Milyun-milyong pamilya, gutom.. Food stamp sa walang makain — P-BBM

ni Mylene Alfonso | May 23, 2023

Nais ni Pangulong Ferdinand "Bongbong" Marcos, Jr., na magtatag ng isang nationwide food stamp program sa ilalim ng kanyang administrasyon sa pakikipagtulungan sa Asian Development Bank (ADB).

Ayon kay Marcos, ito ay kabilang sa mga paksang tinalakay niya kay ADB President Masatsugu Asakawa at iba pang matataas na opisyal ng ADB.

Ani Marcos, ang naturang programa ay unang iminungkahi ng Department of Social Welfare and Development (DSWD) na kabilang sa nakahanay na proyekto ng gobyerno na lubos na makatutulong sa publiko.

Una nang inilutang ni DSWD Secretary Rex Gatchalian ang ideya noong unang bahagi ng taon, bilang tugon sa survey ng Social Weather Stations (SWS) kung saan tatlong milyong pamilyang Pilipino ang nakararanas ng gutom.

Layunin ng programa na mabigyan ng mga coupons ang mga pamilya at indibidwal na mababa lamang ang kita, na magagamit nila sa pag-avail ng mga pagkain.

Tinalakay din ni Marcos sa ADB ang pakikipagtulungan nito sa Civil Service Commission hinggil sa digital technology at iba pang “large-scale” projects.

"Now the scope of the ODA (official development assistance) that we get through ADB has now increased and we are now talking about agriculture, re-skilling and retraining, and climate change and its mitigation and adaptation,” wika ng Pangulo.

100-year-old Manila Central Post Office, natupok

ni Mylene Alfonso, Mai Ancheta at Alvin Fidelson | May 23, 2023

Pito katao ang nasugatan matapos masunog ang halos 100 taon nang gusali ng Philippine Postal Corporation-Manila Central Office na nasa Liwasang Bonifacio, Magallanes Drive, Ermita, Maynila.

Batay sa inisyal na ulat ng Manila Bureau of Fire Protection (BFP), alas-11:43 ng hatinggabi nang magsimula ang sunog sa Philpost na umabot sa general alarm at idineklarang fire under control alas-7:22 ng umaga.

Sa ulat, nagsimula umano ang sunog sa basement ng gusali at agad na umakyat hanggang sa ikaapat na palapag ng gusali.

Kabilang sa mga nasugatan ang limang BFP firemen na sina FO2 Joel Libutan, FO1 Carlo Abrenica, SFO2 Julio Erlanda, FO2 Jeremy Roque at FO1 Josaphat Araña sanhi ng mga paso sa katawan.

Gayundin, nagkaroon ng sugat sa kaliwang kamay ang fire volunteer na si Toto Doslin at Elaine Dacoycoy, 16, na nagtamo ng bali sa katawan.

Tinaya ng BFP na nasa P300 milyon ang halaga ng napinsalang ari-arian.

Nasunog din ang mga parcel at sulat habang ang mga files at documents ay nasa cloud storage o naka-save online.

Papalitan naman ng Philippine Statistics Authority (PSA) ang mga Philippine Identification cards na nasunog.

Batay sa inisyal na impormasyong ibinigay ng PHLPost, tanging PhilIDs ng mga taga-lungsod ng Maynila ang naapektuhan ng sunog, at inaalam na kung ilan ang mga ito.

Hindi kasama sa nasunog ang PhilIDs na ide-deliver sa ibang mga lugar dahil ang mga ito ay nakaimbak sa Central Mail Exchange Center ng PHLPost sa Pasay City.

Kaugnay nito, nanghihinayang at nalulungkot si Postmaster General Luis D. Carlos sa insidente.

“Masusi po kaming nakikipag-ugnayan sa Bureau of Fire Protection sa posibleng sanhi ng sunog na tumupok sa gusali ng MCPO”, ani PMG Carlos.

Ayon kay Carlos, pinapayuhan nila ang kanilang mga kliyente sa Manila Central Post Office na sa halip ay pumunta sa kanilang sangay sa Maynila, Ermita Post Office at Metro Manila.

Sinisiguro nila sa publiko na bukas pa rin at tuloy ang serbisyo ng Post Office sa buong bansa upang tumanggap at maghatid ng sulat at parsela.

Siniguro naman na maghahanap sila agad ng temporary office at ililipat muna ang kanilang mga kartero mula sa Manila Central Post Office papunta sa kanilang mga karatig na sangay sa Maynila.

Solusyon sa kapos na tubig at kuryente.. P-BBM: Tipid pa more

ni Mylene Alfonso | May 22, 2023

Umapela si Pangulong Ferdinand "Bongbong" Marcos, Jr., sa mga Pilipino at sa local government units na magtipid sa tubig at kuryente habang naghahanda ang bansa para sa El Niño.

Ayon kay Marcos, kabilang dito ang pagtitipid ng tubig sa mga car wash, golf course at pagre-refill ng mga swimming pool.

"Ang DILG (Department of the Interior and Local Government), inatasan natin na paratingin sa mga LGU ang kampanya natin sa pag-mitigate ng impact ng El Niño gaya ng pagtitipid ng tubig sa bahay, sa mga car wash, sa mga pagdidilig ng golf course at pagre-refill ng mga swimming pool," pahayag ni Marcos sa kanyang pinakabagong vlog na pinamagatang "Ang Init" na inilabas noong Sabado ng gabi.

Ayon sa Pangulo, makatutulong ito sa pagpapanatili ng suplay at mahalaga ang partisipasyon ng bawat isa.

"Ito ay inaasahang makakatulong sa pagpapanatili ng ating supply,” wika pa ni Marcos.

Sinabi rin ni Marcos na ang mainit na panahon kasi sa bansa ay lumikha ng pangangailangan ng kuryente na lampas sa suplay.

Bumaba rin aniya ang ulan ng 35 porsyento na nakakaapekto sa mga hydroelectric power plant, dam at irigasyon.

Aniya, matagal nang sinusuportahan ng gobyerno ang mga proyektong makakatulong sa pagbuo o pag-imbak ng higit na enerhiya para sa Pilipinas.

“Ang energy production ay pinapaigting sa pagbubukas ng mas maraming renewable energy sources,” ani Marcos.

“Kailan lang ay in-extend natin ang Malampaya service,” giit ng Punong Ehekutibo.

"Sinusuportahan din natin ang mga bagong teknolohiya tulad ng battery storage para maging sustainable at reliable pa ang ating renewable sources of energy," dagdag pa niya.

Bukod dito, inumpisahan na rin ng pamahalaan ang paghahanda para sa posibleng La Niña matapos ang tagtuyot.

"Sa kabila ng matinding tagtuyot ay naghahanda din tayo para naman sa La Niña o matinding tag-ulan na may dala-dala ring ibang problema," paliwanag ni Marcos.

“Ito ay nangangailangan ng partisipasyon ng bawat isang kababayan nating Pilipino,” pagtatapos ng Pangulo.