88 LGUs nasa state of calamity... 29 patay sa bagyo, habagat

by Jeff Tumbado @News | August 22, 2026

Photo: File

Hindi bababa sa 88 lokal na pamahalaan sa buong bansa ang nagdeklara ng state of calamity habang umabot na sa 29 ang nasawi at 19 ang nasugatan dahil sa pinagsamang epekto ng mga Bagyong Luis at Maymay at ng Habagat sa iba’t ibang bahagi ng bansa.

May tatlo namang nawawala na iniulat sa Quezon, Maynila at Batangas City. Ang mga insidente sa Quezon at Maynila ay kapwa iniugnay sa pagkalunod.

Kabilang sa LGUs na nasa state of calamity ang Dagupan City; apat na bayan sa Pangasinan; buong lalawigan ng Bataan, Bulacan, Pampanga at Cavite; at ilang bayan sa Zambales, Rizal at Batangas. Sa Pangasinan, nasa state of calamity ang Santa Barbara, Mangaldan, Bugallon at Mangatarem. Sa Zambales, Masinloc ang nag-iisang lugar na nakapaloob sa talaan. Sa Rizal, Rodriguez, na kilala rin bilang Montalban, ang nag-iisang lugar na nagdeklara ng state of calamity, habang Nasugbu naman ang naitalang lugar sa Batangas.

Lady rider, dedbol sa jeep

by Mervin Reyes @News | August 22, 2026

Photo: San Mateo MPS - Circulated

Patay ang isang 43-anyos na babaeng loan collector matapos salpukin ng kasalubong na pampasaherong jeep sa General Luna Ave., Brgy. Guitnang Bayan 1, San Mateo, Rizal, Huwebes ng gabi, Agosto 20.

Sa kuha ng CCTV, pasado alas-6 ng gabi, makikitang napunta sa kabilang lane ang jeep at sinalpok ang biktima na pauwi mula sa trabaho sakay ng motorsiklo.

Bumangga rin ang jeep sa bakod ng isang sementeryo at nawasak ang harapang bahagi nito. 

Isinugod pa sa ospital ang biktima ngunit binawian din ng buhay makalipas ang ilang oras. 

Agad namang inaresto ang 20-anyos na jeepney driver.

Film director, arestado sa child abuse

by Benjamin Chavez @News | August 22, 2026

Photo: Circulated

Inaresto ang isang film director ng mga operatiba ng Laguna Provincial Special Operations Unit, Laguna Provincial Intelligence Unit, at Sta. Rosa Component City Police Station, alas-8:55 ng umaga, sa Brgy. Tagapo, Sta. Rosa City, Laguna dahil sa child abuse.

Kinilala ang suspek na si alyas Direk Erol, may asawa at residente ng Quezon City, na nasakote sa isang mall.

Nag-ugat ang pag-aresto sa warrant of arrest na inisyu noong Hulyo 8, 2025 ng Regional Trial Court Branch 58 sa Quezon City kaugnay ng dalawang bilang ng umano’y paglabag sa Special Protection of Children Against Abuse, Exploitation and Discrimination Act.

May inirekomendang piyansang tig-P180,000 para sa bawat kaso.