10 dahilan bakit nga ba mahusay na singer ang Pinoy?

ni Nympha Miano-Ang - @Life and Style | May 16, 2021

Ibang klase talaga kung kumanta ang Pinoy hindi lamang sa loob ng banyo, sa oras ng gawaing bahay o kahit naglilinis lang ng bakuran o nagtatanim sa bukid dahil taglay ng maraming Pinoy ang ginintuang boses.

Sabi nga ni international singing star Charice (Jake Zyrus na ngayon) sa panayam sa kanya ng American talk show host na si Ellen Degeneres na hindi raw siya ang pinakamagaling kumanta sa Pilipinas dahil kahit saang sulok daw magpunta ang mga dayuhan kahit saan daw corner ay napakaraming magaling kumanta na Pinoy, talo raw siya pagdating sa mga kompetisyon sa Pilipinas.

Sa naging popularidad na hatid nina Filipino-Mexican Jessica Sanchez, nang pumangalawa sa American Idol, maging ang pandemic rapper star na si EZ Mil ay sinasabing kapag dumadako na maging sa Europa ang mga Filipino ay kinakabahan na sila kapag sumalang na sa entablado ang Pinoy.

At sinuman sa ngayon sa Pinoy ang siyang nangangarap na muling makatuntong sa katanyagan sa larangan ng pag-awit, heto ang tips kung bakit may mga pinapalad at nagiging sikat na singer. At bilang Pinoy heto ang tips para maging next singing sensation tulad ni Moira.

1. Dapat hindi kayo mawawalan ng karaoke o Sing-along machine sa bahay. Dito magsisimulang humawak ng mikropono at sumunod sa awit ang mga paslit. Totoo ngang dahil na rin sa laganap ang videoke sa bawat tahanan ng Pinoy ay talagang nahubog ang maraming kabataan na mahirati sa pag-awit at maging mahusay na singer.

2. Talagang ine-enroll ang mga bata sa voice lessons. Maraming magulang ang gumagasta para sa kanilang paslit na ma-enroll sa music classes at kumukuha pa ng mga personal na voice instructor. Pero sa totoo lang, maraming diva at sumisikat na concert singer ang nanggaling lang sa mahirap na pamilya at tanging mga kalabaw at alagang kambing lang ang nakapakikinig ng kanilang mga boses sa probinsiya, pero plakado ang timplada ng boses at minahal ng masa. Sila ang mga singer na kahit walang formal lesson ay madali nilang nakukuha ang panlasa ng Pinoy sa tema ng boses na kanilang ibinibigay. Komo maraming mayaman ang gustong matutunang umawit ang kanilang mga anak at gumanda ang boses para sumikat ay kumukuha sila ng voice instructor para maturuan ang bata ng mga breathing technique, tamang paraan kung paano bubuksan ang bibig, lugar ng dila habang kumakanta, tamang pagbigkas ng mga salita, tamang pagbasa ng nota at estilo ng pagkanta. Sila rin ang magsasabi kung ano ang talagang kaya at hindi ng bata sa pag-awit maging ang teknik kung paano ang magandang estilo ng pag-awit.

3. Hinihikayat ang mga bata na magpraktis sa lahat ng oras. Ang pag-awit ay simple pero sa mga gustong karerin talaga ang pag-awit ay isang mahirap na trabaho. Kung seryoso ang bata na maging isang tagumpay na singer kailangan siyang hikayatin na magpraktis ng regular.

4. Binabawalan ang mga bata na uminom ng malamig na tubig at sobrang init na inumin. Painumin lamang ang bata ng maligamgam o tamang-tama lamang ang timpla ng inumin. Tiyakin na maiwasan din ng bata ang pag-inom ng kape at pagkain ng maraming asukal para hindi masira ang kanyang boses. Ang tubig ay pinagkamainam niyang inumin. Kailangan niyang ingatan ang kanyang kalusugan.

5. Tinitiyak ding hindi magpupuyat sa pagtulog ang bata. Ang kakulangan sa pagtulog ay mahirap sa bata na umawit kinaumagahan. Laging hikayatin ang bata na matulog ang maaga at nasa oras. Ang walong oras na diretsong kumpletong tulog ay inirerekomenda.

6. Ang mga bata ay dapat isinasali sa mga talent shows o singing competitions. Maging sa iskul man o piyesta sa lugar, anumang singing events sa barangay o anumang patimpalak ng pag-awit , para maranasan ng bata kung paano humarap at lumakas ang loob sa pagtuntong niya sa ibabaw ng entablado at maraming nanonood sa kanya. Ang karanasang ito ang makatutulong sa bata para maiwasan niyang nerbiyusin at matakot sa ibabaw ng stage. Pero bawal pa ngayon ang ganyang event, kaya gagamit na lang muna siya ng singing apps.

7. Dinadala ang bata sa mga singing auditions. Oras na handa na ang bata, isalang na siya sa isang auditions. Bigyan siya ng lakas ng loob para maibigay niya ang kanyang galing at husay sa pag-awit.

8. Ang mga excited na magulang ay nagde-demo tape ng mga performance ng bata at saka ito ipinadadala sa mga talent agencies o recording studios. At dahil nagbabakasakali na baka may mga makapansin sa kakayahan ng kanyang anak. Sa totoo lang, araw-araw ay maraming agents at scouts ang nariyan lang sa tabi-tabi at naghahanap ng susunod na big star. Kaya tiyak mamamayagpag na susunod ang inyong anak sa pag-awit.

9. Ang Pinoy kasi ay marunong magbigay ng lakas ng loob at kumpiyansa kanilang mga anak. Laging positibo ang Pinoy sa lahat ng oras. At dahil ugali na ng Pinoy ang magmahal sa anak at mangalaga kaya talagang suportado ang bata. Suporta lang talaga ang kailangan ng bata para maabot niya ang kanyang pangarap.

10. Nahihikayat kasi ang bata na magkaroon ng unique na estilo sa pag-awit, bukod kasi sa pagiging mahusay kumanta, ang mga talent scouts ay naghahanap ng may kakaibang singing style na bata para maging kapansin-pansin agad sa masa. Mainam din ito kapag nakakapag-compose ng awitin ang bata.

Gunitain na lang muna natin... Mga kapistahang hindi maidaraos ngayong Mayo

ni Nympha Miano-Ang - @Life and Style | May 12, 2021

Walang mass gatherings, check! Wala munang piyesta-piyesta, check! para hindi magpiyesta si COVID-19 sa rami ng tao. Kaya, gunitain na lang natin ang mga kapistahang idinaraos tuwing buwan ng Mayo.

1. ANG FLORES DE MAYO - idinaraos sa buong bansa tuwing buwan ng Mayo. Literal na ibig sabihin ay “flowers of May,” ang fiesta ang gumugunita sa paghahanap ng Banal na Krus ni Reyna Elena at ng kanyang anak, si emperor Constantine. Ang kapistahan na ito sa bansa ay nagtatampok sa parada ng mga kadalagahan na ineeskortan ng mga batang kalalakihan na may hawak na arko ng mga bulaklak. Ang pangunahing kalahok dito ay kinatatampukan ni Reyna Elena at ng emperor.

2. ANG PULILAN CARABAO FESTIVAL – ginaganap ito tuwing ika-14 na araw ng Mayo sa Pulilan, Bulacan. Daan-daang nakakolereteng mga inaayusang kalabaw ang ipinaparada ng mga magsasaka sa lahat ng kalye patungo sa simbahan. Pagdating sa tapat ng simbahan, kukumpasan ang mga kalabaw na lumuhod sa tapat ng santo ni San Isidro de Labrador, ang patrong santo ng mga magsasaka.

3. ANG PAHIYAS –tuwing ika-15 ng Mayo, ang mga pamilya ng magsasaka ay nagpapasalamat kay San Isidro Labrador para sa magandang ani sa pamamagitan ng pagdedekorasyon ng kanilang tahanan na gawa sa matitingkad na makulay na kakanin na tinatawag na kiping.

4. ANG OBANDO FERTILITY RITES - idinaraos ito mula Mayo 17 hanggang 19 sa Obando, Bulacan. Maraming bilang ng mga lalaki at kababaihan ay sumasayaw sa harap ng simbahan, may kasamang panalangin para sa asawa o anak. Ito ang pilgrims dance kay San Pascual Baylon, Santa Clara de Assisi o sa Virgen de Salambao para sa kanilang kahilingan.

Ang buwan ng Mayo ay buwan ni Birheng Maria. Halos buong buwan ng Mayo idinaraos ang Flores de Mayo. Sa buong buwan na ito, sa mga probinsiya lahat ng kadalagahan ay naghahandog ng bulaklak sa mga simbahan. Dito ay magsusuot sila ng magagandang gown, paparada habang nasa ilalim ng arko ng mga bulaklak at kandila.

Pero sa mga siyudad, ang Flores de Mayo ay nagiging isang fashion show, ipasusuot ng mga designer ang kanilang mga nilikhang gown sa mga napili nilang naggagandahang dalaga para maka-attract ng atensiyon.

Ang buwan ng paghahandog ng bulaklak ay tinatawag na Santacruzan, isang araw na selebrasyon kung saan ang isang aaktong empress na si Elena ay naghahanap ng Banal na Krus.

Ang santacruzan ay parada ng karakter mula sa Bibliya at iba pang allegorical figures.

Ang tradisyoal na prusisyon ay itinatampok din ang kanyang anak, si Constantine the Great. Ang mga adorasyong santo tulad ni Birheng Maria ay pinaparada na may hawak na kawayan na may kasamang mga barya at tinapay, kendi at prutas.

Ang Pahiyas (overleaf) naman, ang mayamang klase ng offering tuwing Mayo sa probinsiya ng Lucban sa Quezon Province ay tinatampukan ng napakaraming kulay at binabalutan ang buong kabahayaan ng sari-saring mga bulaklak.

Bagamat ang salitang fiesta ay Espanyol, nagkaroon ng sariling presentasyon ang Filipino. Lahat ng tao ay lumalahok sa naturang selebrasyon, isang taon halos nila itong inihahanda bago ang kapiyestahan, maging ang lahat ng dekorasyon, costumes at kaganapan ay parehong magastos at maluho.

Tulad ng Pahiyas, halos lahat ng fiesta sa Pilipinas ay may pinag-ugatan kahit wala pa ang mga Kastilang mananakop sa bansa.

Ang diyos na Bathala ang lumikha ng lupa at dagat at sa labis na paniniwala ng mga tao rito ay marami siyang nagawang kabutihan at himala.

Ang lupaing pinapalibutan ng dagat ay hinahalihan umano ng maraming espiritu. Kaya nang dumating umano ang mga Espanyol ay nagpakilala ito ng bagong Diyos at bagong espiritu na paniniwalaan at pararangalan.

Isa namang pangunahing piyesta ay ang fertility at paghahalaman, pag-aani at pagsamba na ginagawa sa pamamagitan ng pagsasayaw sa harap ng imahe ni San Pascual at Santa Clara para hingin ang biyaya na magkaroon ng anak at magpasalamat sa masaganang ani.

Ang lahat ng 'yan ay bawal pang maidaos habang may COVID-19, kaya magbalik-tanaw na lang tao sa video o kaya sa mga palabas na replay sa youtube o iba pang social media. Stay safe.

Tips para maiwasan ang cyberbullying

ni Nympha Miano-Ang - @Life and Style | May 10, 2021

Ang tinatawag na Cyberbullying ay ang pagpapakita ng pananakot o pangha-harass sa teknolohikal na paraan tulad ng sa social media o iba pang ginagamit na komunikasyon sa internet o cellphones sa isang tao. Ang biktima ay maaring ginugulo online, iniinsulto, binabastos o pinagbabantaan sa kanyang mga comments, personal messages o sa social networking websites.

Ang mga Cyberbullies ay nagpapadala ng mga mapanirang salita, nakahihiyang mga larawan o nagpo-post ng personal information online sa biktima, kaya naman puwede silang mapahamak.

Nakatatakot ang Cyberbullying kaysa sa face-to-face na pambubuli dahil nahaharap siya sa kahihiyan sa mas nakararami, kaya mahirap kumawala. Para maiwasan ang cyberbullying, kumilos na agad at proteksiyunan ang technological accounts.

1. Huwag pansinin ang anumang nakaiinsultong emails, instant messages o iba pang nakalahad na cyberbullies. Tinatayang may 81% ng cyberbullies na huma-harass sa tao na akala nila ang reaksiyon ay nakatatawa, pinakamabuting huwag papatulan ang joke para huminto na ang mga iyan.

2. Palitan ang settings ng instant messaging programs para ang friends lang ang makapasok. Ito’y para maiwasan ang sinumang bullies na personal na aatake habang online ka.

3. Ilagay ang anumang social networking profiles sa private at idagdag lang ang mga taong alam mong kaibigan mo. Kontakin ang site's moderator kung ang cyberbully ay nagpadala ng pagbabanta o pambabastos sa iyong pribadong mensahe o kaya ay hindi awtorisadong pag-post ng iyong larawan o personal na impormasyon sa kanyang pahina. Ito ang klase ng behavior na lumabag sa Terms of Service at dapat ma-delete ang page at ma-ban ang bully.

4. Palitan na agad ang passwords kung ang cyberbully ay nagawang i-hack ang iyong online accounts. Huwag sasabihin kahit kanino ang passwords dahil hindi mo alam kung gagamitin nila ito laban sa iyo. Palitan ang usernames o email addresses para mas mahirap kang makontak.

5. Iimprenta na lahat ng emails, instant messages o web pages na naglalaman ng mga salitang pangha-harass kung ayaw kang tantanan ng cyberbully. I-save din ang mga text messages sa cellphone. Kung estudyante ka at kaklase mo ang gumagawa, ipakita agad ito sa school principal kung nangyari ito sa school computers o ipaalam na agad ito sa pulisya kung inaalala mo ang iyong kaligtasan.