Dahil sa 'kin — P-BBM.. Bitay sa 2 OFW na sangkot sa droga, binawi

ni Mylene Alfonso | June 25, 2023

Nagpasalamat si Pangulong Ferdinand Marcos, Jr., sa pangulo ng United Arab Emirates na si Sheikh Mohamed Bin Zayed Al Nahyan sa pagpapatawad sa tatlong nahatulang Pilipino, dalawa sa kanila ay nasa death row, na nagsisilbi na sa kanilang sentensya sa Emirate state.

Sa isang tawag sa telepono kay Sheikh Mohamed, nagpahayag ng pasasalamat si Marcos sa pagbigay ng kahilingang ginawa niya dalawang buwan na ang nakararaan.

Ibinalita ni Interior Secretary Benjamin Abalos, Jr. ang balita kay P-BBM nitong Huwebes matapos makatanggap ng mensahe mula kay UAE Ambassador to the Philippines Mohamed Obaid Salem Alqataam Alzaabi.

“Good evening Secretary. I am pleased to inform you that the appeal of President Ferdinand Marcos, Jr. for three Filipinos, two of which are sentenced to death because of drug trafficking and 1 sentenced for 15 years for the crime of slander, has been granted for humanitarian pardon by our President H.H. Sheikh Mohamed Bin Zayed Al Nahyan,” pahayag ng UAE Ambassador kay Abalos.

Sa dalawang magkahiwalay na liham noong Abril 27, hiniling ni Marcos kay Sheikh Mohamed na bigyan ng humanitarian pardon ang tatlong bilanggo na Pilipino.

Pinasalamatan din ni Marcos si Sheikh Mohamed sa pagbibigay ng tulong sa mga pamilyang lumikas dahil sa pagputok ng Bulkang Mayon, kung saan nagpadala ang UAE ng 50 toneladang food supplies at gamot sa mga bakwit.

Sa kanyang bahagi, binanggit ni Sheikh Mohamed ang mahalagang kontribusyon ng humigit-kumulang 600,000 Pilipinong nagtatrabaho sa UAE.

Inulit din ni Sheikh Mohamed ang kanyang imbitasyon kay Marcos na dumalo sa 2023 United Nations Climate Change Conference sa Dubai sa Disyembre.

Ang imbitasyon ay unang ipinaabot kay Pangulong Marcos ni UAE Ambassador

Mohamed sa kanyang courtesy call sa Malacañang noong nakaraang linggo.

Sa kanyang panig, inimbitahan ni Marcos si Sheikh Mohamed na pumunta sa Pilipinas, na nagsasabing palaging malugod na tinatanggap ang pinuno ng UAE na pumunta sa bansa.

NLEX, nagtaas na ng toll fee, palpak pa rin — Sen. Gatchalian

ni Mylene Alfonso | June 24, 2023

Isang linggo mula nang tumaas ang singil sa toll fee sa North Luzon Expressway (NLEX), patuloy ang reklamo ng maraming gumagamit dito sa lumalalang sitwasyon ng trapiko, lalo na kapag peak hours.

Ayon kay Senador Win Gatchalian, dapat inudyok na muna ng Toll Regulatory Board (TRB) ang operator ng NLEX na tugunan ang problema sa trapiko sa kahabaan ng toll road bago ito pumayag na magtaas ng toll.

“Imbes na magtaas ng toll sa NLEX, dapat inobliga ng TRB ang NLEX Corporation na ayusin ang problema sa choke points sa kahabaan ng toll road. Dapat sinukat muna ng TRB ang performance ng expressway,” ani Gatchalian.

Sinabi pa ng senador na ang pumapalpak na electronic toll collection system ng NLEX Corporation ay isang sanhi ng pagsisikip ng trapiko sa mga toll booth.

Dapat ding tiyakin, aniya, ng NLEX ang regular na pagpapanatili ng isang maayos at ligtas na expressway para sa kaginhawaan ng mga gumagamit ng daan.

Sinabi rin ng senador na ang sitwasyon ng trapiko sa kahabaan ng NLEX ay inaasahang lalala pa kapag nagbukas na sa 2027 ang bagong international airport na itatayo sa Bulacan.

Ipinatupad kamakailan ng NLEX ang provisional toll adjustment na karagdagang P7 sa “open system” nito para sa Class 1 na sasakyan tulad ng mga kotse, jeepney, van, o pickup mula Balintawak hanggang Marilao sa Bulacan.

May karagdagang toll fee naman na P17 para sa Class 2 na sasakyan tulad ng mga bus at light truck at karagdagang P19 para sa Class 3 na sasakyan tulad ng mga malalaki at mabibigat na trailer truck.

Sa “closed system” naman, nagbabayad na ngayon ang mga motorista ng karagdagang P26 para sa Class 1, P65 para sa Class 2, at P77 para sa Class 3 mula Marilao hanggang Sta. Ines sa Mabalacat, Pampanga.

Batay sa Consolidated Resolution ng TRB Case Nos. 2018-02 at 2020-07 ng TRB, staggered basis ang pagpapatupad ng toll increase sa 2023 at 2024.

Nangangahulugan na bukod aniya sa pagtaas ng toll ngayong taon, magkakaroon pa ng karagdagang pagtaas sa susunod na taon.

P5.768-T budget para sa 2024, aprub na kay P-BBM

ni Mylene Alfonso | June 24, 2023

Aprubado na ni Pangulong Ferdinand Marcos, Jr., ang P5.768 trilyong panukalang budget para sa taong 2024 na inaasahan ng administrasyon na isusumite sa Kongreso ilang linggo matapos ang kanyang State of the Nation Address (SONA) sa Hulyo 24.

Sinabi ni Budget Secretary Amenah Pangandaman, mas mataas ito ng 9.5 percent kumpara sa kasalukuyang budget na P5.268 trilyon.

Ayon kay Pangandaman, patuloy na bibigyang prayoridad ni Marcos ang mga programa para sa economic growth ng bansa.

Nakapaloob aniya ito sa Philippine Development Plan (PDP) 2023-2028 at 8-point socioeconomic agenda.

Dagdag pa ni Pangandaman na nasa P5.90 trilyong budget ang natanggap na pambansang pondo ng ahensya.

"Guided by our Medium-Term Fiscal Framework, the proposed national budget will continue to prioritize expenditures outlined in the administration's 8-Point Socioeconomic Agenda and cater to the objectives of PDP 2023-2028," wika ni Pangandaman sa isang pahayag.

"It shall continue to reflect our commitment to pursue economic and social transformation to address the scarring effects of the pandemic, as well as the impact of inflation, by prioritizing shovel-ready investments in infrastructure projects, investments in human capital development, and sustainable agriculture and food security, among others,” hirit pa ng kalihim.