Dagdag-leave sa mga empleyado, pinalagan

ni Mary Gutierrez Almirañez | May 3, 2021

Pinalagan ni President Sergio Ortiz-Luis ng Employers Confederation of the Philippines (ECOP) ang mga isinumiteng ‘employment leave’ sa Senado, batay sa naging panayam sa kanya ngayong umaga, Mayo 3.

Kaugnay ito sa 5-day mental wellness leave at 10-day paid leave para sa mga empleyadong tatamaan ng COVID-19 na ipinasa sa House of Representatives kamakailan.

Ipinaliwanag niyang maaari namang gamitin ang ibang leave category kung saan magiging bayad pa rin ang araw na hindi papasukan ng isang manggagawa.

Aniya, "Napakadami na, lalo pa nga sa mga babae. 'Pag kinuwenta mo ‘yung mga leave, pati maternity leave, halos wala nang matira sa pagtatrabaho… Hindi lang hindi timely, napakaraming leave na naiisip, meron namang existing leave na magagamit. Pag-isipan muna natin paano makakagawa ng jobs at paano gaganda ang ating trabaho at marami sa 'tin ang makapasok.”

Sa muling pagbubukas ng ekonomiya ay maraming manggagawa na ang nakabalik sa trabaho. Ilang oportunidad na rin ang nagbukas para sa mga unemployed at maraming maliliit na negosyo ang puwede na uling mag-operate.

Inaasahan namang masusunod pa rin ang ipinatutupad na health protocols, partikular na sa mga pampublikong transportasyon at mga establisimyento upang maiwasan ang hawahan sa COVID-19.

Registration ng National ID, 'di kinaya sa dami

ni Mary Gutierrez Almirañez | May 3, 2021

Inaayos na ang website ng Philippine Statistic Authority (PSA) dahil sa nangyaring ‘technical issue’ sa pilot launch ng online registration para sa National ID, ayon sa National Economic Development Authority (NEDA).

Paliwanag pa ni NEDA Socioeconomic Planning Secretary Karl Kendrick Chua, tinatayang 2,000 katao lamang ang nakapagparehistro nu’ng ika-30 ng Abril sapagkat hindi nakayanan ng website na i-handle ang 46,000 na users sa nakalipas na unang isang minuto.

Nilinaw din niyang 16,000 indibidwal lamang ang sinubukan nilang isalang sa pre-registration sa scale na 35,000 per minute na tanging kakayahan ng system.

Aniya, “What we do right now is to review our system so we can increase the load. The problem is really the demand. It’s like you opened a new theme park or restaurant, although you are ready for the peak during holidays or weekends, sometimes on the first day, everyone wants to participate. We thanked them but we are very sorry also for what happened.”

Dagdag pa niya, “We assure you that we are fixing this. We have experts all over the world and we will relaunch it as soon as we can.”

Matatandaang isinagawa ng PSA nu’ng Oktubre ang bahay-bahay na pangongolekta ng impormasyon upang malaman ang demographic profile ng mga mamamayan, kung saan tinatayang 33.3 million ang naging respondent sa Step 1.

Sa ngayon, halos 6.4 million pa lamang nito ang nakauusad sa ikalawang procedure o ang on-site biometrics data collection.

Sa kabila naman ng mga lumalabas na ‘error messages upon registration’ sa website ng PSA ay tiniyak ni Chua na gumagana pa rin ang system, kung saan kailangan lamang ng pasensiya at tiyaga sa paulit-ulit na pag-submit ng data.

Inaasahan ding magkakaroon ng relaunching sa online registration ng National ID kapag naayos na ang website ng PSA sa mga susunod na araw.

Estudyante at balikbayan, oks nang pumasok sa ‘Pinas

ni Mary Gutierrez Almirañez | May 3, 2021

Nadagdagan na ang mga pinapayagang makapasok sa bansa simula nu’ng ika-1 ng Mayo, ayon kay Bureau of Immigration Spokesperson Dana Sandoval.

Aniya, kabilang sa mga pinapayagan na ngayon ay ang mga estudyante, empleyado at residente na may valid visa at existing immigrant at non-immigrant visa.

Kailangan lamang nilang magpa-book nang mas maagang accommodation para sa kanilang quarantine, kung saan kailangan din nilang sumailalim sa COVID-19 test sa ika-6 na araw ng pagku-quarantine.

Giit pa ni Sandoval, "'Yung mga turista po, 'di pa po muna natin mapapayagan. Para makapasok po sila, they would need to secure an exemption from the Department of Foreign Affairs."

Nilinaw din niyang bawal pa rin makapasok sa ‘Pinas ang mga biyahero galing India.

Nananatili namang limitado sa 1,500 katao ang mga puwedeng pumasok sa bansa kada araw.

Sa ngayon ay patuloy pa ring ipinatutupad ang travel restrictions, quarantine classifications at health protocols upang mapigilan ang pagkalat ng COVID-19 at mga bagong variants nito.