Todo-tago at layo… Bebot, ‘di gustong makasira ng pamilya at maging kabit

ni Sis. Isabel del Mundo @Mga Kuwento ng Buhay at Pag-ibig | June 16, 2024

Dear Sister Isabel,

Gusto kong ibahagi sa inyo ang kuwento ng buhay ko, at hihingi na rin ako ng payo tungkol sa love life ko. 

Ex-OFW ako, pero ngayon for good na ko rito sa Pilipinas.

Nagkaroon ako ng karelasyon sa abroad, at nagkaanak kami. Akala ko single siya kaya pinatulan ko, pero may asawa na pala at may dalawang anak. 

Buntis na ako nang malaman ko ‘yung totoo. Kaya mula noon, umiwas at nagtago ako sa kanya hanggang sa maisilang ko ang anak namin. 

Ayokong makasira ng pamilya at maging isang kabit, kaya ako na mismo ang lumayo. 

Hindi nagtagal, isinilang ko na rin ang anak namin. Hindi siya tumigil kakahanap sa akin at halos masiraan na ng bait hanggang sa natunton niya ang kinaroroonan namin. 

Naawa ako sa kanya, ang laki ng pinayat niya at para bang may sakit. Nagmakaawa siya sa akin upang tanggapin ko siya sa buhay ko. Magsama na umano kami kasama ang anak namin. Nangako siya sa akin na magiging mabuting ama at responsableng asawa siya. 

Isa pa, wala umanong problema ‘yun sa una niyang kinasama, dahil pumayag na raw ito na dalawa kaming babae sa buhay niya. Tanggap daw ng asawa niya ang sitwasyon, at hindi raw kami guguluhin nito. 

Inamin niya rin sa akin na hindi siya kasal at handa niya umano akong pakasalan. 

Sa totoo lang, mahal ko rin naman siya at ayokong lumaki ang anak ko na walang kinikilalang ama. 

Ano ba ang dapat kong gawin? Dapat ba akong pumayag sa gusto niya na magsama kami sa iisang bubong bilang mag-asawa tutal hindi naman tumututol ang babaeng una niyang kinasama?

Sister Isabel, puwede rin kaya kaming magpakasal? Hihintayin ko ang payo n’yo.

Nagpapasalamat, 

Marita ng Tacloban

---

Sa iyo, Marita,

Sa biglang tingin, maling tanggapin mo ang lalaking nakabuntis sa iyo dahil may asawa na pala siya, pero kung payag naman ang una niyang kinasama, at nangakong hindi kayo guguluhin, sa palagay ko ay puwede ka nang pumayag sa gustong mangyari ng ama ng iyong anak, kaysa lumaking walang ama ang anak n’yo.

Kung kasal naman ang pag-uusapan, tutal puwede ka pala niyang pakasalan dahil hindi siya kasal sa una niyang kinasama at handa naman siyang gawin ito. 

Ang mahalaga nagmamahalan kayo, at with consent ng kinakasama niya. Nasa iyo ang desisyon, kung ano ang maluwag sa loob mo, ‘yun ang gawin mo.

Sumasaiyo,

Sister Isabel del Mundo

Iniputan sa ulo ang mga asawa… OFW na nakabuntis, gustong ipalaglag ang beybi

ni Sis. Isabel del Mundo @Mga Kuwento ng Buhay at Pag-ibig | June 13, 2024

Dear Sister Isabel,

Limang taon na akong Overseas Filipino Worker (OFW) dito sa Hong Kong, at 3 taon na rin ang nakakalipas mula nang magbakasyon ako sa ‘Pinas. 

Ang problema ko ngayon ay nakabuntis ako ng ibang babae rito sa Hong Kong. Pareho kaming pamilyado, at hindi alam ng mga asawa namin ang lihim naming relasyon. 

Aware naman ako na walang lihim na hindi nabubunyag, kaya sinabihan ko ang babaeng nadale ko na ipalaglag na lang niya ang batang nasa sinapupunan niya, pero ang problema ay ayaw niyang pumayag. 

Tiyak na magdaramdam ang asawa ko kapag nalaman niya ang ganitong sitwasyon.

Baka ‘di niya kayanin at mag-suicide.

Ang isa ko pang pinoproblema ay ‘yung mister ng babaeng nadali ko, baka ipa-salvage niya ako. 

Gulung-gulo na ang isip ko. Ano ba ang dapat kong gawin?

Nagpapasalamat,

Dondon ng Hong Kong

---

Sa iyo, Dondon,

Makabubuting huwag n’yo munang ipaalam sa mga asawa n’yo ang nangyari. Ilihim n’yo muna ito sa abot ng inyong makakaya. Umiba kayo ng tirahan d’yan sa Hong Kong upang makaiwas sa tsismis. Pero, huwag na huwag n’yong ipapalaglag ang bata, kasalanang mortal iyan sa mata ng Diyos, ang batang iyan ay anak ng Diyos. Bawat batang nabubuo sa sinapupunan ng isang ina ay Children of God. May plano ang Diyos sa batang iyan. Kayo ang napili niyang magulang, dugo mo at dugo ng nabuntis mo ang gusto ng Diyos na manalaytay sa bata. 

Sa tamang panahon, saka n’yo sabihin sa asawa n’yo ang nangyari. Kapwa kayo manalangin at humingi ng tulong sa Diyos na sana gabayan kayo sa tamang desisyon. 

Samantala, alalayan mo muna ang babaeng nabuntis mo para maipanganak niya nang maayos ang batang kanyang isisilang.

Malalampasan n’yo rin ang pagsubok na iyan. Bawat tao ay may pagsubok pero kung mananatili kayong nakakapit sa Diyos, malalampasan n’yo rin ang matinding pagsubok na kasalukuyan n’yong nararanasan. 

Sana hindi na ito maulit o masundan pa. Tandaan mo, kapwa kayo may asawa kaya umayos ka. Sustentuhan mo ang bata, at putulin n’yo na ang relasyon n’yo. 

Bumalik ka sa pamilya mo at umiwas ka na sa mga babae. Mamuhay ka sa tamang landas kasama ang tunay mong pamilya at gampanan ang role mo bilang ulirang asawa at ama. Maunawaan mo sana at sundin ang payo ko.

Sumasaiyo,

Sister Isabel del Mundo

Madir, ‘di na ma-take ang pagtrato ng in-laws

ni Sis. Isabel del Mundo @Mga Kuwento ng Buhay at Pag-ibig | June 5, 2024

Dear Sister Isabel,

Magandang araw sa inyo riyan sa BULGAR. Ang isasangguni ko sa inyo ay tungkol sa aking in-laws, ang hirap pala talagang makisama ‘no?

Ang tinutukoy ko ay ang magulang ng asawa ko. Akala ko magiging masaya kami ng anak ko na maka-bonding sila, pero konsumisyon pala.

Bawat kilos namin ay napupuna, maski sa pagluluto ng pagkain, dapat daw ay isama silang lahat. Eh maliit lang ang budget namin dahil maliit lang naman ang pinapadala ng asawa kong nasa abroad. Kung tutuusin, kulang na kulang iyon sa pag-aaral ng mga bata at panggastos namin. 

Napilitan kami ng mga anak ko na magbakasyon muna rito sa in-laws ko dahil bakasyon din ng mga bata.

Gusto ng asawa ko maka-bonding ng mga anak namin ang in-laws ko. Hirap na hirap talaga ako kung paano pakikisamahan ang in-laws ko. 

Doon ko na-realize na sobrang hirap pala talaga makisama, balak ko na sanang umuwi sa bahay namin. May sarili naman kaminb bahay sa Batangas habang sa

Laguna naman nakatira ang in-laws ko. Hindi ko naman maikuwento sa asawa ko na nahihirapan akong pakisamahan ang magulang niya. Kaya sinarili at kinikimkim ko na lang ang konsumisyong nararanasan ko.

Tama bang umuwi na kami ng mga anak ko sa sarili naming bahay? Hindi ko na kasi kaya ang ugali at pagtrato nila sa akin. Hihintayin ko ang payo n’yo.

Nagpapasalamat,

Dolor ng Batangas

---

Sa iyo, Dolor,

Lawakan mo pa ang pang-unawa mo, maging broad minded ka at matutong makisama sa ibang tao lalo na sa in-laws mo.

Kung hindi mo na talaga kaya ang ugali at pagtrato nila, tama lang na bumalik kayo sa sarili n’yong bahay kaysa mamatay ka sa konsumisyon dahil sa hindi magandang pagtrato nila sa iyo. 

Gaano na ba kayo katagal d’yan? Kung 2 weeks na kayo riyan, sapat na ‘yun upang maka-bonding ng mga anak mo ang mga kamag-anak nila. 

Huwag ka rin magpakita ng attitude sa kanila, pakisamahan mo pa rin sila, dahil ganyan talaga ang buhay.

Ang taong marunong magtiis at makisama  ay ginagantimpalaan ng langit.

Huwag kang mag-alala dahil nakatingin sa iyo ang  Diyos. May gantimpala kang makukuha kapag nalampasan mo ang pagsubok na iyan sa buhay mo.

Sumasaiyo,

Sister Isabel del Mundo