Worried baka ‘di umabot sa target age, mister mabubuhay pa ng matagal

ni Maestro Honorio Ong @Kapalaran ayon sa Palad | December 11, 2023

KATANUNGAN

1. Sa sa edad kong 51, bakit kaya ang dami-dami ko na agad nararamdamang sakit sa aking katawan? May rayuma na ako gayung bata pa naman ako. Sa palagay n’yo aabot pa kaya ako sa target age kong 75?

2. Ayoko naman kasing pahirapan ang pamilya ko, kung hindi na ako makatayo sa aking higaan at wala nang silbi, kawawa naman ‘yung asawa at mga anak ko.

3. Maestro, nakikita rin ba sa guhit ng palad kung ano’ng edad mamamatay ang isang tao? At kung gaano katagal ang haba ng buhay sa mundo?

KASAGUTAN

1. Masasabing parang wala ring kuwenta ang mabuhay, lalo na’t iisipin mong tumatanda, nagkakasakit at mamamatay lang din naman ang isang tao. Bakit nga ba kailangan pang magkasakit, manghina ang pisikal na katawan at pagkatapos ay mamamatay, gayung masarap pa namang mabuhay? Samantala, nakikita rin sa guhit ng palad kung gaano katagal ang ilalagi ng isang indibidwal sa mundong ito.

2. Sa kaso mo, nakatutuwa namang makita na humaba ang Life Line (Drawing A. at B. L-L arrow a.) sa kaliwa at kanan mong palad. Ibig sabihin (arrow a.), mararating mo pa ang “old age” na tinatawag, gayundin ang target mong edad na 75, kung ngayon pa lang ay mag-iisip ka na ng mapaglilibangan, tulad ng maliit na negosyo o makilahok sa isang public service o civic organization project na may layuning tumulong sa mga taong mahihirap at nangangailangan.

3. Kung anumang sektor ng lipunan na nais mong tulungan, puwede rin sa mga religious activities sa inyong lugar, kung saan, ayon nga sa mga pananaliksik ang pagsali sa mga samahang pang-simbahan ay sinasabing nakapagpapahaba rin ng buhay.

4. Dahil tunay ngang sa ganyang paraan, ‘pag nagkaroon ka ulit ng responsibilidad sa iyong kapwa, puwede ring maglingkod ka sa inyong simbahan, relihiyon o ikaw na ang magpaaral at mag-alaga sa iyong mga apo, ru'n naman sa parteng ‘yun ng iyong buhay, nagkakaroon ka nang silbi o bagong responsibilidad at tulad ng naipaliwanag na, tuluy-tuloy pang hahaba ang buhay mo at maaari mong abutin ang ideal age mo na 75 pataas.

MGA DAPAT GAWIN

1. Sa mga kabataan d’yan at ganundin sa mga malapit nang tumanda, tunay ngang dapat ngayon pa lang ay paghandaan mo na ang iyong pagtanda at planuhin kung ano ang iyong gagawin sa panahon ng iyong retirement age, upang kapag dumating ang panahong ito ay hindi ka maging alagain at lumabas na kaawa-awa.

2. Habang, ayon sa iyong mga datos, Rolando, kung ngayon palang lalabas ka na ng bahay at sasali sa mga gawaing may kaugnayan sa paglilingkod sa iyong kapwa. Kaya tulad ng nasabi na, dahil may silbi ka pa at marami pang mga taong dapat paglingkuran at mahalin, kusang hahaba at lalo pang magiging produktibo at maligaya ang pang-araw-araw mong buhay sa kapaligiran o sa lipunang iyong ginagalawan.

May bf na sa abroad, nag-dyowa pa ng isa, bebot dapat magtino para lumigaya

ni Maestro Honorio Ong @Kapalaran ayon sa Palad | December 4, 2023

KATANUNGAN

1. May nobyo ako ngayon. Balak na naming magpakasal, pero nagpumilit siyang mangibang-bansa kahit na 2 taon. Pagkatapos umano nu’n ay magpapakasal na kami. Actually, nagli-live in na kami for almost a year bago siya mag-abroad, gagawin niya raw ‘yun para sa future namin.

2. Ang pinagtataka ko lang, Maestro, mahal ko siya pero nang may dumating na lalaki sa buhay ko na hindi ko naman masyadong mahal, nakipagrelasyon ako sa kanya at lihim na may nangyayari sa amin habang nasa abroad ang fiancée ko.

3. Ayoko sana itong gawin sa fiancée ko. Kaya lang, ‘di ko siya kayang iwasan, kahit na alam kong hindi ko naman siya mahal. Nais kong itanong kung totoo bang nakatakda ang kapalaran? Iniisip ko kasing baka nakatakda talaga ang dalawang lalaking ito na makasama ko.

KASAGUTAN

1. Totoong nakatakda ang kapalaran sa mga taong maninipis ang palad at mabuto kapag sinalat, subalit sa mga taong may makakapal na palad o matambok at malaman na palad. Ibig sabihin, may energy kang nasalat - sila ang mga taong may kakayahang iwasan ang nakatakda at baguhin ang kanilang kapalaran. At hindi lang maiiwasan nila ang kapalaran, bagkus sa pinakamatinding will power, lalo na kung malaki ang unang hati ng daliring hinlalaki (arrow a.) may will power silang isagawa at hubugin ang sarili nilang kapalaran at tadhana.

2. Kaya nga bagamat tila nagpapatong ang Marriage Line (Drawing A. 1-M arrow b.) sa kaliwa mong palad, pero naging isang tuwid na lang na Marriage Line (Drawing B. 1-M arrow c.) sa kanan mong palad at nagkataong presente sa iyo ang mga indikasyong pinaliwanag na sa itaas, may kakayahan kang baguhin at ituwid ang iyong kapalaran.

3. Sa madaling salita, kapag patuloy mong niloko ang iyong nobyo, mananaig ang nagpatong na Marriage Line (1-M arrow b.) sa kaliwa mong palad - hindi mo siya makakatuluyan, dahil hindi lang naman siya ang niloko mo kundi pati na rin ang iyong sarili. Kaya nga ang mangyayari, pagkatapos mong manloko ng tao at nagkataong ang tao na iyong niloko ay ang nobyo mo, darating ang panahong ikaw naman ang lolokohin ng iyong kapalaran. Kaya hindi mo makakatuluyan ang lalaking mahal na mahal mo talaga na kinakatawan nga ng first boyfriend mo o ng fiancée mo na nasa abroad.

4. Subalit, kung sakaling naging tapat ka na sa iyong sarili, kasabay nito magiging tapat ka na rin sa iyong fiancée na nasa abroad. Maiiwasan mo na ang ikalawa mong boyfriend na hindi mo naman masyadong mahal. Sa puntong ito maitutuwid at maitatama mo na ang iyong ginagawa.

DAPAT GAWIN

Kaya wala kang dapat gawin ngayon, Mariel, kundi ang iwasan ang lalaking nakikisawsaw sa relasyon n’yo ng fiancée mo. Sa ganyang paraan, mananaig ang kaisa-isa at magandang Marriage Line (1-M arrow b.) sa kanan mong palad. At sa pagbabalik ng iyong fiancée, kayo na ang magkakatuluyan hanggang sa tuluyang bumuo ng maligaya at panghabambuhay na pamilya.

Mag-asawang feeling hopeless yumaman, anak ang susi para matupad ang pangarap

ni Maestro Honorio Ong @Kapalaran ayon sa Palad | December 1, 2023

KATANUNGAN

1. Mula pagkabata ay naghihirap na ako, hanggang sa nagkaroon na ko ng sariling pamilya, ganu’n pa rin ang aking kapalaran. Bakit hindi ako makaahon sa kahirapan kahit na masipag naman ako? Sa ngayon, isa akong panadero, pero parang nararamdaman kong wala akong pag-asang umasenso rito.

2. Ang pangarap naming mag-asawa para sa aming mga anak ay makapagtapos sila ng pag-aaral, dahil pareho namin ‘di nagawa ‘yun. Sa ngayon, nangungupahan lang kami sa isang barung-barong at sira-sirang bahay, kasi nga wala namang kaming pambayad para sa magandang apartment.

3. ‘Di nauubos ang dasal namin na sana isang araw, matupad ang pangarap namin kahit na sa ngayon ay isang labandera lang ang misis ko at minsan ay suma-sideline din siya sa pagiging katulong.

4. Sa palagay mo, Maestro, may pag-asa pa kayang matutupad ang pangarap namin? Ano ba ang dapat kong gawin para mabago ang takbo ng aming kapalaran? Sana umangat man lang ang aming kabuhayan.

KASAGUTAN

1. Nangyaring ganyan ang kapalaran mo, Rap, dahil sa mahabang sloping Head Line (Drawing A. at B. H-H arrow a.) sa kaliwa at kanan mong palad. Tanda na sa kasalukuyan, kulang na kulang kayong mag-asawa sa praktikalidad at pagkilos dahil ang sloping Head Line (arrow a.) ng isang indibidwal, ay isang senyales ng pangarap at magagandang ambisyon, kaya hindi pa natutupad ang iyong pangarap ay dahil sa iyong sloping Head Line.

2. Dahil dito, hindi naman sinasabing wala kang pag-asang yumaman. Sa halip, kailangang matagpuan sa guhit ng palad ng iyong misis ang isang simple, straight o tuwid na Head Line (Drawing A. at B. H-H arrow b.). Subalit kung hindi ganyan ang Head Line (arrow b.) sa kaliwa at kanang palad ng iyong misis, tulad ng iyong inaasahan, wala na ngang pag-asang umunlad at umasenso pa ang inyong pamilya, maliban na lang kung isa sa mga anak mo ay nagtataglay ng sinasabi nating straight Head Line (arrow b.) sa kaliwa at kanan niyang palad.

3. Kung saan, sinuman sa anak mo ang mayroon ng nasabing Head Line (arrow b.) na tuwid at simpleng. Tiyak ang magaganap sa susunod na pag-ikot ng mundo, sa darating pang mga taon ng kanyang buhay, posibleng ang anak mong may straight Head Line (H-H arrow b.) ang siya na ngang mag-aahon sa inyo sa kahirapan.

MGA DAPAT GAWIN

1. Tunay ngang ‘pag materyal na tagumpay ang kailangan, napakahalaga ang porma at pagkakaguhit ng Head Line (Drawing A. at B. H-H arrow a. at b.) sa kaliwa at kanang palad. Kaya ang una nating dapat tingnan sa isang tao ay ang kanilang guhit sa kaliwa at kanang palad.

2. Pangalawa, kailangang straight at maikling Head Line (arrow b.) kailangan ding may tigas, kapal, at enerhiya ang kaliwa at kanang palad kapag ito ay sinalat.

3. Sa sandaling may ganyang guhit ng palad ang inyong mga anak o kaya’y ang iyong misis, tiyak ang magaganap, malaki pa ang pag-asa na makaahon kayo sa kahirapan at tuluyang umunlad. Ayon sa Decadens ng iyong kapalaran, posible itong mangyari at maganap sa taong 2039, sa edad mong 54 pataas.