Nancy Binay 67/155

DENR at PHILSA, joint forces sa paglikha ng Natural Resources at geospatial database

BULGAR

ni Nancy Binay @Be Nice Tayo | February 9, 2023

Kamakailan lang ay inanunsyo ng Department of Environment and Natural Resources (DENR) na magbabakas sila at ang Philippine Space Agency (PhilSA) upang lumikha ng national environment and natural resources geospatial database.

Sakop ng partnership na pinasok ng dalawang ahensya ang progress monitoring para sa National Greening Program (NGP), at pagtatag ng komprehensibong national geospatial database para sa Environment and Natural Resource Accounting (ENRA) program, kasama na ang koleksyon ng impormasyon tungkol sa klima at pagsasagawa ng analysis.

Lilikha ang PhilSA ng mga mapa, systems, at tools sa national level para suriin ang mga kahinaan at epekto ng climate change at mga sakuna. Tutulungan din nito ang DENR sa pag-monitor ng mga NGP area at iba pang gubat sa pamamagitan ng remote sensing, artificial intelligence, at geographic information systems.

Magmumula sa DENR ang mga data na kailangan ng PhilSA.

Natutuwa tayo na gagamit ang pamahalaan ng siyentipikong pamamaraan upang tugunan ang mga isyung kinakaharap natin, lalo na sa pagprotekta sa kalikasan sa harap ng krisis sa klima.

☻☻☻

Tinatalakay din namin sa Senado ang committee report para sa Cultural Mapping bill.

Ang cultural mapping ay tumutukoy sa sistematikong mga gawain at metodolohikal na proseso para sa paggalugad, pagdiskubre, pagdokumenta, pagsuri, pag-interpreta, pagpresenta, at pagbahagi ng impormasyon tungkol sa mga pamanang-lahi ng mga komunidad sa bansa.

Kinikilala ng United Nations Educational, Scientific and Cultural Organization (UNESCO) ang halaga ng cultural mapping sa pagpreserba sa ating mga tangible at intangible cultural assets.

☻☻☻

Layunin ng panukalang-batas na amyendahan ang Republic Act No. 10066 o National Cultural Heritage Act of 2009 at imamandato ang mga lokal na pamahalaan na magsagawa ng cultural heritage mapping ng tangible, intangible, natural, at built heritage sa kanilang mga komunidad.

Kikilalanin din ang karapatan ng ating mga indigenous peoples na magsagawa ng kanilang sariling cultural mapping.

Lilikha rin ng Cultural Mapping, Research, and Planning Division sa ilalim ng National Commission for Culture and the Arts, at ng Joint Congressional Oversight Committee upang matutukan ang implementasyon ng cultural mapping sa buong bansa.

Umaasa tayo na sa tulong ng panukalang-batas na ito ay maging mas matagumpay tayo sa pangangalaga sa pamana ng ating lahi na mahalagang salik ng ating kaakuhan bilang mga Pilipino.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice!

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US! Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBin

Para makasabay sa modernong teknolohiya… Alalay ng gobyerno, kailangan ng Salt Industry

BULGAR

ni Nancy Binay @Be Nice Tayo | February 5, 2023

Noong nakaraang araw, nakipagpulong tayo sa mga local salt industry stakeholders para pag-usapan kung dapat na bang amyendahan ang RA 8172, na mas kilala bilang ASIN (Act for Salt Iodization Nationwide) Law.

Napag-alaman natin sa isang pagdinig sa Senado na umaabot na sa 93% ng ibinibentang asin sa bansa ang imported, at 7% na lamang ang gawa sa Pilipinas.

Hindi natin matanto kung paano humantong sa ganito ang lokal na produksyon ng asin sa bansa sa kabila ng pagkakaroon ng Pilipinas ng isa sa pinakamahabang baybayin sa mundo.

Napapalibutan ang ating bansa ng tubig-dagat at mayroon tayong 36,000-kilometer shoreline na maaaring gamitin sa paggawa ng asin.

Sa kabila nito, bumaba na sa 42,000 metric tons (MT) ang salt production sa bansa kumpara sa 240,000 MT per year noong dekada sisenta at sitenta.

☻☻☻

Naisabatas ang ASIN Law noong 1995 at nakasaad dito na kailangang lagyan ng iodine ang asin bago ilabas o ibenta sa merkado para makatulong sa pag-iwas sa iba’t ibang uri ng sakit tulad ng goiter.

Sa kasamaang-palad, hindi lahat ng salt farmers ay kaya ang dagdag na gastos sa paglalagay ng iodine. Kulang din ang kanilang kaalaman sa pag-iodize dahil mahirap at matrabaho ang proseso nito.

☻☻☻

Hindi tayo tutol sa paglalagay ng iodine sa asin dahil nakakatulong ito na labanan ang problema ng iron deficiency.

Ang mas mahalagang pagtuunan ng pansin ay kung paano natin mabibigyan ng suporta ang industriya ng asin sa bansa, lalo na ang maliliit na salt farmers.

Sa kasalukuyan, hinihimok natin ang ating mga local salt business at cooperatives na makipagtulungan sa Philippine Coconut Authority para siguraduhing locally-produced salt ang bibilhing pataba para sa ating mga niyog.

Nananawagan din tayo sa Department of Agriculture (DA) at Department of Trade and Industry (DTI) na tulungan ang ating mga local salt farmers, lalo na sa paghahanap ng mga mamumuhunan na magdadala ng modernong teknolohiya sa kanila.

Patuloy tayo sa pakikipagpulong sa lahat ng local salt industry stakeholders at sisiguraduhin natin na hindi aalatin ang industriya ng asin sa ating bansa.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng mga kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice! ☻

Pagpapatupad ng VAT refund program sa 2024, dapat hassle-free

BULGAR

ni Nancy Binay @Be Nice Tayo | February 2, 2023

Nitong Linggo, inanunsyo ng Malacañang ang pag-apruba ni President Ferdinand Marcos, Jr. sa implementasyon ng value-added tax (VAT) refund program para sa mga foreign tourist sa 2024.

Ang refund program, na kasama sa “Quick Wins” na rekomendasyon ng Private Sector Advisory Council, ay nakikitang makakatulong sa paghikayat sa mga turista na dalawin ang bansa.

Kapag naisagawa na, maibabalik sa mga foreign travelers ang 12% VAT imposed sa goods and services na sinisingil sa bansa.

☻☻☻

Bago natin simulan ang hakbang na ito, mainam kung magsagawa ang Department of Finance (DOF) ng walk-through sa implementasyon ng VAT refund sa ating mga retail shop, department store, sea- at airports, at iba pang serbisyo.

Ito ay para masiguro na maipapatupad ito nang maayos, at ang proseso ay magiging convenient at hassle-free para sa mga turista.

Mahalaga rin na maipaliwanag ng DOF kung magkano ang aabuting administrative costs sa implementasyon nito, ilang percent ang mababawas sa collection natin, at ano ang magiging epekto at benepisyo ng VAT refund sa mga micro, small, and medium enterprises ng bansa.

☻☻☻

Kaugnay ng usaping MSME, maganda rin sigurong mabigyan natin sila ng complementary program sa VAT refund.

Halimbawa, dagdagan din natin ng incentives ang mga local enterprises at entrepreneurs na nagsusulong ng tunay na ‘Gawang Pinoy’ items kaysa sa mga tindahan na nagbebenta ng imported o foreign-manufactured products.

☻☻☻

Tina-target natin na umabot sa 4.8 million tourist arrivals ang Pilipinas ngayong taon.

Marami tayong kailangang ayusin upang madagdagan pa ang 2.65 million turistang tinanggap natin noong 2022.

Ang VAT refund program ay hakbang sa tamang direksyon sa muling pag-usbong ng turismo sa bansa.

☻☻☻

Paalala lamang sa lahat na patuloy pa ring mag-ingat sa paglabas ng bahay, magsuot ng face mask, ugaliing maghugas ng kamay, bigyang-halaga ang kalusugan, at huwag kalilimutang magdasal.

Malalagpasan din natin ito.

Be Safe. Be Well. Be Nice! ☻

. .

DENR at PHILSA, joint forces sa paglikha ng Natural Resources at geospatial database

Para makasabay sa modernong teknolohiya… Alalay ng gobyerno, kailangan ng Salt Industry

Pagpapatupad ng VAT refund program sa 2024, dapat hassle-free

RECOMMENDED