Huli na ng malaman… Bebot, ‘di gustong maikasal sa baklang fiancé

ni Sis. Isabel del Mundo @Mga Kuwento ng Buhay at Pag-ibig | September 11, 2024

Dear Sister Isabel,

Magandang araw sa inyo. Uumpisahan ko ang kuwento ng aking buhay mula nang makilala ko ang taong nagpatibok ng aking puso. Ka-boardmate ko siya, kaya naman palagi rin kaming nagkikita. Naging masaya naman kami dahil nagkakasundo kami sa lahat ng bagay hanggang sa natuklasan ko na may relasyon din pala sila ng professor niya. 

Bakla pala ang boyfriend ko. Umamin naman siya sa akin na bakla nga siya, pero hindi umano totoong boyfriend niya ang kanyang professor. 

Hindi ko na alam ang gagawin, mahal na mahal ko siya at parang ‘di ko kayang mawala siya sa buhay ko, pero ayoko naman magkaroon ng baklang asawa. 

Sa katunayan, may napagkasunduan na kami na next year magpapakasal na kami. 

Ano ba ang mabuti kong gawin, Sister Isabel? Naguguluhan at nahihirapan na akong magpasya. Sana ay gabayan n’yo ko. 

Nagpapasalamat, 

Mercy ng Makati

---

Sa iyo, Mercy,

Kung talagang mahal na mahal mo siya at hindi mo kayang mawala siya sa buhay mo, eh ‘di tanggapin mo kung ano talaga siya. Love him for what he is. 

Ang pag-ibig ay mahiwaga, galing sa puso iyan na hindi kayang dedmahin. Huwag mong pansinin ang sinasabi ng iba, dahil ang mahalaga ay mahal mo siya at mahal ka niya.

Tungkol naman sa boyfriend niyang professor, ‘di ba siya na rin mismo ang nagsabi na hindi totoo ‘yun? Kaya wala kang dapat ipag-alala. 

Huwag mong sikilin ang iyong damdamin. Bagkus, ituloy mo ang pagmamahalan n’yo. Marami akong kilalang bakla ang napangasawa, at nagkaroon ng maligaya pamilya.

Hanggang dito na lang, pagpalain nawa kayo ng Dakilang Kataas-taasan.

Sumasaiyo,

Sister Isabel del Mundo

Babaneng todo-iwas sa lalaking may sabit, wa’ magagawa dahil itinakda ng kapalaran

ni Sis. Isabel del Mundo @Mga Kuwento ng Buhay at Pag-ibig | September 9, 2024

Dear Sister Isabel,

Unang-una sa lahat, nawa ay nasa maayos kayong kalagayan kapiling ang inyong mga mahal sa buhay.

Uumpisahan ko ang pagbabahagi ng aking kuwento mula nang magtrabaho ako sa abroad. Sa Korea, kung saan ako nagtrabaho, ru’n ko nakita ang lalaking kapwa ko Pilipino. 

Isa siyang seaman, at nag-stop over ang barko nila sa Korea. Pero sa kasamaang palad, bigla na lamang siyang isinugod sa ospital dahil pumutok na umano ang sakit niyang appendicitis. Dahil wala siyang kaanak du’n, nakiusap siya sa akin na kung maaari ako muna ang magbantay sa kanya. 

Actually, kapitbahay ko siya sa ‘Pinas at mag-childhood sweetheart kami, pero iba ang nakatuluyan niya. 

Sa madaling salita, muli kaming pinagtagpo ng tadhana. Paglabas niya ng ospital, agad siyang pinauwi sa ‘Pinas, at nagkataon pang tapos na rin ang contract ko sa Korea. 

Pag-uwi namin sa ‘Pinas, todo-iwas ang ginawa ko sa kanya dahil isa na siyang pamilyadong lalaki. Pero, ayaw niya akong tantanan. Ang hirit pa niya sa akin ay puwede naman umano naming ilihim ang aming relasyon. 

Hirap na hirap na ako sa ginagawa kong pag-iwas sa kanya, dahil mahal ko rin siya, at para bang ‘di ko na kayang pigilan pa ang aking nararamdaman. 

Ang sabi pa niya, hindi raw sila kasal ng asawa niya, kaya ‘di raw masasabing isa akong kabit. 

Sister Isabel, inamin niya rin sa akin na ako ang tunay niyang mahal mula nu’ng kami’y mga bata pa. Natupad na raw niya lahat ng kanyang pangarap, at isa na lang ang hindi pa, iyon ay ang makasama ako habambuhay. 

Ano ang gagawin ko? Mahal na mahal ko rin siya. Sa katunayan, siya lang talaga ang hinihintay kong bumalik sa buhay ko. At ngayon nga'y naganap na, dapat ba akong pumayag sa gusto niya na ituloy ang relasyon namin? Hihintayin ko ang payo n’yo.

Nagpapasalamat, 

Josephine ng Tarlac

---

Sa iyo, Josephine,

Sa biglang tingin ay parang napakahirap solusyunan ng problema mo, pero kung talagang susuriing mabuti, makikita natin na siya talaga ang destiny mo. Kaya kahit may kinakasama na siya, muli pa rin kayong pinagtagpo ng kapalaran. Dahil diyan, kahit ano’ng iwas mo, wala kang magagawa dahil kayo ang nakatakdang magsama habambuhay.

Ang pinakamabuti mong gawin, tutal hindi naman pala siya kasal at hindi naman talaga niya mahal ang kanyang kinakasama, huwag n’yong sikilin ang inyong damdamin, dahil anumang iwas ang gawin n’yo, wala pa rin kayong magagawa dahil kayo ang itinakda ng tadhana. 

Mahirap hadlangan ang tinatawag na destiny, at sabihin mo sa kanya na ‘wag na ‘wag niyang pababayaan ang kanyang pamilya, lalung-lalo na ang kanyang mga anak.

Sundin mo na ang tibok ng iyong puso, dahil kapalaran na mismo ang kumikilos upang muli kayong pagtagpuin. 

Sige na, huwag mo nang sikilin ang iyong damdamin, bagkus sundin mo na lang ang itinitibok ng iyong puso para matupad na rin ang pangarap n’yo.

Hangad ko ang kaligayahan mo sa piling ng lalaking pilit mong iniiwasan.

Sumasaiyo,

Sister Isabel del Mundo

Want na, pero ‘di pa stable? Mga responsibilidad na dapat malaman bago mag-baby

ni Mabel Vieron @Lifestyle | September 4, 2024

Isa ka rin ba sa napapasana-all sa tuwing nakakakita ng mga baby na super-cute? Kung isa ka sa kanila, naku mahal ang gatas at diaper, besh! Char! 

Ang ideya ng pagiging magulang ay puno ng saya at pananabik, ngunit hindi maikakaila na ito ay may kasamang seryosong responsibilidad. Yes, mga besh! Hindi naman porke, nag-crave ka magkaroon ng beybi, gagawa at gugustuhin mo na agad ito, oks? Huwag na natin idamay pa ang mga bata sa ating mga kalokohan, tapos ang ending sa mga magulang din natin iaasa ang mga responsibilidad. 

Ang pagkakaroon ng beybi ay isang seryoso at 'di dapat ginagawang laro. 

Pero kung ready ka na talaga, at alam n'yo sa sarili n'yong kayang-kaya n'yo na ang bumuhay, why not? 

Para sa mga handa nang sumabak sa pagbuo ng pamilya, mahalagang malaman ang mga aspeto ng pagiging magulang. 

Sa artikulong ito, tatalakayin natin ang limang pangunahing responsibilidad na kailangan isaalang-alang upang maging handa. Kaya halina't basahin natin ito. 

1. EMOSYONAL NA PAGHAHANDA. Ang pagiging magulang ay hindi lamang pisikal na pagsasanay. Maglaan ng oras upang maghanda sa mga emosyonal na aspeto ng pagpapalaki ng anak. Maging handa sa mga ups and downs ng parenthood, at magtayo ng support system. Ang pagkakaroon ng bukas na komunikasyon sa partner at pag-aalaga sa sariling mental health ay susi sa matagumpay na pagpapalaki. Kuha mo? 

2. PINANSYAL NA PAGPAPLANO. Isa itong susi upang 'di lumaking kawawa ang inyong anak. Maganda rin ito para sa kinabukasan ng inyong magiging beybi. 

Ang pagbuo ng pamilya ay nangangailangan ng pinansyal na pagpaplano. Hindi lamang para sa pang-araw-araw na pangangailangan, kundi pati na rin sa mga hindi inaasahang gastos. 

Maglaan ng budget for medical, education, at iba pang mahahalagang aspeto. Huwag kalimutang mag-set up ng emergency fund at long-term savings para sa seguridad ng pamilya. Oki? 

1. PAGHAHANDA SA PHYSICAL NA ASPETO. Ang pagiging magulang ay may mga pisikal na hamon. Maging handa sa mga pagbabago sa iyong katawan at pangkalahatang kalusugan. Siguraduhin na ang iyong lifestyle ay nakakatulong sa magandang kalusugan, tulad ng tamang pagkain, regular na ehersisyo, at sapat na pahinga. 

Ang pagiging physically fit ay makakatulong sa iyo na maharap ang mga demands ng parenthood nang may lakas at sigla.

1. BALANSENG PAMUMUHAY. Sa hectic na lifestyle, ang tamang time management ay mahalaga. 

Maglaan ng oras para sa trabaho, pamilya, at personal na interes. Ang pagkakaroon ng balanseng pamumuhay ay magbibigay-daan sa inyo upang mas maayos na pamahalaan ang mga tungkulin sa bahay at magkaroon ng quality time sa iyong mga mahal sa buhay. 

Gumamit ng mga tools at techniques sa pag-o-organize ng oras upang maging mas epektibo sa iyong araw-araw na gawain.

1. PAGHAHANDA SA KINABUKASAN. Ang pagbuo ng pamilya ay hindi nagtatapos sa mga unang taon. 

2. 
   

Mag-isip tungkol sa pangmatagalang plano para sa kinabukasan ng iyong mga anak, at magiging anak. 

Isaalang-alang ang kanilang edukasyon, pangmatagalang layunin, at mga potensiyal na pagbabago sa buhay. 

Ang pagkakaroon ng malinaw na plano at layunin ay makakatulong sa pagbigay ng direksyon at seguridad sa kanilang paglaki.

Ang pagiging magulang ay isang makabuluhang hakbang na puno ng saya at responsibilidad. 

Sa pamamagitan ng tamang paghahanda at kaalaman, magagawa mong ihandog ang pinakamagandang simula para sa iyong pamilya. Huwag matakot sa mga hamon—yakapin ang bawat aspeto ng pagiging magulang at gawing matagumpay at masaya ang iyong paglalakbay. Ang bawat hakbang na iyong gagawin ngayon ay magbibigay sa iyo ng matibay na pundasyon para sa kinabukasan ng iyong pamilya. Okie ba mga Ka-BULGAR?