Takot ka ba dahil baka ‘di mo kaya? Alamin: 5 benepisyo ng solo living

ni Mharose Almirañez | November 6, 2022

Sa ibang bansa, kusa nang humihiwalay sa puder ng mga magulang ang isang anak sa oras na tumuntong siya sa hustong gulang. Bumubukod siya ng tirahan at nagtatrabaho upang matutunang tumayo sa sariling mga paa. Sa madaling salita, ayaw na niyang maging pabigat sa kanyang mga magulang.

Samantalang sa ‘Pinas, kadalasan, nagkaanak o nagka-pamilya na ang isang indibidwal ay nakatira pa rin sa mga magulang niya. Ang masaklap, mga magulang pa niya ang kumakayod para lamang buhayin sila ng kanyang anak.

Malaking “No” talaga sa extended family kahit na sabihin pang, “The more, the merrier.”

Siyempre, kung ikaw ay nasa early adulthood, paano ka magkakaroon ng peace of mind kung kasama mo sa bahay ‘yung tiyahin mong palaging may sey sa bawat kilos mo? Maibibigay ba nila ‘yung privacy na hinihingi mo kung pati personal life mo ay gusto rin nilang panghimasukan? Hays, mapapa-“Sana all, may sariling bahay” ka na lamang talaga!

Actually, beshy, hindi naman mahirap kumawala sa extended family. So what kung minimum wage earner ka? FYI, sa tamang pagba-budget lang ng sahod ay paniguradong kering-keri mo namang makapag-rent ng apartment mag-isa. Sounds good, right?

Hindi naman sa hinihikayat kitang mamuhay mag-isa, pero dapat mo rin isaalang-alang ang ilang perks of solo living:

1. MAGKAKAROON NG LEISURE TIME. Puwede kang gumala nang walang inaalalang curfew. Puwede kang tumutok sa cellphone o computer nang hindi iniisip ang sermon ni nanay. Puwede mo ring itambak ang mga hugasin sa lababo at intindihin kapag feel mo nang maghugas ng pinggan. Puwede kang kumain anytime, gumising sa tanghali o matulog nang madaling-araw. In short, hawak mo ang oras mo.

2. MAS NAGIGING RESPONSABLE. Hindi naman sa tino-tolerate ko ang katamaran mo sa gawaing bahay, pero siyempre, alam kong pagod ka rin sa pagtatrabaho, kaya paniguradong gusto mo lamang sulitin ang sandaling oras na namamalagi ka sa ‘yong apartment. Since you’re living on your own, alam mong wala namang ibang gagawa ng household chores para sa iyo, kaya sa huli ay ikaw pa rin ang magluluto, maghuhugas, maglalaba, maglilinis, maggo-grocery at magbabayad ng bills— para sa sarili mo.

3. PAG-ALIS SA COMFORT ZONE. Para kang sisiw na nakawala sa sariling shell, ‘ika nga. Magugulat ka na lamang na kaya mo pa palang higitan ‘yung bagay na nakasanayan mong gawin. ‘Yung tipong, willing ka nang mag-take ng risk at mag-explore ng something new. Sa oras na mamuhay kang mag-isa, siguradong dito mo talaga madi-discover ang iyong sariling kakayahan.

4. MAGKAKAROON NG PRIVACY. Puwede kang ngumiti hanggang tainga kapag kinikilig ka sa ka-chat mo. Puwede ka ring humagulgol tuwing umiiyak kapag nasasaktan ka. Meaning, puwede mong i-express ang iba’t ibang emosyon mo sa loob ng iyong silid, hindi tulad noong kasama mo pa sa bahay ang mga kamag-anak mo. ‘Yung tipong, kaunting ngiti lang ay sasabihin na sa ‘yong, in love ka na. Pero ang pinakamahirap ay ‘yung gusto mong humagulgol, pero mga pigil na paghikbi lamang ang nagagawa mo dahil ayaw mong marinig ng mga kasama mo sa bahay na umiiyak ka.

5. MAY PEACE OF MIND. ‘Yun bang, mas nakakatulog ka nang payapa dahil hindi mo na naririnig ang paulit-ulit na sigawan, sumbatan, bilangan at murahan sa dati n’yong bahay. Wala na ‘yung tito mo na daig pa ‘yung dyowa mo sa pagiging toxic. Hindi mo na rin kasama ‘yung tita mo na walang ibang bukambibig kundi pera. In short, nakalayo ka na sa negativity.

Ilan lamang ‘yan sa mga dapat isaalang-alang sa oras na simulan mong mamuhay mag-isa. Pero siyempre, rito rin masusukat ang iyong talino at tapang. Paano ka ba didiskarte sa buhay nang hindi umaasa sa iba? May sapat ka bang lakas ng loob para makipagtransaksyon ng libu-libong pera sa landlord na kakakilala mo lang? Paano kung dumating sa point na na-delay ang sahod mo, kaya delayed din ang pambayad mo ng renta and utility bills? Naka-ready na ba ‘yung pride mo para magmakaawa kay landlord kung puwede nitong i-extend ang due date?

Higit sa lahat, what if nagkasakit ka? Sigurado ka bang kaya mong pagalingin ang iyong sarili without asking help from your relatives? Kaya mo na bang matulog mag-isa na hindi hinahanap ang init ng yakap ni nanay?

Kung ang sagot mo ay “No,” mainam kung basahin mo muling maigi ang mga nakasulat sa itaas.

Okie?

Safety tips para ‘di mabiktima ng akyat-bahay

ni Mharose Almirañez | November 3, 2022

Nakakasigurado ka bang ligtas ang iyong pamilya laban sa mga magnanakaw?

Minsan, akala natin ay safe na tayo, basta nasa loob ng sariling bahay, pero ang hindi natin alam, kahit ano’ng pag-iingat ay hindi pa rin puwedeng makaiwas sa mapagmatyag na mga mata. ‘Yung tipong, magugulat ka na lamang na natiktikan na pala nila ang iyong mga kagamitan. Kumbaga, nasalisihan ka na nila at inakyat na pala ng magnanakaw ang inyong bahay noong oras na walang tao sa inyo o noong mahimbing kayong natutulog sa kalaliman ng gabi.

Bilang concerned citizen, narito ang ilang dapat gawin upang maiwasan ang akyat-bahay gang:

1. MAGLAGAY NG GRILLS. Kung may grill na nakaharang sa inyong bintana ay mahihirapang makapasok at makapagpuslit ng naglalakihang appliances ang magnanakaw. Kaya naman bago pa sila makalabas sa binatana ay paniguradong nahuli n’yo na sila.

2. TIYAKING NAKA-LOCK ANG MGA PINTO AT BINTANA. Napakahalaga na naka-lock nang maigi ang inyong pinto. Hangga’t maaari ay maglagay kayo ng double lock nang sa gayun ay mahirapang magbaklas ng kandado ang mga magnanakaw. Kung mayroon kayong emergency exit, tiyaking nakasarado rin ito nang maigi upang hindi makadaan du’n ang kawatan.

3. MAGLAGAY NG CCTV CAMERA. Kung keri, ‘yung may motion sensor na CCTV camera na ang ikabit n’yo upang mabilis ma-detect ang kahina-hinalang kilos ng mga taong dumaraan sa tapat ng inyong bahay. Mangyari man ang nakawan ay puwede n’yo ring i-replay ang CCTV footage upang mahuli ang salarin.

4. MAKIPAG-COORDINATE SA MGA AWTORIDAD. Gaya na lamang ng mga barangay tanod at guard ng inyong subdivision dahil sila ang unang kumikilatis sa mga taong naglalabas-pasok sa inyong lugar. Kaya mainam kung mayroon kayong contact number nila para kontakin sila upang makahingi ng tulong na mahabol at ma-trace ang magnanakaw.

5. HUWAG BASTA MAGTIWALA. Hindi masamang magkaroon ng trust issues, lalo na kung para naman sa kapakanan ng iyong pamilya. Huwag kang maging palangiti kahit kanino, sapagkat hindi lahat ng ngumingiti sa ‘yo ay may magandang intensyon dahil mayroong ilan na gusto lamang kunin ang iyong loob bago tuluyang umatake. Okay lang na maging friendly sa neighborhood, pero huwag magtiwala nang bonggang-bongga.

Sa hirap ng buhay ngayon ay mapapabuntong-hininga ka na lamang kapag ikaw ang nabiktima ng akyat-bahay. ‘Yung tipong, hindi mo pa nga fully paid ‘yung hinuhulugan mong appliances tapos nanakawin lamang sa iyo.

Ang masaklap pa r’yan, may mga beteranong akyat-bahay na nananakit kapag nakita ka nila. Kaya tumakbo ka na bago ka pa nila mapag-initan, ma-rape o mapatay. Hays. So, beshie, ingat, ha?

Iba’t ibang ganap tuwing Undas

ni Mharose Almirañez | October 30, 2022

Asahan na ang heavy traffic dahil sa pagdagsa ng mga pamilyang uuwi sa kani-kanilang probinsya upang dalawin ang puntod ng mga yumaong kamag-anak ngayong Undas.

Long weekend din itong maituturing, dahil bukod sa natataong semestral break ng mga estudyante ay wala ring halos pasok sa trabaho ang ilang manggagawa. Kaya naman sinusulit na ng ilang pamilya ang pagkakataong ito para makapag-bonding.

Bilang tradisyon taun-taon, narito ang limang pangunahing ginagawa tuwing Undas:

1. HALLOWEEN PARTY. ‘Yung tipong, may mga batang nagti-trick or treat sa bahay-bahay. Pabonggahan pa nga ng costume ang ilan. Maging ang mga museum, mall, restaurant, opisina atbp., ay nagpa-participate rin sa pagde-decorate ng Halloween motif.

2. PURO NAKAKATAKOT ANG PALABAS. Halos isang buong linggo na puro katatakutan ang mga palabas na ineere sa TV. May mga pagkakataon pa ngang nagpapataasan ng ratings ang ilang magkalabang TV networks para lamang makapag-ere ng pinakanakakatakot na palabas taon-taon.

3. NAGTITIRIK NG KANDILA. Tuwing Undas daw ay nagko-collide ang mundo ng mga buhay at patay, at naipapakita natin sa pamamagitan ng pagtitirik ng kandila ang pagrespeto sa mga yumaong kaluluwa. Sa paraang ito ay hindi nila tayo gagambalain.

4. DUMADALAW SA SEMENTERYO. Mainam na ikaw ang dumalaw sa mga patay kung ayaw mong ikaw ang dalawin nila. Sa sementeryo madalas nangyayari ang family reunion, kaya magandang pagkakataon din ito para maka-bonding mo ang mga kamag-anak na minsan mo lang makita.

5. MAY DAGDAG-SAHOD. Dahil idineklarang special holiday ang November 1 at 2, malaking tulong talaga sa mga empleyado ang dagdag-sahod na 30%. Kumbaga, pumasok ka man o hindi sa trabaho ay may sahod ka pa rin.

Nakakatuwang isipin na kahit gaano tayo ka-busy sa buhay ay hindi pa rin natin nakakaligtaang gunitain ang Undas. Nagagawa pa rin nating maglaan ng oras upang makapunta sa sementeryo para maipagtirik ng kandila ang mga yumao nating mahal sa buhay.

Sa oras na tayo naman ang yumao, sana ay hindi rin nila tayo makalimutan.

Gets mo?