Hirit sa DOTr, TOP-CRMS ng PPA, ibasura

ni Mylene Alfonso @News | September 15, 2023

Magpapalabas na ng pinal na rekomendasyon ang Department of Transportation (DOTR) kung tuluyan nang ibabasura ang Trusted Operator Program-Container Registry and Monitoring System (TOP-CRMS) ng Philippine Ports Authority (PPA).

Ito ang inihayag ni DOTR Secretary Jaime Bautista sa pagdinig sa panukalang 2024 budget ng ahensya ng Senate sub-committee on finance na pinamumunuan ni Senador Grace Poe.

Nauna nang nanawagan ang senador sa PPA na huwag nang ipagpilitan ang TOP-CRMS matapos maglabas ang Anti-Red Tape Authority (ARTA) ng negatibong komento sa nasabing programa.

Umaasa naman ang Association of International Shipping Lines (AISL), Alliance of Concerned Truck Owners and Operators (ACTOO) at Alliance of Container Yard Operators (ACYOP) na pakikinggan ng DOTR ang 24 business chambers sa bansa, gayundin ang panawagan nina Poe, Sen. Risa Hontiveros at iba pang mambabatas na

ibasura na ang TOP-CRMS.

Nakasalalay umano sa desisyon ng DOTR ang malaking responsibilidad na tuldukan na ang TOP-CRMS at mapigilan ang mga problemang idudulot nito kabilang ang pagtaas ng mga bilihin, paglobo ng transportation at shipping costs at pagkawala ng hanapbuhay ng ilang sektor na tatamaan ng programa.

Matatandaan na hindi aprubado sa ARTA ang programang isinusulong ng PPA matapos makita ng ARTA na wala itong legal na basehan.

Nadiskubre ng ARTA na magkasalungat ang mandato ng PPA, bilang isang regulator at port operator, na magreresulta sa koleksyon ng dagdag na fees kung oobligahin ang mga stakeholder na magparehistro para sa accreditation ng TOP-CRMS.

Ayon kay Bautista, nananatiling suspendido ang implementasyon ng naturang program ng PPA.

P-BBM, walang ultimatum sa National ID

ni Mylene Alfonso @News | September 14, 2023

Tila naubos na ang pasensya ni Pangulong Ferdinand Marcos, Jr., dahil sa pagkaantala sa pag-iisyu ng mga national ID.

"So, a lot of delays have already happened and there are many of our countrymen who have been complaining that up to this date, they have not yet received their national ID. And so, the President has expressed his impatience because a lot of things needed to be done and it’s all dependent on the deployment of a national ID," pahayag ni Information and Communications Technology Secretary Ivan John Uy sa press briefing sa Palasyo.

Gayunman, inihayag ni Uy na hindi nagbigay ng anumang ultimatum ang Pangulo sa kanila hinggil sa pagkumpleto ng pamamahagi ng mga national IDs.

"Well, wala naman pong ultimatum. Kami na po ang nagbigay ng basically ng goal namin.

Mga I think, we were only be able to be given access to the database just a month or two months ago. So, medyo ambitious po ang ating goal na last July lang tayo nabigyan ng access, eh we're hoping that by year end makaka-deploy tayo [ng mga national IDs]," sabi ni Uy.

"Kung ang PSA [Philippine Statistics Authority] po, inabot ng apat na taon, eh hindi pa ho nila matapos-tapos 'yung deployment. We're very optimistic, I believe in the capabilities of our people in order to that," banggit pa ng kalihim.

Tiwala naman si Uy na bago matapos ang kasalukuyang taon ay makapagpapalabas sila ng malaking bilang ng digital IDs.

Matatandaang Agosto nang ianunsyo ni Socioeconomic Planning Secretary Arsenio Balisacan na ang DICT ang mamamahala sa paggawa ng mga e-PhilID.

Sapul din ng price cap sa bigas.. Sari-sari stores, may ayuda

ni Mylene Alfonso @News | September 13, 2023

Ikinukonsidera na rin ng gobyerno na bigyan ng ayuda ang may-ari ng sari-sari stores sa buong bansa.

Ayon kay Social Welfare Secretary Rex Gatchalian, may ginagawa ng pag-aaral ngayon ang Department of Trade and Industry (DTI) para sa pagbibigay ng Sustainable Livelihood Program (SLP).

Ginawa ni Gatchalian ang pahayag matapos mamigay ang DSWD ng tig-P15,000 na ayuda sa mga apektadong rice retailers sa mga nasa loob at labas ng pampubliko at pribadong palengke.

Layunin nito na makaagapay din ang mga maliliit na sari-sari store sa pagkalugi dahil sa price cap sa bigas.

Idinagdag pa ng DSWD chief na target ng DTI na makapagsumite ng mas maraming listahan ng mga benepisyaryo upang mabigyan ng ayuda ang mga may-ari ng sari-sari store sa buong bansa.

Sa kasalukuyan, sinabi ni Gatchalian na may 474 rice retailers na ang nakatanggap ng livelihood grants, na nagkakahalaga ng P7.5 milyon.

Samantala, tatapusin na ng ahensya ang ipinatutupad na cash payout sa rice retailers na naapektuhan ng Executive Order No. 39 o ang price cap sa bigas.

Sinabi ni Gatchalian na pinamamadali ni Pangulong Ferdinand Marcos, Jr. ang pamamahagi ng tulong pinansyal sa rice retailers at nagtakdang tatapusin ang pamamahagi ng P15,000 hanggang Huwebes, sa buong bansa.

Nag-apply na rin sila ng exemption sa Commission on Elections sakaling maabutan sila ng election ban sa pamamahagi ng tulong pinansyal sa rice retailers na naapektuhan ng price cap.

Nabatid na ang mga rice retailer na nasa labas ng palengke ang isusunod sa Phase 2 ng programa at kinukuha na ang listahan ng mga ito para mapabilang sa mga bibigyan ng ayuda ng gobyerno.