Container registry, monitoring system, ipinababasura

ni Mylene Alfonso | June 20, 2023

Muling nanawagan ang Alliance of Concerned Truck Owners & Organizations (ACTOO), ang pinakamalaking grupo ng mga trucker sa bansa, na alisin ang container registry and monitoring system o mas kilala sa tawag na TOP-CRMS.

Ayon sa grupo, mayorya ng mga trucker ang kontra sa nasabing sistema.

Naniniwala ang grupo na hindi umano kailangan at pabigat lang sa kanilang hanay ang container registry and monitoring system na nais ipatupad ng Philippine Ports Authority (PPA).

Nakakadagdag lang din umano sa kaguluhan ang nasabing sistema sa trucking industry bukod sa dagdag-gastos pa ito para sa mga truck owners at operator.

Ayon pa sa ACTOO, ang Confederation of Truckers Association of The Philippines (CTAP), ang tanging grupong pabor sa panukala, ay ‘misinformed’ at ‘misled’ umano sa nasabing isyu.

“We urge the PPA to immediately scrap this burdensome and unnecessary system,” ayon kay ACTOO Chairman Ricky Papa

Pembo residents nagpasaklolo, take over pinamamadali

ni Mylene Alfonso | June 19, 2023

Sa harap ng diskusyon sa Taguig-Makati territorial dispute na pinal nang nadesisyunan ng Korte Suprema, lumiham sa lokal na pamahalaan ng Taguig ang mga residente ng Pembo, Makati para madaliin ang kanilang pag-takeover at mailipat na sila bilang mga residente ng lungsod.

Sa dalawang pahinang liham na naka-address sa mga opisyal ng lungsod mula sa grupo na Mandirigma ng Pembo, sinabi nito na mismong sila na mga residente ang gumagawa ng paraan para i-counter ang mga fake news patungkol sa posibleng negatibong idudulot ng final and executory decision ng SC.

Layon din ng liham na alamin kung ano ang mga maaari nilang asahan sa lungsod sa oras na maisakatuparan ang takeover, anila, mainam na ilahad ito upang mawakasan na ang agam- agam sa paglilipat ng mga residente.

Inamin din ng mga residente sa kanilang liham na mayroong nangyayaring mga black propaganda para siraan ang Taguig at mismong mga barangay officials na appointees at nasa hold over position umano ang nagsasagawa nito.

Hangad umano nila na mailipat na sa Taguig para makaiwas na sa pamumulitika.

Gusto trabaho.. Mga Pinoy, ayaw umasa sa ayuda — P-BBM

ni Mylene Alfonso | June 19, 2023

Tinatrabaho na ng administrasyon ni Pangulong Ferdinand Marcos, Jr., na magbigay ng mga livelihood packages para sa mga marginalized dahil mas gusto ng mga Pilipino na magtrabaho para sa kanilang mga pamilya sa halip na humingi ng ayuda mula sa gobyerno.

Sa kanyang vlog, sinabi ni Marcos na ang mga cash grant na ipinamahagi sa mga mahihirap na lugar ay dinagdagan ng livelihood packages.

"Nakikita natin sa panahon ng kahirapan, ang ugali ng Pilipino ayaw nilang umaasa at basta nag-aantay na lang ng ayuda, basta’t nag-aantay na lang,” pahayag ni Marcos.

“Ang Pilipino, nasa ugali talaga natin na masipag tayo. Mas maganda para sa bawat Pilipino na sila ay nagtatrabaho, na mayroon silang aasahang kikitain at nang mayroon silang pag-asa na gumanda pa ang kanilang mga hanap-buhay,” saad ng Pangulo.

"Mas gusto nila na magtrabaho kaysa umasa na lang sa ayuda,” wika pa niya.

Nabatid na matagal nang namamahagi ang gobyerno ng mga farm machineries mula sa Department of Agriculture, mga scholarship mula sa Technical Education and Skills Development Authority (TESDA) at mga livelihood package mula sa Department of Trade and Industry, ayon kay Marcos.

"Lahat ng ito sa isang lugar lang namin inilagay nang sa gayon ay mas madali para sa ating mga kababayan," punto ni Marcos.

“Ito ay hindi lang mga ayuda na salapi kundi ayuda ng pagkakataon para sa mga mamamayang Pilipino nang mabigyan sila ng pagkakataon na makapaghanapbuhay at hindi lang umaasa na tumatanggap ng biyaya,” dagdag pa ng Punong Ehekutibo.