Tanda na may bagong pag-ibig na darating

ni Estrellia de Luna @Panaginip gabay ng buhay | November 10, 2023

Analisahin natin ang panaginip na ipinadala ni Rosy ng Tarlac.

Dear Maestra,

Napanaginipan ko na kinuha ko ang apron para makapagluto. Kahit na marumi ito, sinuot ko pa rin ang apron. Butas din pala ito kaya tinahi ko muna nang bigla kong marinig ang iyak ng alaga kong baby kaya pinuntahan ko agad ito. May nakita akong lobo sa kwarto niya, kung kaya pinalipad ko ito. Tumigil na siya sa pag-iyak nang makita niyang pinalipad ko ang lobo at tumawa siya nang tumawa.

Ano ang ibig sabihin ng panaginip ko?

Naghihintay,

Rosy

Sa iyo, Rosy,

Ginamit mo ang apron kahit na marumi, ito ay nangangahulugan na magkakaroon ka ng mga bagong damit. Ang tinahi mo ang punit na apron, ay tanda na may bagong pag-ibig na darating sa buhay mo. Magkakagusto siya sa iyo, at liligawan ka niya.

Samantala, ang nadinig mong umiyak ‘yung alaga mong bata kaya pinuntahan mo ay nagpapahiwatig na may mga pagsubok sa iyong buhay at makakaranas ka ng kapighatian.

Ang tumigil siya sa pag-iyak nang makita niya ‘yung lobo, ay sign na may mga kaibigan kang maaasahan sa sandali ng kagipitan. Kaya huwag kang malungkot dahil may mga kaibigan ka na nagmamahal pa rin sa iyo.

Matapat na sumasaiyo,

Maestra Estrellia de Luna

Babala na mabibigo sa pag-ibig

ni Estrellia de Luna @Panaginip gabay ng buhay | November 9, 2023

Analisahin natin ang panaginip na ipinadala ni Loreto ng Pasay City.

Dear Maestra,

Napanaginipan ko na nakatanggap ako ng liham, natawa ako ng malakas nang mabasa ko ang nilalaman nito, kaya kumuha agad ako ng papel para sagutin ito.

Ano ang ibig sabihin ng panaginip ko?

Naghihintay,

Loreto

Sa iyo, Loreto,

Ang ibig sabihin ng panaginip mo na nakatanggap ka ng liham ay makakatanggap ka rin ng hindi inaasahang magandang balita galing sa kaibigan mo na nagtatrabaho sa malayong lugar. Ito rin ay nagpapahiwatig na may matatanggap kang regalo.

Ang kumuha ka ng papel para sagutin ang sulat na natanggap mo, ito ay nangangahulugan na may gagawin kang magandang bagay na ikakatuwa ng taong nasa paligid mo.

Samantala, ang natawa ka ng malakas nang mabasa mo ang nilalaman ng liham ay senyales na mabibigo ka sa pag-ibig. Ito rin ay paalala na iwasan mong magbitiw ng masasakit na salita kapag kausap mo ang iyong karelasyon dahil maaari siyang masaktan sa mga sasabihin mo na puwede rin maging sanhi ng inyong ‘di pagkakaunawaan at tuluyang paghihiwalay.

Matapat na sumasaiyo,

Maestra Estrellia de Luna

Sign na makakapag-asawa ng mayamang lalaki

ni Estrellia de Luna @Panaginip gabay ng buhay | November 8, 2023

Analisahin natin ang panaginip na ipinadala ni Donita ng Masbate.

Dear Maestra,

Napanaginipan ko na bibigyan ako ng award sa barangay namin. Bumili ako ng alahas na may batong perlas, at ‘yun ang isinuot ko noong awarding. Ngunit, ang sinabit sakin ay isang laurel.

Ano ang ibig sabihin ng panaginip ko?

Naghihintay,

Donita

Sa iyo, Donita,

Ang ibig sabihin ng batong hiyas na perlas ay karangalan, kaligayahan at kayamanan dahil sa iyong angking talino at kasipagan sa pagtatrabaho.

Tamang-tama ang panaginip mo na nakatanggap ka ng award sa barangay n’yo. Ito rin ay nagpapahiwatig na makakapag-asawa ka ng mayaman at tinitingalang lalaki sa lipunan.

Samantala, ang laurel naman ay nagpapahiwatig ng tagumpay, kaginhawahan at kalayaan sa buhay. Ito rin ay senyales ng maligayang pag-aasawa sa lalong madaling panahon at pagkakaroon ng anak na magbibigay sa inyo ng karangalan at kaligayahang hindi matutumbasan.

Matapat na sumasaiyo,

Maestra Estrellia de Luna