Tambay, konti na lang — P-BBM

ni Mylene Alfonso @News | October 7, 2023

Binigyang-diin ng National Economic Development Authority (NEDA) ang pangako ng administrasyong Marcos na lumikha ng mas maraming trabaho para sa mga Pilipino.

Ito ay matapos maitala ng Philippine Statistics Authority (PSA) ang 4.4% na unemployment rate sa buwan ng Agosto na mas mababa kumpara sa 4.8% na naitala noong Hulyo.

Ayon kay NEDA Sec. Arsenio Balisacan, patuloy ang pagsisikap ng pamahalaan na mapalago ang ekonomiya ng bansa na magreresulta sa mas maraming trabaho.

Pinagaganda rin ng pamahalaan ang business climate ng bansa para makahikayat ng maraming investor o mamumuhunan.

Tinukoy ni Balisacan ang pag-apruba ng Senado sa public, private partnership act, at dahil sa national innovation agenda and strategy document 2023 to 2032, inaasahan ang mas masiglang oportunidad sa Philippine labor market.

Una nang inanunsyo ng PSA na bahagyang nabawasan ang bilang ng mga walang trabaho noong Agosto.

Sa talaan, umabot sa 2.21 milyon kumpara noong Hulyo na naitala sa 2.27 milyon.

Ayon kay Undersecretary Claire Dennis Mapa, National Statistician at chief ng PSA, mas mababa rin ang nasabing bilang sa naitalang 2.68 milyon na walang trabaho noong Agosto ng nakaraang taon.

Naitala naman sa 4.4% ang unemployment rate.

Samantala, nadagdagan naman ang bilang ng may trabaho nitong Agosto na umabot sa 48.7 milyon mula sa 44.63 milyon noong Hulyo. Ito ay mas mataas pa sa 47.87 milyon na may trabaho noong Agosto noong nakaraang taon.

Walang kinalaman ang China — PCG.. Pagkamatay ng 3 Pinoy, aksidente

ni Mylene Alfonso @News | October 6, 2023

Aksidente ang pagkamatay ng tatlong mangingisdang Pilipino makaraang mabangga ng isang dayuhang commercial vessel ang sinasakyan nilang fishing boat noong Lunes ng madaling-araw sa karagatang sakop ng Agno, Pangasinan.

"As far as the initial information that we have right now, we can say na hindi naman ito talaga deliberate," pahayag ni Philippine Coast Guard Spokesman Commodore Jay Tarriela sa Bagong Pilipinas Ngayon public briefing.

"Ito ay isang aksidente. Walang kinalaman sa Tsina," wika pa ni Tarriela.

"Hindi ito nangyari sa Bajo de Masinloc. Hindi ito 'yung naglalabasang espekulasyon kahapon na baka Chinese Maritime Militia o Chinese Coast guard ang deliberately nag-ram," paglilinaw pa ng opisyal.

Aniya, batay sa testimonya ng 11 nakaligtas na mangingisda, masyadong madilim ang lugar at masama ang panahon kaya hindi sila napansin ng bumangga sa kanila na Pacific Anna Crude Oil Tanker.

Nabatid na nakipag-ugnayan na rin ang PCG sa naturang foreign vessel na may Marshall Island flag.

Petrolyo, bumaba na.. Murang bilihin, next

ni Mylene Alfonso @News | October 6, 2023

Kumpiyansa ang mga mambabatas na huhupa na ang mabilis na pagtaas ng presyo ng mga bilihin sa mga darating na buwan.

Ayon kay House Ways and Means Chair Joey Sarte Salceda, ang naitalang 6.1% inflation rate sa buwan ng Setyembre ay epekto ng mataas na presyo ng produktong petrolyo at bigas.

Ani Salceda, inaasahang huhupa na ang inflation rate ngayong Oktubre dahil sa pagbaba ng presyo ng produktong petrolyo sa pandaigdigang pamilihan at pagsunod sa rice price ceiling na ipinatupad ni Pangulong Ferdinand Marcos Jr.

Sinabi rin ni Senior Deputy Speaker at Pampanga 3rd District Rep. Aurelio 'Dong' Gonzales, Jr. na inaasahan ang pagbaba ng inflation rate sa nalalabing bahagi ng taon.

Ipinaliwanag ni Gonzales na bagama't nagawang kontrolin ng gobyerno ang presyo ng bigas, masyadong maliit ang magagawa nito sa presyo ng produktong petrolyo na inaangkat mula sa ibang bansa.

Aniya, mayroong mga ginagawang paraan ang gobyerno upang mabawasan ang epekto ng pagtaas ng presyo ng bilihin sa mga mahihirap at sektor ng transportasyon.

Naniniwala naman si House Committee on Agriculture and Food chairperson Mak Enverga na naabot na ang pinakamataas na inflation rate noong Setyembre at inaasahan na ang pagbaba nito.

Ayon sa Philippine Statistics Authority (PSA), ang inflation rate noong Setyembre ay 6.1% mas mataas kumpara sa 5.3% na naitala noong Agosto. Ang year-to-date inflation ng bansa ay nasa 6.6% na.