Corals na ibinebenta online nakumpiska, 3 huli

ni Mylene Alfonso | June 3, 2023

Nasabat ng National Bureau of Investigation (NBI)-Environmental Crime Division (NBI-EnCD) ang 999 iba't ibang klase ng coral species sa isinagawang operasyon sa Biñan, Laguna.

Naaresto rin ng ahensya sina Diomedes Velaso, Judith Velasco at Jamille Velasco.

Habang hindi naman inabutan sa bahay ang mag-asawang Jairo at Richelle Velasco na target ng operasyon.

Nag-ugat ang operasyon matapos makatanggap ng impormasyon ang NBI-EnCD na ang mag-asawa ay nag-iingat ng mga corals sa kanilang bahay sa Bgy. San Antonio, Biñan at ibinebenta ang mga ito online nang walang kaukulang permit.

Nagsagawa ng serye ng surveillance at nang makumpirma ay agad na nag-apply ng search warrant.

Nitong Mayo 29, kasama ng mga operatiba ng NBI-EnCD ang BFAR at pinuntahan ang lugar kung saan naaresto ang mga suspek.

Sinampahan ng kasong paglabag sa Section 96, Ban on Coral Exploitation and Exportation ng R.A. 8550 as amended ang mga suspek sa Biñan Prosecutors Office

Panukalang batas, maraming 'butas'.. Apela kay P-BBM, Maharlika, ibasura

ni Mylene Alfonso | June 3, 2023

Hinikayat ni Senate Minority Leader Aquilino 'Koko' Pimentel III si Pangulong Ferdinand 'Bongbong' Marcos, Jr., na i-veto ang naipasang Maharlika Investment Fund (MIF) bill.

Hiniling din ni Pimentel na ibalik ng Palasyo sa Kongreso ang MIF bill upang maiwasto.

"The bill, in its current form, is not acceptable. I am calling on the President to exercise his veto power and return the measure to Congress," hirit ng senador.

“It is in the best interest of the Filipino people and the administration if the measure is sent back to Congress, so we will have the chance to take a second look at the measure in order to address the concerns raised by many sectors,” wika pa ni Pimentel.

Aniya ang mga “butas” sa panukalang batas na ipinunto na ni Sen. Francis Escudero ay bunga ng pagmamadali na maipasa ito.

Diin pa ng senador, tadtad ng mga malabong probisyon, kontradiksyon at butas ang panukalang batas.

"By returning it to Congress, it will allow us to resolve conflicting provisions and add more safeguards to protect the funds and foster transparency and accountability," dagdag pa ni Pimentel.

Wala nang face-to-face transaction.. Mobile app kontra korup — P-BBM

ni Mylene Alfonso | June 3, 2023

Inilunsad kahapon ng gobyerno ang "e-Gov Super App", isang komprehensibong platform para pagsama-samahin ang maraming serbisyo, i-streamline ang mga proseso at labanan ang katiwalian.

Ayon kay Pangulong Ferdinand 'Bongbong' Marcos, Jr., mahalaga ang e-governance bilang isang paraan upang makasabay sa mga modernong pag-unlad.

"There is another part of this that is extremely important, that we sometimes do not talk about, and that is the lessening of corruption. Because you do not have to talk to a person at all for the entire process, wala kang kausap na tao. There’s no discretion that’s being exercised at any point. It’s either yes, no, yes, no… it’s binary,” wika ni Marcos sa app unveiling sa President Hall sa Malacañang kahapon.

"That way, it simplifies the process, especially for the citizens and there is no discretion being exercised by anyone. Eh, kung 'di mo 'ko lagyan, hindi ko ipapaano ito. Iipitin ko ito, mga ganon. Kausapin mo si ganito, ganyan, siya mag-aayos, ‘yung fixer niya.

Mawawala na ‘yan. We owe that to the people,” banggit ni Marcos.

Sa paglulunsad, sinabi ng Pangulo na dapat din pangasiwaan ng gobyerno ang mabilis na pag-unlad ng interconnectivity infrastructure at digitalization ng bansa upang mapalakas ang ekonomiya kung saan nahuhuli ang Pilipinas.

“And… the whole idea of e-governance is something that we need to do because we have fallen behind,” dagdag pa ni Marcos.

Sa pamamagitan ng Super App, maa-access at mapakikinabangan ng mga Pilipino ang mga serbisyo ng gobyerno, tulad ng valid personal identification sa digital format, mahahalagang pang-araw-araw na pangunahing serbisyo ng gobyerno kabilang ang e-tourism at e-travel services; e-payments at banking services; at maging ang kapaki-pakinabang na balita at impormasyon tungkol sa iba't ibang paksa.

"We hope with the beginnings of this e-governance system, that a senior living in an isolated place, an isolated island somewhere who, by the time we will have connectivity, can just go on to their phone (and transact),” hirit pa ng Pangulo.