POGO, itigil na

ni Nancy Binay @Be Nice Tayo | July 18, 2024

Oras na ba para tuluyang ipagbawal ang Philippine Offshore Gaming Operators (POGO) sa bansa?

Kung Department of Finance ang masusunod, kailangang ipagbawal na sila dahil mas malaki ang perhuwisyo kaysa benepisyo na dala ng mga ito.

Ayon sa DOF, nasa P166.49 billion lamang ang annual total economic benefits ng mga POGO. Samantala, nasa P265.74 billion naman ang total economic cost.

Ibig sabihin, nasa P99.52 billion kada taon ang nawawalang kita ng bansa dahil sa pananatili ng mga POGO.

Ang mga economic benefit, na maaaring direct at indirect, ay tumutukoy sa mga tax at gaming revenue, private consumption spending, real estate, atbp., habang ang indirect benefits naman ay mga economic at fiscal multiplier effects, sabi ng DOF.

Kasama naman sa direct economic costs ang lost investment opportunities, additional costs of law enforcement, at impact to tourism. 

☻☻☻

May social costs din na hindi kasama sa analysis ng DOF, ngunit kailangang isaisip din.

Nariyan ang mga krimen na nangyayari dahil sa pagpasok ng mga ilegal na elemento.

Lumalala rin ang korupsyon sa iba’t ibang sektor dahil sa POGO.

Ilang beses na nating pinuna ang mga anomalyang nagaganap sa ating mga immigration agency. Idagdag na rin natin ang katiwalian sa Philippine Statistics Authority na pinagmumulan ng mga pekeng birth certificate at iba pang dokumentong ipinagkakaloob sa mga illegal Chinese immigrant.

Kailan natin sasabihing tama na, sobra na?

Nawa’y sa lalong madaling panahon ay matigil na ang ating POGO love affair. 

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Mental health,'wag gawing palusot para 'di dumalo ng hearing

ni Nancy Binay @Be Nice Tayo | July 13, 2024

Nitong nakaraang linggo, hindi dumalo si Bamban, Tarlac Mayor Alice Guo sa pagdinig ng Senate Committee on Women, Children, Family Relations and Gender Equality tungkol sa POGO at isyu ng citizenship na kanyang hinaharap.

Ang nakakalungkot dito, ginamit niya ang mental health bilang palusot para hindi siya dumalo ng hearing sa Senado.

Sumulat si Guo sa komite kung saan kinumpirma nitong hindi siya makakadalo dahil sa isyu ng kanyang kalusugan at naapektuhan na umano ang kanyang mental health.

Seryoso ang usapin ng mental health kaya naman nababahala tayo na tila ginagamit itong convenient excuse para hindi dumalo sa imbestigasyon sa Kongreso.

Dapat maging maingat ang mga komite na nagsasagawa ng kani-kanilang mga pagdinig ‘in aid of legislation’ dahil baka abusuhin ng resource persons ang mental health claim para makaiwas sa pagdalo sa mga pagdinig.

Ang hindi pagdalo ni Guo sa pagdinig ng Senate committee on women na naghahatid ng mapanganib na mensahe na ang mental health ay maaaring manipulahin bilang isang legal shield.

Ang ayaw nating mangyari ay magamit ang Senado, at maging precedent sa mga susunod na pagdinig.

Bukod sa tila paggamit dito bilang palusot para umiwas sa legal responsibilities, nakakadagdag din ito sa pagpapanatili ng stigma sa mga taong may mental health condition.

Mahalaga na magkaroon ng balanse sa pag-check at pag-unawa sa totoong mental health issue para mapigilan ang pag-abuso nito.

Ang sa akin lang, nakakahiya naman doon sa mga tunay na may mental health condition.

Hindi tayo magsasawang sabihin na seryosong usapin ang mental health at hindi ito dapat ginagamit na dahilan para magsinungaling.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay

Japan at ‘Pinas, nagkasundo sa pagdepensa sa soberanya

ni Nancy Binay @Be Nice Tayo | July 11, 2024

Kamakailan lang ay pinirmahan ang isang kasunduan sa pagitan ng Japan at ating bansa tungo sa pagdepensa ng ating soberanya.

Nilagdaan nina Defense Secretary Gilberto Teodoro at Japan Foreign Minister Yoko Kamikawa nitong Lunes ang Reciprocal Access Agreement. Ang RAA na ito ang unang kasunduan ng Japan sa Asia.

Pinapayagan ng RAA ang pagpasok ng Japanese armed forces sa Pilipinas para magsagawa ng mga joint combat drills. Gayundin, makakapasok ang ating mga tropa sa Japan para sa parehong layunin.

Naniniwala tayong malaki ang maitutulong ng RAA sa pagpapalakas ng ating national defense and security.

Kailangan pa ng ratipikasyon ng kasunduang ito sa lehislatura, ngunit inaasahan natin na maipapasa ito sa Senado.

☻☻☻

Sa susunod na linggo ay sisimulan na ng Philippine Statistics Authority ang pangangalap ng data para sa population census at Community-Based Monitoring System (CBMS).

Nasa 27 million households ang inaasahang maaabot ng 70,000 enumerators sa pagkalap ng impormasyon tungkol sa mga pamilya mula July 15 hanggang Sept. 15.

Hinihimok natin ang ating mga kababayan na makipagtulungan sa PSA at sagutin nang maayos ang mga itatanong ng PSA.

Mahalaga ang mga impormasyon na makakalap nila sa pagtukoy ng populasyon ng ating bansa at sa kung sino ang mga nakikinabang sa mga social protection program ng pamahalaan.

Ang mga impormasyon din na makakalap ay mahalaga sa pagplano, paglikha, at pag-implementa ng iba’t ibang programa at proyekto para sa kapakanan ng mga kababayan natin. 

Base sa huling census na isinagawa noong 2020, nasa 109 milyon ang populasyon ng bansa.

☻☻☻

Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.

Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice!

FOLLOW US!  Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay