Kahulugan ng gorilya at kinagat ng langgam

ni Estrellia de Luna @Panaginip gabay ng buhay | October 16, 2023

Analisahin natin ang panaginip na ipinadala ni Ben ng Pangasinan.

Dear Maestra,

Napanaginipan ko na namasyal ako sa bagong zoo, nalibang ako nang husto sa iba’t ibang hayop na nakita ko. Ang pinakagusto ko ay ‘yung gorilya. Binigyan ko ito ng mansanas upang kainin niya. Ngunit, ‘di ko namalayan, may mga langgam pala sa paanan ko, at kinagat ako nito.

Ano'ng ibig sabihin ng panaginip ko?

Naghihintay,

Ben

Sa iyo, Ben,

Ang ibig sabihin ng panaginip mo na namasyal ka sa zoo, nalibang ka nang husto sa iba’t ibang hayop, ay

makakaranas ka ng mga pagtitiis sa kasalukuyan mong hanapbuhay. Dadaan ka sa matinding kahirapan subalit ang lahat ng iyan ay malalampasan mo rin, ganap mo ring makakamit ang iyong tagumpay. Yayaman at kikilalanin ka rin sa inyong lugar.

Ang gorilya na siya mong pinakagusto sa lahat, ay nagpapahiwatig na ihanda mo ang iyong sarili sa hindi inaasahang kabiguan, dahil mabibigo ka sa kasalukuyan mong pinagkakaabalahan.

Ang binigyan mo ng mansanas ang gorilya para kainin niya, ay pansamantala lamang ang kabiguang mararanasan mo, dahil sa bandang huli, malalampasan mo rin ito.

Samantala, 'di mo namalayan na may mga langgam sa paanan mo at kinagat ka, ito ay babala na magkakaproblema ka sa pera. Dapat kang magtrabaho nang husto upang makaipon ka ng perang maipapadala mo sa iyong pamilya.

Matapat na sumasaiyo,

Maestra Estrellia de Luna

Tanda na sa kabila ng katakut-takot na paghihirap, makakamit din ang pinapangarap

ni Estrellia de Luna @Panaginip gabay ng buhay | October 15, 2023

Analisahin natin ang panaginip na ipinadala ni Delfin ng Caloocan.

Dear Maestra,

Napanaginipan ko na may malaking puno sa aming bakuran. Kaya lang, tuyot na ang mga sanga nito at lanta na ang mga dahon.

Nang lapitan ko ito may natanaw akong bahay ng bubuyog. Kukunin ko na sana ‘yung honey nang biglang dumating ‘yung mga bubuyog na namamahay ru’n.

Sinugod ako ng mga ito, tumakbo ako nang mabilis para makaiwas.

Ano’ng ibig sabihin ng panaginip ko?

Naghihintay,

Delfin

Sa iyo, Delfin,

Ang ibig sabihin ng panaginip mo na may malaking puno sa bakuran n’yo, pero tuyot na ang mga sanga at dahon, ito ay babala na makakaranas ka ng paghihirap sa buhay.

Magiging mailap sa iyo ang pagyaman kaya doblehin mo pa ang pagsisikap.

Ang may natanaw kang bahay ng bubuyog, ito ay paalala na kailangan mo magtrabaho at magsumikap upang makamit mo ang iyong pinapangarap.

Ang biglang dumating ang mga bubuyog, hinabol ka ng mga ito, tumakbo ka para makaiwas ay nagpapahiwatig na bagama’t dumaranas ka ng katakut-takot na paghihirap sa iyong pamumuhay, sa bandang huli ay makakamit mo rin ang iyong pinakaaasam-asam na pangarap.

Matapat na sumasaiyo,

Maestra Estrellia de Luna

Kahulugan ng paniki at buwaya

ni Estrellia de Luna @Panaginip gabay ng buhay | October 14, 2023

Analisahin natin ang panaginip ni Dondon ng Pasay City.

Dear Maestra,

Napanaginipan ko na nasa liblib na pook ako. May dala umano akong pana, nang may nakita akong buwayang papalapit sa akin. Pinana ko ang buwaya, tinamaan ito at kalaunan ay namatay. Maya-maya ay may dumating na mga paniki na nagliliparan sa paligid.

Ano’ng ibig sabihin ng panaginip ko?

Naghihintay,

Dondon

Sa iyo, Dondon,

Ang panaginip mo na nasa liblib na pook ka, may dala kang pana, pinana mo ang buwayang papalapit sa iyo, tinamaan mo ito at namatay, ito ay nangangahulugang makakamit mo ang matagal mo nang pinapangarap sa buhay.

Samantala ang buwaya ay nagpapahiwatig na may lihim kang kaaway kaya dapat ka ring mag-ingat at talasan mo ang iyong pakiramdam.

Ang mga paniki naman na nagliliparan sa paligid ay senyales na may mahigpit kang karibal sa puso ng iyong minamahal, mapanganib at traydor siya. Maging mapagmatyag at lagi kang mag-ingat.

Matapat na sumasaiyo,

Maestra Estrellia de Luna