Romualdez, bahala sa mga agenda ni P-BBM

ni Mylene Alfonso | June 12, 2023

Bago nagsara ang unang regular session ng 19th Congress, natapos ng Kamara ang 577 panukalang batas.

Nasa 33 sa 42 priority measures ang inaprubahan ng House of Representatives na kabilang sa priority bills ng administrasyong Marcos at Legislative-Executive Development Advisory Council (LEDAC).

Ayon kay Surigao del Norte Rep. Robert Ace Barbers, hindi maitatanggi na si Speaker Martin Romualdez ang pinakapinagkakatiwalaan ni Pangulong Ferdinand Marcos, Jr. at kailangan umano ng administrasyon ng tulong upang maabot ang minimithi nitong

“Agenda for Prosperity”.

Wala umanong duda na magtutuluy-tuloy ang magandang performance ng Kamara de Representantes.

Samantala, tinawag namang 'action man' nina Davao de Oro 1st District Rep. Maria Carmen Zamora at Davao Oriental 2nd District Rep. Cheeno Miguel Almario si Romualdez, dahil sa mabilis umano nitong pagtugon sa pangangailangan ng kanilang constituents, partikular sa panahon ng kalamidad.

Mapalad umano silang maging kasapi ng 19th Congress sa ilalim ng liderato ng Speaker.

SC, nagdesisyon na sa agawan sa teritoryo.. Mayor Abby, fake news! — Taguig

ni Mylene Alfonso | June 11, 2023

Nagpahayag ng pagkaalarma ang lokal na pamahalaan ng Taguig kaugnay sa ipinalalabas na pagbubukas muli ng Taguig-Makati territorial dispute bagama't pinal na itong nadesisyunan ng Korte Suprema.

Sa isang pahayag na ipinalabas ng Taguig City, sinabi nito na tinuring lamang nila na “fake news” ang mga unang kumakalat na social media posts na nagsasabing nakausap ni Makati City Mayor Abby Binay sina Pangulong Ferdinand Marcos, Jr., First Lady Liza at Chief Justice Alexander Gesmundo para muling buksan ang kaso ng territorial dispute.

Gayunman nang sundan umano ito ng panayam kay Binay noong Hunyo 7, 2023 at sinabi nitong mayroong natanggap na dokumento mula sa Korte Suprema ang Makati City na nagtatakda ng oral argument ay ito na ang nakakaalarma dahil wala umano itong katotohanan, sa katunayan walang natatanggap na kautusan ang Taguig hinggil dito.

Pinunto pa ng Taguig na mismong si SC Spokesman Atty. Brian Keith Hosaka ang naglinaw na walang itinatakdang oral arguments hinggil sa territorial dispute dahil nagkaroon na ng Entry of Judgement sa kaso.

“Mayor Binay’s statement during her interview is unfortunate. Not only is it factually inaccurate, but it likewise tends to tarnish the integrity and independence of the judiciary. We ask the Honorable Supreme Court to take notice of these claims from Makati and consider appropriate action,” giit pa ng Taguig.

Giit pa na mahaba ang tinakbo ng kaso at anumang naging desisyon sa kaso ay dapat na igalang.

Ang final and executory decision sa Makati-Taguig dispute ay ipinalabas ng SC noong Setyembre 28, 2022 matapos nitong ibasura ang Motion for Reconsideration ng Makati City, sa nasabing desisyon, sinabi ng SC na wala nang anumang pleadings, motions, letters o anumang komunikasyon ang tatanggapin na may kaugnayan sa usapin.

Maging ang apela ng Makati na iakyat sa SC en banc ang kaso ay ibinasura rin sa kawalan ng merito at ang tangka nitong paghahain ng ikalawang Motion for Reconsideration ay hindi pinapayagan sa rules of procedure.

Nilinaw ng Taguig na may kumpiyansa ito sa national leadership subalit ang ikinababahala nila ay ang negatibong epekto sa isip ng mga residente sa mga pahayag ng Makati City ukol sa isyu.

Bumuwelta rin ang Taguig sa pahayag ni Binay na hindi kayang ibigay ng lokal na pamahalaan ang mga naibibigay ng lungsod gaya ng Makati sa mga residente nito.

“We assure Mayor Binay and the residents of the concerned barangays that Taguig has its own programs and projects which deliver efficient and timely public services aimed at attaining our vision for a transformative, lively, and caring community."

Dagdag-toll fee sa NLEX, start sa June 15

ni Mylene Alfonso | June 11, 2023

Asahan na ang mas mataas na singil sa toll rates sa mga motorista ng North Luzon Expressway (NLEX) simula Hunyo 15 kasunod ng pag-apruba ng Toll Regulatory Board (TRB).

Base sa pahayag ng NLEX Corp., dapat nang magbayad ang mga motoristang bumibiyahe sa loob ng open system ng karagdagang P7 para sa Class 1 na sasakyan (regular na sasakyan at SUV), P17 para sa Class 2 na sasakyan (bus at maliliit na trak), at P19 para sa Class 3 na sasakyan (malalaking trak) habang magbabayad ng 36 centavos kada kilometro ang mga bibiyahe sa loob ng close system.

Habang ang open system ay mula sa mga lungsod ng Navotas, Valenzuela, at Caloocan hanggang Marilao, Bulacan at sakop naman ng closed system ang sumasakop sa pagitan ng Bocaue, Bulacan at Sta. Ines, Mabalacat City, Pampanga kasama ang Subic-

Tipo. Samantala, ang mga bibiyahe sa NLEX end-to-end sa pagitan ng Metro Manila at Mabalacat City ay magbabayad naman ng karagdagang P33 para sa Class 1, P81 para sa Class 2, at P98 para sa Class 3 na sasakyan.

Ipinaliwanag ng kumpanya na ang mga bagong rate ay bahagi ng authorized periodic adjustments noong taong 2012, 2014, 2018, at 2020.

"TRB allowed NLEX to collect this year the fourth and last tranche of the 2012 and 2014 periodic adjustments and only half of the 2018 and 2020 increases to help curb the existing inflationary situation and cushion their impact on the users of the expressway," pahayag ng NLEX.

Nabatid na mananatili pa rin sa lumang rate ang mga public utility jeepney sa ilalim ng NLEX Pass-ada at Tsuper Card discount at rebate programs ayon pa sa NLEX.