Iba’t ibang kahulugan ng sikat ng araw

ni Maestra Estrellia de Luna @Panaginip Gabay ng Buhay | July 29, 2024

Analisahin natin ang panaginip na ipinadala ni George ng Masbate.

Dear Maestra,

Napanaginipan ko na inaabangan ko ang sikat ng araw. Gustung-gusto ko rin ang mag-swimming sa clubhouse namin, at enjoy na enjoy ako. 

Ano ang ibig sabihin ng mga panaginip ko?

Naghihintay,

George

---

Sa iyo, George,

Ang ibig ipahiwatig ng panaginip mo na palagi mong inaabangan ang sikat ng araw ay depende kung ano ang nakikita mo sa sikat ng araw. 

Kung sa panaginip mo ang ganda ng sikat ng araw, ito ay nagpapahiwatig ng tagumpay sa larangan ng pananalapi. Wala kang magiging problema sa pera. Tuluy-tuloy kang susuwertehin pagdating sa pampinansyal, gayundin sa pag-ibig, at magiging mapalad ka pa sa magiging karelasyon mo. 

Kung ang araw naman sa panaginip mo ay patindi nang patindi, at painit nang painit ang sinag, ito ay senyales na makakatanggap ka ng magandang balita. 

Kung papalubog, at madilim naman ang sikat ng araw, ito ay babala ng kaguluhan at hindi magandang pagbabago sa buhay.  

Samantala, ang enjoy na enjoy ka sa swimming pool ay depende rin ang ibig sabihin nito. 

Kung ang ulo mo ay nakalitaw habang nagsu-swimming, ito ay nangangahulugan na magtatagumpay ka sa lahat ng iyong plano sa buhay. 

Subalit, kung nakalubog naman sa tubig ang ulo mo habang nagsu-swimming, ito ay paalala na masasangkot ka sa kaguluhan. 

Matapat na sumasaiyo,

Maestra Estrellia de Luna

Iba‘t ibang kahulugan ng tubig

ni Maestra Estrellia de Luna @Panaginip Gabay ng Buhay | July 28, 2024

Analisahin natin ang panaginip na ipinadala ni Flor ng Pangasinan.

Dear Maestra,

Napanaginipan ko na naisipan kong pumunta sa dati kong iskul. Naligaw ako, pero kalaunan ay nakita ko rin ito. Pumasok ako sa room na may dalawang professor sa loob, laking gulat ko dahil pinabasa sa akin ‘yung report ko tungkol sa lesson namin kahapon. Hindi ko malaman kung paano ko ‘yun uumpisahan. Natataranta at napapahiya na ako ng mga oras na ‘yun kaya naman sa halip na basahin, nagpaalam ako na pupunta ako sa cr. 

Paglabas ko ng room, nakita kong hinihintay ako ng ex ko, ‘di ko siya pinansin at dumiretso ako sa cr. Paglabas ko, naghugas ako ng kamay, at nandu’n pa rin ex ko. Tinanong niya kung puwede pa umano kaming magkabalikan, at tumango naman ako sabay hawak sa kamay niya.

Ano ang ibig sabihin ng panaginip ko?

Naghihintay,

Flor

---

Sa iyo, Flor,

Ang ibig sabihin ng naisipan mong pumunta sa dati mong iskul at naligaw ka ay magkakaroon ng pagbabago sa mga nauna mong plano. Gayunman, matutupad mo rin ang binabalak mo.

Ang iskul ay nangangahulugan naman na maabot mo ang tagumpay. Kikilalanin at igagalang ka sa inyong lugar.

Ang dalawang professor ay nagpapahiwatig na pabagu-bago ang isip mo, at palagi kang nagdadalawang isip sa pagpapasya. Kaya ang payo sa iyo, kung ano ang una mong desisyon, iyon na ang ipatupad mo, at ‘wag mo na itong baguhin.

Ang napahiya ka sa professor mo dahil hindi mo malaman kung paano uumpisahan ang pinapabasa sa iyo ay babala na malalagay ka sa sitwasyong kakailanganin mo ang tulong ng iba para malampasan ito. 

Samantala, ang pumunta ka sa cr, at nakita mong inaabangan ka ng ex mo ay depende kung masaya ba ang mukha niya o hindi. Kung masaya ang mukha niya, ito ay senyales na mahal na mahal ka niya. Subalit kung siya ay malungkot, ito ay tanda na hindi ka niya gaanong mahal, at wala siyang balak pakasalan ka.

Ang naghugas ka ng kamay sa gripo ay depende sa tubig ang kahulugan nito. Kung malinaw ang tubig, ito ay nangangahulugan ng kasaganahan at kaligayahan. 

Pero kung malabo naman ang tubig, ito ay babala ng kasawiang palad. 

Ang hinawakan mo ang kamay ng ex mo ay sign na nag-aalala ka sa isang bagay na gumugulo sa isip mo. Hindi mo tuloy malaman kung tama ba ang desisyon mo. Pero ‘wag kang-alala dahil sa pagdaan ng mga araw, matatagpuan mo rin ang tamang pagpapasya.

Matapat na sumasaiyo,

Maestra Estrellia de Luna

Babala na 'di na makakapag-asawa

ni Maestra Estrellia de Luna @Panaginip Gabay ng Buhay | July 27, 2024

Analisahin natin ang panaginip na ipinadala ni Rosita ng Roxas City.

Dear Maestra,

Wala akong asawa pero madalas kong mapanaginipan na may asawa ako. Isa pa, madalas ko ring mapanaginipan ang honey, at gustung-gusto ko ilagay ito sa bawat kinakain ko.

Ano ang ibig sabihin ng mga panaginip ko?

Naghihintay,

Rosita

---

Sa iyo, Rosita,

Ang ibig sabihin ng panaginip mo na may asawa ka na ay kabaligtaran. Ito ay babala na ‘di ka na makakapag-asawa habambuhay. 

Sa kabilang dako, kung sa panaginip mo, umiibig ka sa asawa ng iba o sa madaling salita naging kabit ka, ito ay nangangahulugan na ‘di mo pinapansin ang lalaking kasalukuyang nagkakagusto sa iyo, at gagawin mo ang lahat para lang maiwasan siya.

Pero kung isa ka ng biyuda ngayon, ang ibig sabihin ng panaginip mo ay makakapag-asawa ka pa. Liligaya at sasagana pa ang iyong buhay mo sa piling ng iyong mapapangasawa.

Samantala, ang gusto mong lagyan ng honey ang bawat kinakain mo ay nagpapahiwatig na magtatagal pa ang buhay mo. Maabot mo rin ang tugatog ng tagumpay, lalung-lalo na pagdating sa negosyo. 

Matapat na sumasaiyo,

Maestra Estrellia de Luna