Malinaw ayon sa palad… Mag-asawang baon sa utang dahil sa luging negosyo, may chance pang umunlad

ni Maestro Honorio Ong - @Kapalaran ayon sa Palad | October 8, 2022

KATANUNGAN

1. May negosyo kaming tindahan sa poblacion. Noong una ay malakas ito at maganda ang aming kita, pero pagkalipas ng tatlong taon, unti-unti itong humina hanggang sa nalubog na kami sa utang. Sabi ng mister ko, magpalit kami ng negosyo kaysa hindi namin mabayaran ang aming mga utang na lalo pang lumalaki dahil sa interest.

2. Ang problema ko ay hindi ko alam kung ano’ng negosyo ang angkop sa amin dahil simula’t sapol, dalaga pa lang ako ay alam ko na ang pasikot-sikot tungkol sa tindahan, kaya ito pa rin ang gusto kong negosyo. Pero mapilit ang mister ko, sinabi niya na kung ayaw ko, kahit mag-isa siya ay magsisimula siya ng sariling negosyo. Ayaw ko naman ng ganu’n dahil nakasanayan ko na palagi kaming magkasama sa tindahan.

3. Ano ang negosyo na angkop sa amin upang mabayaran na namin ang aming mga utang? Sana ay mabasa n’yo rin ang guhit ng aking mga palad upang malaman kung makakarekober pa kami sa pagbagsak ng aming negosyo at kung makakabayad pa kami sa aming mga pagkakautang.

KASAGUTAN

1. Marife, ang mga produkto o negosyo ay may binabagayan ding zodiac sign. Sa kaso mo, dahil ikaw ay Capricorn na may elementong earth o lupa, bagay sa iyo ang mga produktong nanggagaling sa bunga ng lupa o sa mismong lupa. Halimbawa, ang mga produktong butil at agricultural products, gayundin ang lahat ng nahuhukay o nanggagaling sa ilalim ng lupa. Kaya kung magpapalit kayo ng produkto, upang umunlad at mas madaling lumago ang kabuhayan, isaalang-alang n’yo ang mga produktong may kaugnayan sa mga bagay na nabanggit.

2. Ang pag-aanalisang saglit lamang papangit ang kabuhayan at pagkatapos ay makakarekober din ay madali namang kinumpirma ng huminto, pero nagpatuloy sa pagguhit sa bagong direksyon ng Fate Line (Drawing A. at B. F-F arrow a.) na tinatawag din nating Career Line sa kaliwa at kanan mong palad.

3. Ito ay tanda na sa sandaling ipinatupad o ibinenta n’yo na sa inyong tindahan ang mga produktong nabanggit sa itaas, tulad ng nais ipahayag ng ikalawang Career Line (F-F arrow b.) na sumapo sa dating Career Line (arrow a.), sa ikalawang pagtatangka na magnegosyo at sa bagong kalakal na angkop sa zodiac sign mong Capricorn — ito ay ang mga agricultural products tulad ng palay, bigas at iba pang butil na kalakal at mga kalakal na prutas, lamang ugat at iba pang nahuhukay sa ilalim ng lupa — tuloy-tuloy na muling uunlad ang inyong kabuhayan.

DAPAT GAWIN

Ayon sa iyong mga datos, ang nasabing muling pagrekober ng kabuhayan ay nakatakdang maganap sa kalagitnaan ng taong 2023 at sa buwan ng Hunyo hanggang Hulyo. Kung ngayon ay baon kayo sa utang at maraming obligasyon na dapat bayaran, sa nasabing panahon at sa edad mong 55 pataas, unti-unti na kayong makakabayad sa mga pagkakautang, hanggang sa makamit ulit ang maunlad at masaganang pamumuhay.

Bebot na ‘di magiging bf ang crush dahil sa ibang guy nakalaan

ni Maestro Honorio Ong - @Kapalaran ayon sa Palad | October 5, 2022

KATANUNGAN

1. May crush ako ngayon at mahal na mahal ko siya. Ang problema, may girlfriend na siya at napapansin kong masaya naman sila, gayundin, masasabi kong bagay sila. Kababata at ka-barangay ko siya, kaya magkaibigan naman kami, pero sa halip na ako ang ligawan niya, sa ibang babae natuon ang pansin niya. At dahil may hitsura ang crush kong ito, mahusay magdala ng damit at laging malinis tingnan at habang tinitingnan mo siya ay lalong gumuguwapo, marahil ay ‘yun din ang dahilan kaya nagustuhan siya ng girlfriend niya.

2. Sa ngayon, aaminin ko na siya pa rin ang gusto kong maging first and last boyfriend at kahit may girlfriend na siya, hindi nagbabago ang pagtingin ko sa kanya. Mahal na mahal ko pa rin siya at kung totoo lang si Sta. Claus, hihilingin ko na bago mag-Pasko ay makasama ko ang lalaking ito kahit sandali. Kaya lang, alam kong imposible na itong mangyari dahil pag-aari na siya ng iba.

3. Sa inyong palagay, posible pa bang maging boyfriend ko siya at maaari rin bang nakaguhit siya sa aking palad? Para kasing ayaw kong makipagrelasyon kahit marami akong manliligaw kung hindi lang din siya ang magiging boyfriend ko.

KASAGUTAN

1. Sabi ni Maestro Honorio Ong, dalawa ang kaligayahan ng lover o mangingibig: Una, ang ipaalam sa kanyang iniibig na siya ay mahal niya. Pangalawa, ang malaman ng mangingibig na mahal din siya ng iniibig niya. Masiyahan ka na sa una —ang malaman niyang mahal mo siya dahil imposibleng makamit mo pa ang ikalawa dahil sabi mo nga ay may girlfriend na siya at masaya naman sila.

2. Kaya para maibsan ang iyong pananabik at kalungkutan, at bilang mangingibig ay lumigaya ka rin, walang masama kung ipapaalam mo sa iyong crush na mahal mo siya kahit may girlfriend na siya. Tapos, sabihin mo na rin sa kanya na ang kaligayahan niya sa piling ng kanyang girlfriend ay kaligayahan mo na rin. Sa ganyang uri ng pag-ibig na dalisay at wagas talaga, halimbawang maghiwalay sila ng girlfriend niya, posibleng sa iyo naman mabaling o matuon ang pagmamahal niya.

3. Kapansin-pansin ang medyo maliit na bilog sa Heart Line (Drawing A. at B. h-h arrow a.) sa kaliwa at kanan mong palad. Ito ay malinw na tanda na manaka-nakang frustration o kabiguan sa pag-ibig, na nagsasabi ring hindi mo makakarelasyon ang kasalukuyan mong minamahal o crush. Gayunman, pansinin mo ang kaisa-isang Marriage Line (Drawing A. at B. 1-M arrow b.) sa kaliwa at kanan mong palad. Ito ay tanda sa taong ito ng 2022, sa buwan ng Nobyembre hanggang Disyembre at sa edad mong 23 pataas, magkaka-boyfriend ka na rin at ang lalaking ito ang iyong mapapangasawa at makakasama habambuhay. Gayundin, ang kasalukuyan mong crush na may girlfriend na ay magiging bahagi na lang ng isa sa masasaya mong alaala ng nakaraan sa lalaking minsang tinangi at minahal mo.

MGA DAPAT GAWIN

1. Habang, ayon sa yong mga datos, Alaiza, sa taong kasalukuyan, tulad ng nasabi na, magkaka-boyfriend ka, ngunit hindi ang kasalukuyan mong crush. Sa halip, isang lalaking kakilala mo na rin sa kasalukuyan na nagtataglay ng zodiac sign na Libra.

2. Siya na rin ang iyong mapapangasawa sa taong 2024, sa edad mong 25, at ang nasabing pag-aasawa ay may pangako ng maligaya at panghabambuhay na pagpapamilya (Drawing A. at B. 1-M arrow b.).

Seloso at mahigpit na bf, ‘di makakatuluyan

ni Maestro Honorio Ong - @Kapalaran ayon sa Palad | October 3, 2022

KATANUNGAN

1. Noong hindi pa ako nagkaka-boyfriend, naiinip ako dahil akala ko ay masaya ang experience na ‘yun, pero nagkamali ako. Mula nang magka-boyfriend ako, palagi niya akong hinihigpitan, mas mahigpit pa siya sa mga magulang ko at super-seloso niya. Wala pang isang taon ang relasyon namin, pero feeling ko ay sinasakal niya na ako at gusto ko nang makalaya. Sinabi ko na masama ang loob ko sa kanya at gusto kong makipag-cool off.

2. Ang problema, ayaw niyang pumayag at kung ano-ano ang mga sinasabi niya. Sabi niya, siguro ay totoo ang hinala niya na may iba akong boyfriend. Napakasarado kasi ng isip niya at hindi tumatanggap ng paliwanag. Kaya ang nangyari, tanggap man niya o hindi ang pakikipag-cool off, hindi ko na sinasagot ang mga text at tawag niya at kapag pumupunta siya sa amin ay hindi ako bumababa. Hanggang sa nakatanggap ako ng sulat mula sa kanya, humihingi siya ng sorry at sinabing mahal na mahal niya ako at magbabago na siya.

3. Gusto kong malaman kung dapat ko pa bang tanggapin ulit ang lalaking ito o sagutin ko na ang iba kong manliligaw? Nasa guhit din ba ng palad ko na siya na ang nakatakda sa akin o may iba pang lalaki akong makakatuluyan?

KASAGUTAN

1. Naalala ko ang sermon ng pari nang magsimba ako. Sabi niya, “Hindi natin nararamdaman o napapansin na napakaraming biyaya na bigay sa atin ng Diyos. Katulad ng buhay o life, ito ay biyaya na dapat nating ingatan at pakinabangan nang husto.” Ibig sabihin, mahalin mo ang buhay na bigay sa iyo ng Diyos, ‘wag mong aabusuhin at gamitin mo ito sa isang produktibo at kapaki-pakinabang na gawain.

2. Ang time, oras o panahon ay isa ring biyaya, pero ang mga tamad ay inaaksaya ang oras o panahon na ibinigay ng Diyos. Ang dapat nating gawin ay sinupin ang mga oras at panahong ito na isang klase rin ng biyaya o grasya ng Diyos. Pero na-touch talaga ako nang sabihin ng pari na ang mga magulang ay biyaya ng Diyos para sa mga anak. Kaya lang, kadalasan ay mga magulang pa ang tila kontrabida sa buhay ng mga teenager na anak. Madalas kasi na ang mga magulang ang pumipigil sa mga anak na sumama sa barkada. Hindi nababatid ng mga kabataang ito na kaya naghihigpit ang mga magulang ay dahil iniingatan sila nito at mahal na mahal sila.

3. Sabi pa ng pari, ang mga anak ay biyaya ng Diyos para sa mga magulang. Kaya dapat namang mahalin ng mga magulang ang kanilang mga anak. Sa kabilang banda, ang mga kapatid ay biyaya rin, pero minsan, ang magkakapatid ay madalas matagpuang nag-aaway.

4. Ang hindi nabanggit ng pari ay ang mga karelasyon ay biyaya rin ng Diyos, kaya habang may karelasyon ka, mahalin mo siya tulad ng pagmamahal mo sa iyong sarili. Ingatan at ipaglaban mo siya, sapagkat binigyan ka ng biyaya ng Diyos na magkaroon ng kasintahan, samantalang ang ibang teenager d’yan, kahit ano’ng pagpapalandi o panliligaw ang gawin ay hindi nagkakaroon ng karelasyon. Samakatuwid, ikaw na may karelasyon, mahalin, ingatan at respetuhin mo siya, sapagkat siya ay biyaya ng Diyos para sa iyo.

5. Kaya kapag nakaharap mo ang karelasyon mo matapos mong basahin ang artikulong ito, yakapin at pasalamatan mo siya at sabihing, “Ikaw ay biyaya sa akin ng Diyos na nagbibigay ng suwerte at kaligayahan – salamat sa iyo!”

6. Samantala, Abigail, dahil nagkataong ang biyaya mo, tulad ng boyfriend mo ay walang kakuwenta-kuwenta dahil sa pagiging seloso at demanding, tama lang ang iyong desisyon na palayain siya. Ito rin ang nais sabihin ng medyo nalatid at pumangit na Heart Line (Drawing A. at B. h-h arrow a.) sa kaliwa at kanan mong palad. Tanda na hindi magiging maligaya o successful ang iyong first love o relationship. Sa halip, sa ikalawang pag-ibig, gumanda at naayos na ang Heart Line (Drawing A. at B. h-h arrow b.), mas magiging maligaya ka na at magkakaroon ng panatag at panghabambuhay na relasyon (Drawing A. at B. 1-M arrow c.).

DAPAT GAWIN

Habang, ayon sa iyong mga datos, Abigail, matapos mong makipag-break sa kasalukuyan mong boyfriend, pagsapit ng buwan ng Disyembre, sa taong ding ito ng 2022, isang mabait at mabuting lalaki ang darating sa iyo na may zodiac sign na Gemini (Drawing A. at B. 1-M, arrow c.). Tulad ng nasabi na, mahalin at ingatan mo ang lalaking ito, gayundin, maging tapat ka sa kanya at walang sawa mo siyang paglingkuran dahil siya ang biyaya sa iyo ng Maykapal na nakatakda mong makasama habambuhay.