Malinaw at makapal na marriage line, tanda na mapapangasawa ang bf na nagpramis ng kasal

ni Maestro Honorio Ong @Kapalaran Ayon sa Palad | February 24, 2023

KATANUNGAN

1. May boyfriend ako ngayon at dalawang taon na ang relasyon namin. Nasa abroad siya ngayon, pero sa June ay bababa na siya sa barko at sabi niya, sa December ay magpapakasal na kami.

2. Gusto kong malaman kung matutuloy ba ang kasal namin at kami na ba ang magkakatuluyan? Isinilang ako noong October 9, 1997, isa akong Libra at February 15, 1993 naman ang birthday boyfriend ko na isang Aquarius.

KASAGUITAN

1. Iisa lang ang malinaw, makapal na Marriage Line (Drawing A. at B. 1-M arrow a.) sa kaliwa at kanan mong palad. Ibig sabihin, kung ang kasalukuyan mong boyfriend ay siyang first love mo, first kiss at kauna-unahang naka-relasyon na seryoso at totohanan, walang duda na kayo na ang magkakatuluyan at ang nasabing pagsasama ay magiging maligaya at panghabambuhay.

2. Ito ay madaling kinumpirma ng napakaganda, walang bilog, hindi nalatid o hindi naputol, at suwabeng nagsimula ang nasabing Heart Line (Drawing A. at B. h-h arrow b.) sa Mount of Jupiter (arrow c.) na tinatawag din nating Bundok ng Kaligayahan (arrow c.) sa kaliwa at kanan mong palad.

3. Ibig sabihin, bukod sa magka-compatible ang zodiac sign mong Libra at sa boyfriend mo naman na Aquarius, tunay ngang magiging tapat at masidhi ang inyong panghabambuhay na pagmamahalan na pinatindi pa ng pagiging tugma ng birth date mong 18 o 9 (1+8=9) at 6 naman ang boyfriend mo. Ibig sabihin, halos kayo na ang itinakda ng tadhana upang magsama at magmahalan ng panghabambuhay.

DAPAT GAWIN

Ayon sa iyong mga datos, Irish, tiyak na ang magaganap, kung hindi mapapaaga sa buwan ng Setyembre ngayong 2023, maaaring sa buwan ng Disyembre o Enero 2024 matutuloy ang inyong kasal, na tiyak namang hahantong sa maligaya at panghabambuhay na pagpapamilya.

Paglayo sa sinilangang bayan, magpapayaman sa mister na gustong umunlad ang pamilya

ni Maestro Honorio Ong @Kapalaran Ayon sa Palad | February 22, 2023

KATANUNGAN

1. Ako ay taga-Sorsogon at nagbabalak na pumunta ng Maynila para makipagsapalaran, sapagkat walang buhay dito sa aming probinsya. May asawa’t dalawang anak ako at ayaw kong matulad sila sa mga kababayan kong walang kinabukasan.

2. Gusto ko silang makatapos ng pag-aaral, kaya balak kong makipagsapalaran d’yan sa Maynila. Nais kong malaman kung magiging maganda ba ang kalagayan ko sa Maynila?

KASAGUTAN

1. Kung hindi muna sisilipin ang guhit ng iyong mga palad at ang pagbabatayan ay ang zodiac sign mong Capricorn at birth date na 17, upang umunlad ang binabalak mong pakikipagsapalaran, tugma sa iyong kapalaran ang pagpunta sa Maynila, gayundin ang mga lugar na malayo sa sinilangan mong bayan. Sapagkat tunay nga na ang mga taong naiimpluwensiyahan ng Planetang Saturno ay umuunlad sa sandaling lumayo sila sa sinilangan nilang bayan.

2. Naging Saturno ang iyong ruling planet, sapagkat si Saturn ang ruling planet ng zodiac sign mong Capricorn at ang birth date mong 8 or 17 (1+7=8) ay may kaakibat ding planetang Saturno. Sa madaling salita, bagama’t hard work at sobrang pagtitiis ang pansamantalang daranasin mo sa Maynila o saanmang malayong lugar, kapag naman napagtiisan mo ang mga pang-aapi, pang-aalipusta at pagyurak sa iyong pagkatao, uusbong at mabubuo ang bago, masipag, masikap at maunlad na nilalang. Malaki rin ang posibilidad na ikaw ay maging super-yaman.

3. Samantala, kapansin-pansing lumawak ang sakop ng Life Line (Drawing A. at B. L-L arrow a.) sa makapal at kaunting guhit sa kaliwa at kanan mong palad. Tanda na sa sandaling ginusto mo ang isang bagay at pinagsikapan mo talagang makuha, walang makakahadlang sa iyong pagnanais na makipagsapalaran sa Maynila. Ngunit ang hindi mo naman mahahadlangan ay ang dumaan sa maraming pagsubok at pasakit, saanmang malayong lugar ka mapadpad.

4. Ang pagsusuring hindi magiging madali ang buhay mo sa Maynila sa umpisa ay madali namang kinumpirma ng Fate Line (Drawing A. at B. F-F arrow b.), na hindi makaungos nang mabuti, pabugso-bugso (arrow b.) at sa gitnang bahagi lamang ng kanyang destinasyon ganap na nakahulagpos, kumapal at luminaw (arrow c.) hanggang sa makarating sa Bundok ng Tagumpay (arrow d.) na siya ring Mount of Saturn. Ito ay nagsasabing pagkatapos ng maraming pang-aapi at pagyurak sa iyong katauhan, magiging magaling kang tao, hanggang sa kusa mong matagpuan ang tunay na pormula ng pagyaman – pagsisinop ng kabuhayan, pagmamahal sa pinagkakakitaan at paglayo sa maluho at magastos na lipunan.

MGA DAPAT GAWIN

1. Kaya, Abel, tama ang iniisip mo dahil kung mananatili ka sa probinsya na iyong sinilangan, hindi ka uunlad at yayaman. Sa halip, maaari pang mamana ng iyong mga anak at magiging apo ang pinapasan n’yong kahirapan sa buhay.

2. Subalit sa paglayo sa sinilangang bayan at pakikipagsapalaran sa malayong lugar, nakahanda na ang magaganap – matapos ang matinding sakripisyo at mga pagtitiis sa buhay. Sa dulo ng lakbayin, isang malaking tagumpay ang iyong matatamo.

3. Ayon sa iyong mga datos, ang mga ito ay nakatakdang mangyari sa taong 2032 at sa edad mong 51 pataas, kung saan sa lugar na malayo sa sinilangan mong bayan, mayamang-mayaman ka na.

Manliligaw na may kaya sa buhay, mag-aahon sa hirap

ni Maestro Honorio Ong @Kapalaran Ayon sa Palad | February 20, 2023

KATANUNGAN

1. May dalawang manliligaw ako ngayon, Maestro. ‘Yung una ay matagal ko nang kaibigan at kakilala dahil kaklase ko siya noong high school, pero mahirap lang sila at hindi siya nakatapos ng pag-aaral, habang ‘yung ikalawa naman ay may kaya sa buhay o sabihin na nating mayaman ang angkan sa aming lugar.

2. Mahirap lang kami, kaya panay ang sulsol ng mga kapatid ko, gayundin ang nanay ko na sagutin ko na ‘yung mayaman kong manliligaw para kapag napangasawa ko siya ay yumaman na rin kami, makabili ng sariling bahay at makaalis sa apartment na matagal na naming pinagtitiisan at inuupahan.

3. Kaya gusto kong malaman, Maestro, kung nakaguhit din ba sa mga palad ng isang tao kung siya ay makakapag-asawa ng mayaman at sa palagay n’yo, ito ba ang nakaguhit sa mga palad ko? Kung sakaling mag-asawa ako, kanino higit na liligaya sa dalawang lalaking ito?

KASAGUTAN

1. Sabi ng kapitbahay naming mukhang pera, “Hindi lamang sa pag-ibig nabubuhay ang tao kundi sa salapi rin.” Ganu’n nga ang posibleng mangyayari —makakapag-asawa ka ng lalaking hindi lang may kaya sa buhay o mayaman. Bagkus, bukod sa mapera ay posible ring siya ay kilala sa lipunan o may marangal na pamilya sa inyong lugar.

2. Ito rin naman ang nais ipahiwatig ng matipuno, makapal at mahabang Guhit ng Lalaki (Drawing A. at B. K-K arrow a.) na kusang sumabay (arrow b.) at kalaunan ay ganap na ring pumatong at nakiisa sa Fate Line (Drawing A. at B. F-F arrow c.) sa kaliwa at kanan mong palad.

3. Tanda na hindi basta-bastang lalaki ang itinakda ng kapalaran na iyong makakasama habambuhay. Bagkus, gaya ng nasabi na, ang lalaking nakatakda mong mapangasawa ay siya na ring nilalang na nakatakdang mag-ahon sa iyo sa kahirapan at magbigay sa inyong pamilya ng isang maalwan at nakaririwasang pamumuhay. At dahil medyo mayaman ang lalaki na iyong makakaisang dibdib, ang nasabing pag-aasawa ay magiging masagana at habambuhay na magiging maligaya.

MGA DAPAT GAWIN

1. Habang, ayon sa iyong mga datos, Jenny, sa pagdating ng mayaman mong manliligaw, matupad ang pangarap ng pamilya mo na makapag-asawa ka ng mayaman, kaya ‘wag mo na itong palagpasin pa. Sapagkat ito rin ang nais ipahiwatig ng iyong mga datos na sinuportahan din ng birth date mong 23.

2. Ang birth date mong 23 ay nagsasabing sa pag-aasawa, tuluyan nang makakalaya sa kahirapan ang inyong pamilya, hatid ng lalaking mayaman na nagtataglay ng zodiac sign na Aquarius. Habang, nakatakdang maganap ang nasabing pag-aasawa sa susunod na taong 2024 at sa edad mong 25 pataas (Drawing A. at B. 1-M arrow d. at h-h arrow e.). Ito ay magdudulot ng maalwan at masaganang kapalaran habambuhay, hindi lang sa sarili mo kundi sa buo mong pamilya.