny Rose Albason @Gulat Ka 'No?! | August 12, 2023

Kung ikaw ay bagong kasal, ikaw at ang iyong asawa ay magiging isa na lang ang aspeto sa buhay, kabilang dito ang inyong finances. Ibig sabihin, maghahati na kayong dalawa sa inyong suweldo, gastusin, ari-arian at pananagutan.

Magandang ideya rin na pag-usapan n’yo ang inyong plano pagdating sa financial bilang mag-asawa. Mas mainam kasi na pag-usapan ang mga bagay-bagay lalo na sa usaping pera dahil isa ito sa pinagmumulan ng hindi pagkakasundo.

Bagama’t ang household finances ay hindi romantic na usapin, isa pa rin ito sa dapat na talakayin, upang mai-plano ng mahusay kung paano mababayaran ang bills hanggang sa pagma-manage ng inyong ipon, malaking tulong din ito para sa inyong future plans.

Narito ang 5 practical money tips na maaari n’yong isaalang-alang.

1. MAS MAIGING BUMILI NG SECONDHAND ITEMS. Kapag lumipat na kayo ng bahay, totoong nakakaakit bumili ng mga brand new na gamit upang welcome rin sa inyong bagong buhay bilang mag-asawa. Gayunman, ang pagbili ng mga bagong appliances upang mag-match sa inyong bagong tahanan ay maaaring maging magastos. Unless, kung kayong dalawa ay may budget sa pagbili ng mga brand new, puwede n’yo ring i-consider ang pagkuha ng mga secondhand items. Makakatulong ito upang makatipid at mapanatili pa ring maganda ang inyong tahanan.

Bukod pa rito, ang pagbili ng secondhand ay isang mahusay na paraan upang maka-discover ng mga de-kalidad na item sa mas mababang presyo. Maaari ka ring makakita ng second hand na sofa o dining set na nasa good condition pa rin.

2. GUMAWA NG JOINT ACCOUNT. Ang pagkakaroon ng joint account lalo na sa mga gastusin sa bahay ay makakatulong upang mamonitor ang lumalabas at pumapasok sa inyong pera. Maaari n’yo rin itong gamitin bilang central fund upang bayaran ang inyong common household expenses tulad ng pagkain, renta, utility bills, atbp. Ang pag-share ng joint account ay magbibigay-daan sa inyong dalawa na maaccess ang pera sakalaing magkaroon ng emergency.

3. PAG-USAPAN KUNG SINO ANG MAGBABAYAD. Kung mayroon kayong two-income household, siguraduhing tukuyin ang inyong monthly contributions para sa bahay.

Maaari n’yo ring pag-usapan kung magkano ang ibibigay mo sa inyong joint account kada buwan, gayundin kung magkano ang inyong gagastusin, iipunin, o i-invest. May ilang mag-asawa na naka-assign kung sino ang magma-manage ng pang-araw-araw na gastusin. Ang isa ay maaaring naka-assign sa pagkain, utilities, at transportation, habang ang isa ay maaaring naka-task sa pagbibigay ng kontribusyon pagdating sa household insurance, retirement funds at investment.

4. GUMAWA NG EMERGENCY FUND. It’s never too early para mag-set up ng emergency fund, siguradong hindi mo pagsisisihan na gawin ito. Ang emergency fund ay isang reserbang pera na iyong itinabi sakaling may hindi inaasahang pangyayari, tulad ng health emergency, home repair emergency, o matanggal sa trabaho.

Kapag kinokonsidera kung magkano ang iyong monthly budget na ilalaan sa iyong emergency fund, maaari mong sundin ang tipikal na rekomendasyon, magtabi ng hindi bababa sa 6 months na living expenses. Para nagawa mo ito, kakailanganin mong magtabi ng 10% ng iyong gross income kada buwan, at kailangan mong patuloy na mag-ipon hanggang makuha mo ang halagang kailangan mo, o mas higit pa.

Kung gusto mong tiyaking regular kang naglalagay ng pera sa iyong emergency fund, maaari kang mag-set up ng isang automatic transfer sa iyong bangko o makipagpalitan sa iyong asawa na maglagay ng pera sa account kada buwan. Kung nais mong magsimulang gumawa ng emergency fund, maaari mo itong dahan-dahaning palaguin sa paglipas ng panahon, na magbibigay sa iyo ng peace of mind sakaling maka-encounter ka ng hindi inaasahang problema.

5. I-UPDATE ANG ACCOUNTS. Maraming newlyweds ang lumipat ng bagong tahanan matapos ikasal. Kung mayroon ka ring ganitong arrangement, tiyaking i-notify ang iyong banks, credit card, companies, insurance companies, at investment companies na mayroon kang account na babaguhin ang iyong address o contact information.

Kailangan mo ring ipaalam sa mga intitusyong tungkol sa iyong pagpapalit ng marital status dahil ang union ay magkakaroon ng kaugnayan sa iyong legal entitlements sa mga financial assets at estates ng isa’t isa.

Pagdating sa pag-manage ng pera, nasa inyo bilang mag-asawa kung ano ang pinakamahusay na paraan ang sa tingin n’yong mas okey. Gayunman, kung naghahanap ka ng mga time-tested advice, tiyaking i-consider ang mga nabanggit na tips.

Makakatulong ito para sa inyong bagong buhay bilang mag-asawa, at makakatulong din ito para sa inyong future. Gets??