Nancy Binay 83/155

Trilyones na ayuda ng gobyerno sa mamamayan, hindi maramdaman

BULGAR

ni Nancy Binay - @Be Nice Tayo | August 7, 2022

Dumami pa ang mga Pinoy na naghihirap.

Halos isa sa bawat dalawang Filipino o 48% ang nagsabing sila ay mahirap, ayon sa June survey ng Social Weather Stations (SWS). Katumbas ito ng 12.2 milyong pamilyang Filipino, na mas mataas sa 10.9 milyong pamilya (o 43% ng respondents) na naitala noong Abril.

Bagama't maraming programa ang pamahalaan upang mabawasan ang mga naghihirap nating mga kababayan ay tila hindi ito epektibo, lalo na kung pagbabasehan ang resulta ng survey.

Maganda sana kung ma-discuss sa amin ng Executive Department at ng economic-finance cluster kung ano ba ang medium- to long-term plan nila pagdating sa poverty reduction.

Ito ay para matulungan sila ng Kongreso na gumawa ng batas na nakahanay sa economic objectives ng pamahalaan.

☻☻☻

Trilyun-trilyon na ang suma-tutal ng mga ayuda at livelihood programs na inilabas ng gobyerno sa nakaraang mga dekada para sa poverty alleviation.

Pero parang wala namang pag-unlad kung pagbabatayan natin ang objectives ng ayuda — mataas pa rin ang ating poverty rate.

Sa mga pamilya, tumaas pa sa 18% ang poverty incidence sa first semester ng 2021, ayon sa Philippine Statistics Authority (PSA), kumpara sa 16.2% na naitala sa parehong panahon noong 2018.

Katumbas ito sa 4.74 milyong pamilya noong 2021, na mas mataas sa 4.04 milyong pamilyang naitala noong 2018.

Ang tanong palagi natin, eh, kung namo-monitor ba ng mga national government agencies (NGAs), tulad ng DSWD at PSA kung ilang percent ba ang success rates ng livelihood programs na pinopondohan ng gobyerno kahit in the last five years?

Kahit sa 4Ps, ilan na ba ang grumadweyt sa category ng 'poorest-of-the-poor'? Kaso, noong grumaduate sa lista ng DSWD, nasa 'poor' category pa rin sila.

☻☻☻

May kakayahan ang pamahalaan na magbigay ng ayuda — sa pamamagitan ng cash assistance o livelihood programs, halimbawa — ngunit kulang tayo sa kaalaman kung maayos nga bang namo-monitor, naa-assess at nare-report kung successful nga ba ang programa.

O, kahit ma-follow up man lang kung nasaan na ang estado ng programa, lumalago ba ito o bigong makamit ang objectives?

Ito ang mga nais nating marinig mula sa ating mga fiscal manager pagdating ng budget hearing upang magkaroon kami ng ideya kung paano makatutulong ang Kongreso sa poverty alleviation.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan at huwag kalilimutang magdasal.

Malalagpasan din natin ito.

Be Safe. Be Well. Be Nice!

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US! Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Strategy kontra monkeypox, ilatag na ngayon

BULGAR

ni Nancy Binay - @Be Nice Tayo | August 3, 2022

Nakumpirma na ang pagpasok ng monkeypox sa bansa ilang araw pagkatapos ideklara ng World Health Organization na “global health emergency” ang monkeypox outbreak.

Natuklasan ang unang kaso ng monkeypox sa bansa sa isang 31 taong gulang na Pilipinong dumating mula sa ibang bansa noong July 19.

Umaasa tayo na natuto na ang pamahalaan sa mga aral ng kasalukuyang pandemya at agarang kikilos upang maiwasan ang pagkalat ng monkeypox sa bansa.

Nananawagan tayo sa Department of Health na paigtingin ang kahandaan at kapasidad nito na tumugon sa panibagong banta na ito.

Mayroon na tayong nailatag na framework na ginamit natin laban sa COVID-19. Maaari nating pagsamahin ang 3T (tracing, testing, treatment) strategy kontra-COVID-19 sa kasalukuyang 4-door strategy (prevention, detection, isolation, treatment) ng DOH sa pagtugon sa monkeypox.

☻☻☻

Kailangan ding muling buhayin ng Department of Interior and Local Government ang mga emergency hotline at suriing muli ang local-level coordination sa mga local government unit sa usapin ng surveillance at border control.

Nararapat lang din na sa lalong madaling panahon ay magkaroon ng malawakang information campaign upang malaman ng mga tao kung paano maiiwasan ang monkeypox at kung ano'ng maaaring gawin kung nahawaan sila nito.

Mainam din kung ngayon pa lang ay magtalaga na ng mga special units para sa monkeypox at palakasin ang clinical management, coordination, treatment, vaccination capacity at iba pang kailangan para maiwasan ang pagkalat ng sakit sa mga kababayan natin.

☻☻☻

Umaasa rin tayo na magtakda na ang Pangulong Ferdinand Marcos, Jr. ng bagong Health Secretary na mangunguna sa mga pagsisikap kontra sa monkeypox at sa COVID-19.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan at huwag kalilimutang magdasal.

Malalagpasan din natin ito.

Be Safe. Be Well. Be Nice!

P5.1-B halaga ng bakuna, nasayang lang!

BULGAR

ni Nancy Binay - @Be Nice Tayo | July 31, 2022

Nakapanghihinayang, nakapanlulumo at nakalulungkot.

Ito ay matapos mag-expire ang mahigit 4.2 milyong doses ng COVID-19 vaccines na binili ng private sector, ayon kay Go Negosyo founder at dating Presidential Adviser for Entrepreneurship Joey Concepcion. Dagdag pa niya, nagkakahalaga ng tinatayang P5.1 bilyon ang mga bakuna.

Imbes na nakatulong sana upang mabigyan ng karagdagang proteksyon ang ating mga kababayan kontra COVID-19 ay nauwi ito sa wala.

Nitong Martes (Hulyo 26) lang kasi inilabas ng DOH ang bagong guidelines para sa rollout ng 2nd booster shot.

Sa ilalim nito, kasama sa mga puwedeng magpabakuna ng 2nd booster shot ang mga edad 50 pataas at immunocompromised na edad 18 hanggang 49.

Ngunit nag-expire ang last batch ng Moderna vaccines noong Miyerkules (Hulyo 27), habang Hulyo 31 naman ang expiration ng final batch ng AstraZeneca vaccines, ayon kay Concepcion.

Nawa’y pag-ibayuhin ng DOH at advisers nito ang pakikipag-ugnayan sa kanilang international counterparts, lalo na ‘yung mga nag-aaral ng bisa ng bakuna, upang malaman agad ang pinakabagong resulta ng pag-aaral nila at tutukan ang expiry dates ng bakuna upang maiwasang masayang ito.

Pagtulungan din natin upang lalo pang mapalakas ang vaccination drive ng pamahalaan, lalo na ang booster shots ng mga bulnerableng sektor.

Hindi kasi biro ang perang ginasta upang bilhin ang mga vaccine, lalo na at lubhang naapektuhan ng pandemya ang pribadong sektor.

☻☻☻

Nakikiramay naman tayo sa ating mga kababayan na nasalanta ng nagdaang lindol sa northwestern Luzon, lalo na sa mga lalawigan ng Abra at Ilocos.

Nagpapasalamat din tayo sa Maykapal, na bagama’t may mga namatay ay kakaunti ito.

Ipinaabot natin ang taimtim na pakikiramay at pakikidalamhati sa mga naiwan at umaasang gagaan din ang kanilang kalungkutang nadarama.

Ang aming opisina nama’y nakikipag-ugnayan na sa mga kinauukulan upang makapaghatid ng tulong at maibsan ang bigat na dinadala ngayon ng ating mga kababayan sa Norte.

Tututukan din natin ang pagdinig ng pambansang badyet, upang masiguro na mayroong pondo upang muling makabangong ang ating mga kababayan at maisaayos ang mga nasirang imprastruktura at heritage sites.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan at huwag kalilimutang magdasal.

Malalagpasan din natin ito.

Be Safe. Be Well. Be Nice!

. .

Trilyones na ayuda ng gobyerno sa mamamayan, hindi maramdaman

Strategy kontra monkeypox, ilatag na ngayon

P5.1-B halaga ng bakuna, nasayang lang!

RECOMMENDED