Kahulugan ng baka at nabanlian ng kumukulong sabaw

ni Estrellia de Luna @Panaginip gabay ng buhay | November 13, 2023

Analisahin natin ang panaginip na ipinadala ni Sonia ng Cebu.

Dear Maestra,

Napanaginipan ko na bumili ako ng baka at agad ko itong pinakuluan pagdating sa bahay.

Makalipas ang 15 minuto, titingnan ko sana kung malambot na ito nang bigla akong

mabanlian ng kumukulong sabaw. Tinikman ko ito, ngunit ang sabaw nito ay mapait.

Ano ang ibig sabihin ng panaginip ko?

Naghihintay,

Sonia

Sa iyo, Sonia,

Ang bumili ka ng baka at pinakuluan mo agad, ito ay nagpapahiwatig ng kasaganahan at kapanatagan sa buhay. Pero, hindi naman ibig sabihin nito ay ‘yung mayamang-mayaman, katamtaman lang at hindi sobrang yaman ang magiging buhay mo.

Ang nabanlian ka ng kumukulong sabaw ay nangangahulugan ng tagumpay sa iyong mga pinaplano sa buhay. Kung masyado kang apektado sa iyong balat, ito ay senyales na malalampasan mo lahat ng pagsubok na darating sa buhay mo. Mapapasaiyo ang tagumpay at pagpapala sa darating na mga araw.

Samantala, ang pait ng sabaw, ito ay babala na mag-ingat ka sa pakikisalamuha sa mga taong ‘di mo kakilala. May banta ng gulo sa buhay mo, talasan mo ang iyong pakiramdam at maging alerto ka sa lahat ng oras upang ‘di ka mapahamak.

Matapat na sumasaiyo,

Maestra Estrellia de Luna

Kahulugan ng naglaro ng billiard at natalo

ni Estrellia de Luna @Panaginip gabay ng buhay | November 12, 2023

Analisahin natin ang panaginip na ipinadala ni Gio ng Pila, Laguna.

Dear Maestra,

Napanaginipan ko na naglalaro kami ng billiard ng pinsan ko. Kasali kami sa tournament, natalo kami kaya ako ang sinisi niya. Ako umano ang dahilan ng aming pagkatalo pero sa katunayan, siya naman talaga ang may kasalanan kung bakit kami natalo.

Ano ang ibig sabihin ng panaginip ko?

Naghihintay,

Gio

Sa iyo, Gio,

Ang ibig sabihin ng panaginip mo na naglaro kayo ng billiard at sumali kayo sa tournament, ay babala na kung hindi ka mag-iingat sa bawat kilos at pananalita mo, maaari kang madamay sa gulo. May nakaambang gulo r’yan sa paligid n’yo.

Samantala, ang sinisi ka ng pinsan mo dahil natalo kayo sa tournament pero siya naman talaga ang may kasalanan, ito ay senyales na maiiwasan mo ang mga kaaway mo, hindi ka nila magagapi. Sa halip, makikita mo pa ang kanilang pagbagsak.

Matapat na sumasaiyo,

Maestra Estrellia de Luna

Sign na yayaman at pagpapalain sa buhay

ni Estrellia de Luna @Panaginip gabay ng buhay | November 11, 2023

Analisahin natin ang panaginip na ipinadala ni Ronnie ng Pampanga.

Dear Maestra,

Napanaginipan ko na may malaking memorial arch na ginagawa rito sa lugar namin.

Naglakad at dumaan ako sa ilalim nito, at nu'ng makalampas ako may nakasalubong akong iba’t ibang uri ng mga hayop.

Ano ang ibig sabihin ng panaginip ko?

Naghihintay,

Ronnie

Sa iyo, Ronnie,

Ang ibig sabihin ng malaking memorial arch ay magtatagumpay ka dahil sa iyong sipag at tiyaga. Ang naglakad at dumaan ka sa ilalim ng memorial arch ay nagpapahiwatig na makakaranas ka ng kabiguan at mga pagsubok sa buhay pero sa dakong huli, malalampasan mo rin ito at tuluy-tuloy na pagpapalain at magtatagumpay sa buhay.

Samantala, ang may nakasalubong kang iba’t ibang uri ng hayop, ito ay nangangahulugan na marami kang sakripisyo at paghihirap sa buhay pero ang lahat ng ito ay iyo pa ring mapagtatagumpayan. Mapapasaiyo pa rin ang mga biyaya at pagpapala. Yayaman at pagpapalain ka na sa dakong huli.

Matapat na sumasaiyo,

Maestra Estrellia de Luna