Pinoy street food, malaking ambag sa turismo

ni Nancy Binay @Be Nice Tayo | May 12, 2024

Natutuwa tayo dahil maging si Pangulong Ferdinand R. Marcos Jr. ay kinikilala ang halaga ng Pinoy street food sa pagpapaangat ng turismo ng bansa.

Isinulong ni Pangulong Marcos ang “Chibog” o food tourism sa kanyang vlog kamakailan.

Dito inisa-isa niya ang mga tanyag na pagkaing Pinoy na kinagigiliwan ng mga turista.

Bukod dito, hinimok rin ng Punong Ehekutibo ang ating mga kababayan na suportahan ang mga maliliit na negosyante na nasa food business. 

☻☻☻ 

Una na nating iminungkahi na dapat tulungang maiangat ang kalidad ng mga pagkaing Pilipino dahil malaki ang potensyal ng food tourism sa ating bansa.

Isa rin itong epektibong marketing tool dahil ang mga street delicacies ng Pilipinas ay nag-aalok ng raw at authentic na experience sa mga turista.

Kung tutuusin, ang mga street food sa bawat probinsya o rehiyon ay nakakatulong sa ating mayamang culinary traditions at nagpapakita na rin ng kultura ng Pilipinas.

Hindi nga ba’t dapat nating kilalanin ang mga malikhaing street vendors dahil sa kanilang angking talento sa paggamit ng mga simpleng lokal na rekado at gawin itong mga masasarap na putaheng maituturing na truly Pinoy.

☻☻☻ 

Dahil dito, pinag-aaralan natin kung kailangang paglaanan ng dagdag na pondo para sa susunod na taon ang Department of Tourism (DOT), partikular na para sa pagsusulong ng food tourism sa bansa.

Bilang Senate Committee on Tourism chairperson, nais nating itaguyod ang food tourism at maisakatuparan ang malaking potensyal ng pagbibida ng local delicacies at street foods ng Pilipinas lalo na’t kadalasang hanap ng mga turista sa pagbisita sa isang lugar ang sumubok ng mga lokal na putahe ng pinupuntahan nilang lugar.

☻☻☻ 

Patuloy pa rin tayong mag-ingat sa paglabas ng bahay, magsuot ng face mask pag kinakailangan, ugaliing maghugas ng kamay, bigyang-halaga ang kalusugan, at huwag kalilimutang magdasal. Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Maraming salamat, ex-Sen. Rene Saguisag!

ni Nancy Binay @Be Nice Tayo | May 9, 2024

Nitong nakaraang Martes ay pinarangalan ng Senado ang pumanaw na dating Senador Rene Augusto V. Saguisag.

Kilalang human rights lawyer si Rene Saguisag noong Martial Law. Bilang kasapi ng Free Legal Assistance Group (FLAG) at Movement of Attorneys for the Advancement of Brotherhood, Nationalism, and Integrity (MABINI), ipinagtanggol niya ang mga mahihirap, aktibista, mamamahayag, at marami pang iba na naging biktima ng pang-aabuso.

Nakita ko mismo ang pagmamahal at dedikasyon ni ex-Senator Saguisag sa kanyang bayan at kababayan, at ang walang pagod na pagtatrabaho niya para mabigyan ng katarungan ang mga ipinagtatanggol. 

Madalas akong isama ng aking amang si former Vice President Jojo Binay sa kanyang trabaho bilang abogado sa FLAG at MABINI. 

Noon ko nasaksihan si ex-Senator Saguisag na abala sa pagdalaw sa mga political detainees sa Fort Bonifacio, nakikibaka sa kalsada, at nakikipagpulong sa iba’t ibang personalidad gaya ni former Labor Secretary Bobbit Sanchez, Senator Joker Arroyo, Senator Jose Diokno, Senator Lorenzo Tañada, at iba pa. 

☻☻☻

Bagama’t anim na taon lamang siyang nagsilbi sa Senado, maganda ang legislative track record ni ex-Senator Saguisag.

Ilan sa mga kilalang batas niya ay ang Republic Act No. 6713 o Code of Conduct and Ethical Standards for Public Officials and Employees, at Republic Act No. 6770 o the Ombudsman Act of 1989. Kabilang din siya sa “Magnificent 12” senators na tumutol sa pananatili ng US bases sa bansa.

Bago siya mahalal sa Senado, nagsilbi rin siyang presidential spokesperson at legal counsel ni former Pres. Cory Aquino.

☻☻☻

Buong buhay na pinagsilbihan ni ex-Senator Saguisag ang ating mga kababayan. Kilala siya dahil sa kanyang pagka-simple, mapagkumbaba, galing, at pagmamalasakit para sa kapwa.

Kilala siya bilang Senator Saguisag. Ngunit para sa akin, siya si Tito Rene, na nakilala ko mula pagkabata. Ka-basketball ng aking ama, at kasama sa pakikibaka.

Maraming salamat sa paglilingkod-bayan, Tito Rene. Salamat rin sa magandang alaala. 

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Pagkilala sa mga Pinoy sa natatanging kontribusyon sa sining at kultura

ni Nancy Binay @Be Nice Tayo | May 5, 2024

Nitong nakaraang linggo ay kinilala natin sa Senado ang siyam na nakatanggap ng National Living Treasures Award or Gawad sa Manlilikha ng Bayan (GAMABA) para sa kanilang natatanging kontribusyon sa kulturang Pilipino.

Kabilang sa siyam na awardees sina Adelita Romualdo Bagcal (Ilocano Oral Traditions), Abina Tawide Coguit (Agusan Manobo Embroidery), at Haja Sakinur-ain Mugong Delasas (Sama Dance).

Nariyan din sina Bundos Bansil Fara na kinilala sa kanyang kontribusyon sa T’boli Brasscasting, Marife Ravidas Ganahon (Higaonon Mat Weaving), at Amparo Balansi Mabanag (Ga’dang Beadworks and Embroidery).

Kasama rin sina Samporonia Pagsac Madanlo (Mandaya Textile Weaving), Barbara Kibed Ofong (T’boli Textile Weaving), at Rosie Godwino Sula (T’boli Chanting).

Isinabatas ang Republic Act (RA) No. 7355 o ang Manlilikha ng Bayan Act para kilalanin ang natatanging kontribusyon ng mga Pilipino pagdating sa pagpapalago at pag-aalaga ng traditional folk art.

Bukod sa pagbibigay ng pagkilala, nagkakaloob din ang pamahalaan ng financial resources para lalo pang mapagtibay at maprotektahan ang ating traditional folk art and culture.

☻☻☻

Kinilala rin sa Senado ang 26 na nakatanggap ng 16th Ani ng Dangal Awards (ADA).

Kabilang sa mga nakatanggap ng ADA ay sina Sam Manacsa, JT Trinidad, Stephen Lopez, Whammy Alcazaren, Kayla Abuda Galang, Nathan Carreon Lim, at Ma-an Asuncion-Dagnalan na pinarangalan at nabigyan ng award sa international film festivals.

Kinilala rin sina Kristel de Catalina, Legit Status, La Salle Filipiniana Dance Company, Folk Jumpers, Rhea R. Marquez, Julius Jun M. Obero, Edelyn P. De Asis, HQ Dance Collective, at ang Halili-Cruz School of Ballet dancers na ipinakita ang kakayahan ng mga Pilipino sa mga dance competitions sa ibang bansa.

Samantala, sina Jannina Eliana Pena, De La Salle University Chorale, Jose Emmanuel D. Aquino, Young Voices of the Philippines, Kammerchor Manila, at Anthony Villanueva ay nagbigay karangalan sa bansa sa pamamagitan ng kanilang talento sa musika.

Sina Albert Emir Reyes at Domcar Calinawan Lagto naman ay nagwagi sa mga visual arts competitions sa France at China.

Tunay na hindi matatawaran ang kultura ng Pilipinas at ang talento nating mga Pilipino. Congratulations sa lahat!

☻☻☻

Patuloy pa rin tayong mag-ingat sa paglabas ng bahay, magsuot ng face mask pag kinakailangan, ugaliing maghugas ng kamay, bigyang-halaga ang kalusugan, at huwag kalilimutang magdasal. Be Safe. Be Well. Be Nice!

---

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay