Kahulugan ng anino at satanas

ni Maestra Estrellia de Luna @Panaginip Gabay ng Buhay | August 29, 2024

Analisahin natin ang panaginip na ipinadala ni Roberto ng Masbate.

Dear Maestra,

Napanaginipan ko na may anino akong nakita sa loob ng kuwarto ko. Natakot ako dahil kamukha iyon ni Satanas. 

Muntik na akong bangungutin, mabuti na lang ay nagising ako. 

Ano ang ibig sabihin ng panaginip ko?

Naghihintay,

Roberto

---

Sa iyo, Roberto,

Ang ibig sabihin ng panaginip mo na may nakita kang anino sa loob ng kuwarto mo ay magkakaroon kayo ng ‘di pagkakaunawaan ng bestfriend mo, hanggang sa mauwi ito sa away. Ito rin ay nangangahulugan na mapipilitan kang  mangutang ka sa lending app dahil sa kagipitan mo sa pera.

Samantala, ang natakot ka dahil kamukha iyon ni Satanas ay babala na masasangkot ka sa kaguluhan, dahil sa iyong bisyo at hindi magandang pag-uugali. Matuto kang magtimpi at ilagay sa tama ang iyong mga kilos upang ‘di ka mapahamak.

Matapat na sumasaiyo,

Maestra Estrellia de Luna

Kahulugan ng nagtrabaho sa factory at nanalamin sa ladies room

ni Maestra Estrellia de Luna @Panaginip Gabay ng Buhay | August 28, 2024

Analisahin natin ang panaginip na ipinadala ni Leony ng Ilocos Sur.

Dear Maestra,

Napanaginipan ko na nagtatrabaho ako sa isang factory. Pumunta ako sa ladies room para magsalamin. Nu’ng una, mukha ko lang ang nakikita ko, pero makalipas ang ilang saglit, ang dami ko ng mukhang nakikita na hindi ko kilala. 

Ano ang ibig sabihin ng panaginip ko?

Naghihintay,

Leony

---

Sa iyo, Leony,

Ang ibig sabihin ng panaginip mo na nagtatrabaho ka sa isang factory ay matatapos na ang pag-aalala mo tungkol sa pera. Pero, pansamantala lamang ito, dahil ‘di rin magtatagal, muli ka na namang kakapusin sa panggastos.

Samantala, ang pumunta ka sa ladies room para magsalamin ay nangangahulugan na ang sikretong matagal mo nang itinatago ay mabibisto na ng iba. 

Ang may nakita kang iba't ibang mukha sa salamin na hindi mo naman kilala ay nagpapahiwatig na papalitan mo na ang dati mong trabaho. Hahanap ka na ng bagong  mapapasukan, bagong kapaligiran at bagong mga kaibigan.

Matapat na sumasaiyo,

Maestra Estrellia de Luna

Kahulugan ng malakas na pagsabog

ni Maestra Estrellia de Luna @Panaginip Gabay ng Buhay | August 27, 2024

Analisahin natin ang panaginip na ipinadala ni Jerome ng Roxas City.

Dear Maestra,

Napanaginipan ko na nakarinig ako ng malakas na pagsabog. Sinilip ko kung saan iyon nanggaling, at napag-alaman ko na malapit lang pala iyon sa bahay ko. Kaya naman napilitan akong umalis sa lugar na iyon para iligtas ang aking sarili. 

Ano ang ibig sabihin ng panaginip ko?

Naghihintay,

Jerome

---

Sa iyo, Jerome,

Ang ibig sabihin ng panaginip mo na nakarinig ka ng malakas na pagsabog ay pagbabago sa buhay mo. Ang naturang pagbabagong ay napakahalaga kaya dapat mong lawakan ang iyong isipan at manatiling positibo sa buhay. 

Ang sinilip mo kung saan nanggaling ang narinig mong pagsabog ay babala na mawawalan ka ng mga mahahalagang ari-arian. May posibilidad kang manakawan. 

Samantala, ang napilitan kang tumakas para iligtas ang sarili mo ay senyales na madadamay ka sa malaking kaguluhan, pero sa dakong huli, maliligtas ka pa rin sa matinding kapahamakan.

Matapat na sumasaiyo,

Maestra Estrellia de Luna