Pahiwatig na yayaman at uunlad na sa buhay

ni Maestra Estrellia de Luna @Panaginip Gabay ng Buhay | July 26, 2024

Analisahin natin ang panaginip na ipinadala ni Rose ng Malate, Manila.

Dear Maestra,

Napanaginipan ko na nakadungaw ako sa bintana, nang biglang umambon. Nabasa ang bintana namin, kaya naman agad akong kumuha ng basahan para punasan ito. Pero ilang saglit lang, may bahaghari namang lumitaw sa langit.

Naghihintay,

Rose

---

Sa iyo, Rose,

Ang ibig sabihin ng panaginip mo na nakadungaw ka sa bintana, at biglang umambon ay kaligayahan at kasaganahan sa buhay. Liligaya, at matatapos na magbibigat mong problema.

Ang kumuha ka ng basahan, at pinunasan mo ang bintana ay nagpapahiwatig na mula sa pagiging mahirap, susuwertehin at pagpapalain ka na. 

Samantala, ang bahagharing lumitaw ay nangangahulugan na malaking pagbabago ang magaganap sa buhay mo. Huwag kang mag-alala dahil ang pagbabagong iyan ay maganda, at hindi pangit. Uunlad na ang kabuhayan mo, at tuluy-tuloy na yayaman ang pamilya mo. Bubuhos na rin ang mga biyayang mapapasakamay n’yo.  

Matapat na sumasaiyo,

Maestra Estrellia de Luna

Iba’t ibang kahulugan ng oak tree

ni Maestra Estrellia de Luna @Panaginip Gabay ng Buhay | July 24, 2024

Analisahin natin ang panaginip na ipinadala ni Bernabe ng Sampaloc, Manila.

Dear Maestra,

Napanaginipan ko na nasa ibang bansa ako. May nakita akong oak tree, at pumunta ako roon. 

Ano ang ibig sabihin ng panaginip ko?

                                                                                                                Naghihintay,

        Bernabe

---

Sa iyo, Bernabe,

Ang ibig sabihin ng oak tree sa iyong panaginip ay paglago ng iyong kabuhayan, magandang koneksiyon sa pamilya, pagkakaroon ng mababait at maaasahang mga kaibigan. Subalit, kung lanta na ang mga dahon sa oak tree, ito ay babala na magiging maiilap ang iyong buhay. Maraming kalungkutan ang iyong daranasin, pati ang iyong pag-unlad ay matatagalan din. 

Samantala, ang taniman ay nagpapahiwatig na makakapag-asawa ka ng mabait, mapagmahal at maalalahaning katuwang sa buhay. Ito rin ay nangangahulugan na susuwertehin ka sa iyong paglalakbay patungo sa iyong hinaharap.

Matapat na sumasaiyo,

Maestra Estrellia de Luna

Kahulugan ng luma at nakakatakot na bahay

ni Maestra Estrellia de Luna @Panaginip Gabay ng Buhay | July 23, 2024

Analisahin natin ang panaginip na ipinadala ni Jerico ng Zambales.

Dear Maestra,

Napanaginipan ko na naging katulong ako sa luma at nakakatakot na bahay. Pagpasok ko sa kusina, may nakita akong dalawang anino. ‘Yung isa ay parang demonyo, habang ‘yung isa naman ay kamukha ni Satanas. Makalipas ang ilang saglit, bigla na lang akong nagising, takot na takot ako, at nanunuyo ang aking lalamunan.

Ano ang ibig sabihin ng panaginip ko?

Naghihintay,

Jerico

---

Sa iyo, Jerico,

Ang ibig sabihin ng panaginip mo na naging katulong ka ay may makikilala kang maimpluwensiyang tao. 

Ang lumang bahay na nakakatakot ay babala na mapapaaway ka. Ito rin ay paalala na kakapusin ka sa kuwarta, o di kaya naman ay mapipilitan kang mangutang.

Ang demonyo at satanas na nakita mo sa kusina ay senyales na masasangkot ka sa kaguluhan, dahil sa masamang hilig mo sa katawan at pa-easy-easy lang kung mamuhay na para bang walang pakialam sa mundo.

Samantala, ang dalawang anino ay nagpapahiwatig ng intuition, vision at vibration. Ito rin ay tanda na fickle minded ka, paiba-iba ang iyong desisyon. Kaya ang payo sa iyo, kung ano ang una mong desisyon, huwag mo na itong baguhin pa upang mas gumanda ang takbo ng iyong buhay. Kung babaguhin mo ito, tiyak na hindi magiging maganda ang kahihinatnan.

Matapat na sumasaiyo,

Maestra Estrellia de Luna