Alamin: Mga lugar na oks bisitahin ngayong tag-init

ni Mharose Almirañez | March 20, 2022

Nakakainit ng ulo ang mainit na panahon, kaya deserve nating magpakalayu-layo’t magpalamig sa maaliwalas na lugar. Perfect escape ang naggagandahang beaches sa ‘Pinas, kaya hindi mo na kakailanganing mag-Jeju Island o mangibang-bansa.

Isipin mo na lamang ang sariwang simoy ng hangin, nakakikiliting hampas ng alon, maaligasgas na buhangin at naglalakihang bato na nakapaligid sa isla, ay tiyak na malilinis talaga nito ang mental health mo’t mabubura lahat ng ka-toxic-an sa ‘yong mindset.

But wait! Bago ka mag-imagine r’yan, siguraduhin mo munang may budget ka’t hindi puro drawing ang mga makakasama mo’t hanggang group chat na lamang ‘yang itinerary n’yo.

Upang mas ma-trigger kang ituloy ang na-postpone na summer getaway noong 2020 hanggang 2021 dahil sa pandemya, tiyak na wala kang kawala ngayong Alert Level 1 na, dahil narito ang mga naggagandahang lugar na puwedeng isama sa inyong listahan:

1. ZAMBALES. Sabi nga nila, ‘adventure didn’t start with an A, but with the Z.’ Matatagpuan lamang ito sa bahaging Luzon kaya hindi mo na kakailanganing bumiyahe sa Visayas at Mindanao para lamang sa 2D1N. Sulit na sulit ang naggagandahang isla sa Zambales kaya masasabing worth it balikan, hindi katulad ng ex-dyowa mong malabong mag-comeback pa kayo.

2. BATANGAS. Maliban sa view ng Taal Volcano ay nagkalat din sa Batangas ang napakaraming virgin islands. Good luck na lamang sa island hopping dahil tiyak na mahahanap mo talaga rito ang nawawala mong sarili, yet, baka rito mo rin makita si The One. Ayieee!

3. BORACAY. Siyempre, hindi mawawala ang isa sa pinakasikat na tourist destination sa bansa. Bagama’t masyado nang crowded ang Boracay ay puwedeng-puwede ka pa ring mag-enjoy dito dahil sa Instagramable ambience ng white sand beach, crystal clear water, giant rock formations, atbp.

4. QUEZON. Akala mo ba, alphabetical order ‘to? Mali ka, beshie! Tulad ng Batangas ay nagkalat din sa probinsiya ng Quezon ang virgin islands. Kaya kung ayaw mo sa crowded beaches, puwede kang mag-explore sa mga undiscovered islands dito habang kinakanta ang Cruel Summer ni Taylor Swift with an entry sa TikTok nang ‘why would I lower my standards, if may travel buddy akong bff’, kineme.

5. SIARGAO. Ito ang bagong pasyalan ng mga artista nowadays. Bilang Surfing Capital of the Philippines, marapat lamang na mapasama rin ito sa ‘yong bucket list. Hindi ka man marunong mag-surfing, oks lang dahil marami kang puwede maging surfing buddy dito.

Kung ayaw mo naman sa tubig, puwedeng puwede ka ring magpalamig sa Baguio at Tagaytay, para feel na feel ang coldness ng iyong love life.

So, beshie, ano pang hinihintay mo? Bulabugin na si BFF upang makulayan na n’yo ang idinrowing na summer getaway this 2022!

Alamin: Tips sa ligtas at matalinong pamimili

ni Mharose Almirañez | March 17, 2022

Napakasarap nga namang mamili online dahil bukod sa convenient, mayroon pang discount offers at napakaraming giveaway vouchers.

Kung baguhan ka lang sa online shopping o suki ng 12.12, 11.11, 4.4 at iba’t ibang pakulo ng mga online shopping apps ay tamang-tama ang article na ito para sa iyo.

Narito ang 10 tips para hindi mabudol o ma-disappoint sa biniling items online:

1. EXPECTATION VS. REALITY. Ipagpalagay nating bibili ka ng selpon. Unang-una, alamin mo muna ang specification ng gadget na pinaplanong bilhin. Manood at magbasa ng online reviews. Baka kasi sobrang taas ng expectations mo, tapos ma-disappoint ka lang kapag hawak mo na ‘yung actual item. Sabi nga nila, you get what you pay for its price.

2. ALAMIN KUNG ORIGINAL ANG ITEM. Sobrang dami na kasing nagkalat na imitation o counterfeit items online. Inirerekomenda kong mag-browse ka sa mga verified shop o du’n sa mayroong label na ‘preferred’ o ‘mall’. Ibig sabihin, mayroon silang physical store at branded items na kadalasang nakikita sa mga mall.

3. BASAHIN ANG REVIEWS. Ipagpalagay nating nag-add to cart ka ng size 6 na sapatos. Kadalasan ay mayroong tinatawag na American size at maliit ang sukat. Kung babasahin mo ang reviews mula sa ibang buyer na nakabili sa shop ng item na ‘yun, dito mo malalaman kung accurate ba ‘yung size 6 sa ‘yo o kailangan mong mag-adjust ng size na oorderin.

4. I-CHAT ANG SELLER. May ibang shop na bot o artificial intelligence, o naka-auto generated reply. Pinakamainam kung mismong seller o sales representative ang makakausap mo. Mayroon kasing seller na hindi nagse-send ng picture bago ipadala sa courier ang iyong parcel.

5. TINGNAN KUNG KAILAN GINAWA ANG ACCOUNT NG SELLER. Kaduda-duda kung kagagawa lamang ng seller sa naturang account. Puwede mo isiping dummy account ‘yun na ginawa para makapambiktima. Sila ‘yung mga scammer o seller na mabilis mag-delete at magpalit ng account kapag may buyer na kumagat sa marketing strategy nila.

6. I-TRACK ANG ORDER FROM TIME-TO-TIME. Nakakainip ang maghintay, ngunit mas nakakainip kung hindi mo alam kung nasaan na ‘yung hinihintay mo. Makikita ang progress ng iyong order sa “My Purchase” button. Narito ang portion ng To Pay, To Ship, To Receive, To Deliver at kung Completed na ang transaksiyon. Accessible rin ang mga link para ma-track kung nasaan na ang iyong parcel.

7. I-TSEK ANG ITEM BAGO BAYARAN. Kung puwedeng mag-unboxing ng parcel sa harap ng courier bago magbayad, why not, ‘di ba? Kundiman, siguraduhing naka-video ang pagbubukas ng parcel at walang putol sa clips para madaling mag-refund o mag-change item kung sakaling may problema sa natanggap na order.

8. MODE OF PAYMENT. Madalas ay cash on delivery (COD), pero paano kung bayad muna bago ang item? Tiyaking legit ang shop bago magbayad online dahil mahirap manghingi ng refund sa bogus seller.

9. ALAMIN ANG REASON FOR SELLING (RFS). Para ito sa secondhand items na mabibili sa ibang online shopping platform tulad ng Facebook Marketplace, OLX/ Carousell atbp. Halimbawa, bibili ka ng segundamanong laptop, tanungin mo si seller kung bakit niya ibinebenta ang laptop, kung gaano na ‘yun katagal sa kanya, kung gaano kabilis ma-lowbat, kung gaano karami ang dents at kung napa-repair na ba niya. Puwede ka ring makipagtawaran sa presyo, pero ‘wag na ‘wag kang bibili ng item na mukhang galing sa nakaw.

10. MEET UP KAY SELLER. Kailangang halfway ang meeting place at tiyaking matao ang lugar na pag-i-stayan n’yo. Kung electronics ang bibilhing gamit, siguraduhing may power outlet ang meet up place para maisaksak mo ang item. I-double check mo nang maigi ang lahat ng ports at pindutan. Hanapin ang warranty sticker at bilangin ang mga turnilyo dahil dito mo malalaman kung nabuksan o na-repair na ang item.

Maliban sa mga nabanggit, siguraduhin mo munang mayroon kang budget bago mag-add to cart. Hinay-hinay sa pag-place ng order dahil baka ma-surprise ka na lang sa sunud-sunod na cash on delivery parcel na biglang kumatok sa inyo. Gets mo?

Talking stage gone wrong… Signs na ayaw na sa ‘yo ng kausap mo

ni Mharose Almirañez | March 13, 2022

Naninibago ka ba sa biglaang coldness ng ka-talking stage mo? ‘Yung tipong, online naman siya, pero napakatagal niyang basahin ‘yung nag-deliver mong chat sa inbox niya. Worst thing is, nu’ng in-open niya ang message mo ay hindi naman siya nag-reply. Kumbaga, na-seen zone ka lang. Ouch, ‘di ba?!

Ngunit alam mo ba kung ano’ng mas masakit? ‘Yung nakita mong ‘typing’ na siya, pero isang napakatipid na “Slr” lamang ang reply niya’t sinundan pa ng napaka-dry na open-ended topic. Mapapa-‘tsk’ ka na lang talaga!

Upang lalo kang mag-overthink, narito ang ilan pang signs na ayaw na sa ‘yo ng ka-talking stage mo:

1. HINDI NA NIYA NAGE-GETS ‘YUNG JOKES MO. Kung noon ay walang-patid ‘yung pagpapalitan n’yo ng korning punchlines at humored jokes, ngayon ay parang out of this world na siya’t tila hindi na kayo ‘on the same page’.

2. HINDI NA SIYA PALATANONG. Kung noon ay walang tigil ang pagtatanong niya’t very interested siyang malaman ang every single details of you, ngayon, he/she left you hanging, questioning your worth at ang napakaraming “what if”.

3. HINDI NA SIYA PALABIGAY NG TOPIC. Kung noon ay ultimo non-sense topic ay pinagkukuwentuhan n’yo hanggang madaling-araw, ngayon ay ikaw na itong pala-open ng topic para lamang mapahaba ang conversation n’yo.

4. HINDI NA SIYA PALA-UPDATE. ‘Yung mas napapadalas ang pagsasabi niya ng, “Sorry, nakatulog,” “Busy sa work,” “May pinuntahan/inasikaso,” o whatsoever at ang pesteng “Slr” o “Sorry, late reply”. Samantalang noon, kahit nasaan o anuman ang ginagawa niya ay nacha-chat ka pa rin niya.

5. HINDI NA KAYO SAME ENERGY. Ito ‘yung energetic ka sa pagkukuwento at napakarami mo pa sana gustong i-tsika, pero napaka-dry and cold na ng bawat sagot niya. ‘Yung mas nauuna na rin siyang mag-good night sa ‘yo dahil pagod daw siya, samantalang noon, ikaw daw ang pahinga niya.

Hindi naman sa pinag-o-overthink kita, pero what if may bago na siyang kausap o na-turn off na siya sa ‘yo? Baka naman, ikaw talaga ‘tong red flag?

Dapat mo ring tanungin ang sarili mo kung bakit nga ba siya nagsimulang magbago. Pag-isipan mong mabuti kung may nasabi o nagawa ka bang nagpa-discourage sa kanya. Puwede rin kasing bigla na lang niyang na-realize na hindi pa pala siya ready sa relationship.

Mahirap ‘yung hanggang talking stage na lang kayo, pero mas mahirap kung magse-settle ka sa bare minimum. Hangga’t maaga at hindi pa naman ganu’n ka-strong ‘yung foundation na na-build n’yo ay ikaw na itong kumawala.

Gayunman, hindi porke nararamdaman mong malapit ka na niyang i-ghost ay uunahan mo na siya. Ang ipinupunto ko rito, sana ay magkaroon ka pa rin ng lakas ng loob para komprontahin siya’t alamin ang problema. Baka kasi puwede pang maayos, ‘di ba? Pero kung hindi na talaga, magpasalamat at magpaalam ka man lang sa kanya bilang closure, hindi man naging kayo.

Good luck, beshie. Kaya mo ‘yan!