Sure ka bang siya ang mali? Hmmm… 9 signs na red flag ka

ni Mharose Almirañez | May 26, 2022

Natatakot ka bang ma-ghost o mauwi ulit sa trial card ang pakikipag-talking stage sa dating app/site kaya pinangungunahan mo na ang kapalaran at iniisip na mauulit lamang ang nangyari noon, kaya nagpe-play safe ka ngayon?

‘Yung tipong, mas binibilang mo pa ‘yung napakarami niyang red flags o mga dahilan kung bakit hindi mo siya dapat piliin, sa halip na maging risk taker, spontaneous or go with the flow ka.

Ngunit paano kung sa kakahanap mo ng red flags sa ka-internet love mo ay hindi mo namamalayang ikaw na pala ang red flag? Naku, beshie, very wrong ‘yan! Kaya bago mo pa tuluyang ma-absorb ang pagiging red flag, narito ang ilang warning signs na ikaw talaga ang red flag at hindi siya:

1. MABILIS KANG MA-TURN OFF. Nawawala agad ‘yung excitement or thrill kapag na-discover mong hindi pala siya katangkaran, panget ‘yung accent niya, mukha siyang jejemon, undergraduate, minimum wage earner at bread winner… Feeling mo naman ay isa kang expensive, gold, high maintenance, and you deserve someone better. Kaya tingin mo, red flag na agad siya, pero ang totoo, standards mo talaga ang may problema.

2. INOORASAN MO ANG REPLY NIYA. Kapag napapansin mong nagiging masaya ka na sa pakikipag-usap sa kanya, binabagalan mo na ‘yung reply. ‘Yung tipong, iki-click mo pa ‘yung messages niya at titingnan kung ilang minuto o segundo ang interval ng replies niya sa ‘yo. Super malala ka na talaga kapag umabot sa point na hinihintay mong mag-3 to 5 minutes muna bago siya replayan.

3. BORING KA-CHAT. ‘Yung tipong, kahit kapalagayan mo na siya ng loob ay tsina-challenge mo pa rin siya, katulad ng pag-o-observe kung paano niya mapapahaba ‘yung conversation n’yo sa tuwing open-ended ang reply mo sa kanya. Pero dahil palagay na ang loob niya sa ‘yo, aakalain niyang okey lang na “Haha” na lang ang i-reply niya sa ‘yo. Ngunit ang totoo, hinihintay mo siyang mag-initiate ng bagong topic at kung hindi niya magi-gets ang logic — thank you, next!

4. HINDI KA NAGDO-DOUBLE CHAT. Let’s say, nag-good night ka sa kanya kagabi, ngunit paggising mo ay hindi ka pala niya ni-reply-an ng “Sleep well” o ni-flood chats habang natutulog ka, and worst thing is, wala man lang siyang “Good morning” sa ‘yo. Siyempre, bilang ma-pride na nilalang, hindi ka mauunang mag-good morning sa kanya.

5. FEELING DYOWA KA NA. ‘Yung pinagbabawalan mo na siyang gawin ang mga bagay-bagay without your permissions at nire-require mo na rin siyang mag-update sa ‘yo from time-to-time, to the point na sinimulan mo na rin ang pagso-soft launching o pag-flex sa kanya sa social media kahit hindi pa naman kayo officially. Akala mo ba, nasu-sweet-an siya sa ‘yo? Nakakasakal ‘yan, beshie! Kumbaga, invasion of property ‘yan, lalo’t binabakuran mo ang hindi mo naman pagmamay-ari.

6. NAGME-MENTION KA NG IBANG PANGALAN. ‘Yun bang napapadalas ang pagbanggit mo sa pangalan nu’ng mga dati mong naka-talking stage, naka-meet o nakarelasyon sa tuwing kausap mo siya. Tapos bigla kang magiging sad boy/girl na para bang nanghihingi ka ng simpatya mula sa kanya. Siyempre, gusto mong i-comfort ka niya kasi ikaw ‘yung biktima sa sarili mong kuwento. Naku, beshie, para-paraan ka lang!

7. MARAMI KANG KAUSAP. Hindi naman required ang maging loyal sa talking stage, pero paano mo makikilala ang isang tao kung marami kang reservations? May the fast replier wins, ganern? Ano bang feeling kapag limang tao ‘yung taga-eat well at naggu-good morning sa ‘yo? Bigas reveal naman, beshie!

8. MASYADO KANG TOO GOOD TO BE TRUE. Bukod sa pagiging successful in life ay taglay mo na rin ang ideal height, body and looks, tapos consistent pa ang pagiging sweet and concern mo sa kanya. ‘Yun bang napakabilis mong mag-reply at hindi ka boring kausap. Masyado ka ring maunawain at hindi magagalitin kahit late reply siya sa ‘yo. Kumbaga, para kang walking green flag. Almost perfect ka na, kaso wala kang flaws—at ‘yun ang pinaka-nakakatakot.

9. ‘PAG IPINAKILALA MO NA SIYA SA FRIENDS/RELATIVES. Masasabing nag-level up na kayo sa talking stage kapag umabot na kayo sa puntong ito. ‘Yun nga lang, may pagka-manipulative ang dating nito, lalo’t kakakilala n’yo pa lang naman dahil lumalabas na wala na siyang kawala sa ‘yo, the moment na ipinakilala mo siya sa mga taong nakapaligid sa ‘yo. Kumbaga, mag-e-expect na sila sa kausap mo. Dapat ay low key lang muna, unless the status is stated.

Sabi nga ni Taylor Swift, “Loving him was red,” kaya hindi mo dapat katakutan ang red flags. Not because you guys didn’t into serious relationship ay dehado ka na. Nangangahulugan lang ito na you’re strong enough para sumugal sa taong hindi ka sigurado. Napakahirap naman kasi kung itinago mo lang ‘yung feelings mo, tapos puro ka what ifs in the end.

Gayunman, kung gusto mo talagang mag-work kayo ng kausap mo, dapat mo nang iwasan ang mga nabanggit na pag-uugali dahil kung ipagpapatuloy mo ‘yan ay hindi nakapagtatakang mawalan ka talaga ng kausap. Ayaw mo naman sigurong mag-ghost nang ma-ghost at mauwi sa puro trial cards, ‘di ba?

Paraan para matanggap ang pagkatalo, alamin!

ni Mharose Almirañez | May 22, 2022

“Napakahirap mong mahalin!” Sumbat ni misis sa babaero’t gastador na mister.

Umaasa siya na magbabago ang asawa upang ayusin ang kanilang pamilya, alang-alang sa mga bata. Subalit makalipas ang anim na taong pagsasama ay natukso na naman ito at nagpalamon sa bulok na sistema.

Bagama’t hindi pa tapos ang laban ay posibleng may nanalo na sa puso ni mister. Nakakalungkot lang isipin na nadamay pa sa kanilang gulo ang iba nilang kamag-anak at kaibigan. Nahalungkat din, maging ang milyones nilang utang at iba pang kalokohan noon.

Dapat pa nga bang lumaban si misis kahit matagal nang sumuko si mister? Sino sa kanila ang totoong talunan? Paano na ang mga bata?

Sa artikulong ito ay ilalahad ko sa inyo ang madaling paraan para matanggap ang pagkatalo:

1. ‘WAG MAGPADIKTA. Ito ‘yung mga bulong sa paligid na nagsasabing gantihan mo siya. Gawin mo kung ano ang ginawa sa ‘yo. Naku, mare, ‘wag na ‘wag kang magpapadikta sa bulong at sulsol dahil kung gagawin mo ‘yan ay wala ka na ring pinagkaiba sa cheater.

2. MAGING MULAT. Since nagising ka na sa katotohanan, mahirap nang baliin ang iyong mga paniniwala. Kaya naman, ‘wag na ‘wag kang magiging marupok kung sakaling bumalik siya sa ‘yo dahil paniguradong uulitin lang nito ang ginawang panloloko sa ‘yo noon. Never again, mare.

3. SUPORTAHAN NA LANG SILA. Marami na ang nagpahatid ng pagbati sa kanilang relasyon, at tila “Congratulations”, “Best wishes,” at “Regards” na lang mula sa ‘yo ang kulang upang tuluyan silang maging masaya. So, mare, ‘wag ka nang maging bitter. Ipaubaya mo na sa “other woman” ang minsang naging sa ‘yo. Maniwala kang hindi niya kokontrolin, aabusuhin at ipapahamak ang iyong pinakamamahal. Maniwala ka sa kakayahan niya at suportahan na lamang sila.

4. LUMAYO. Habang nagninilay-nilay ka sa malayong lugar, malaya ka ring makipagkilala sa iba’t ibang tao, kumbaga, mag-build ka ng mas maraming connections. Malay mo, sa iyong pangingibang-bansa ay du’n ka makahanap ng bagong partner.

5. MAGNILAY-NILAY. Isipin mong maigi ang iyong mga nagawa sa nagdaang anim na taon. Kung sa tingin mo ay hindi ka nagkulang, baka naman kasi sumobra ka? Ano bang mayroon ka na wala ‘yung iba? Bakit siya at hindi ikaw? Kanino ka ba nakikinig? Puwede ring wala sa ‘yo ang problema kundi nasa mga taong nakapaligid sa iyo.

Iba’t iba man ang pinagdaraanan natin sa buhay, may mga laban talagang hindi natin sinusukuan sa pag-asang magkakaroon ng pagbabago. ‘Yun nga lang, hindi sapat ang pagmamahal para ipanalo ang laban na mayroong ibang isinisigaw.

Gets mo?

Dapat gawin kung dudang mangungutang ang nangamusta

ni Mharose Almirañez | May 15, 2022

Kumusta?

Maliban sa “Hi” at “Hello”, isa ang pangangamusta sa pangkaraniwang introduction sa tuwing mayroong gustong makipag-communicate sa ‘tin. Sa totoo lang, hindi naman lahat ng nangangamusta ay totoong concern sa ‘tin, sapagkat ang iba ay nangangamusta lamang para mangutang o kaya’y magpa-fall.

Hindi naman sa pinag-o-overthink kita, pero sana ay aware ka sa totoong motibo ng mga taong nangangamusta sa ‘yo. Lumang istayl na kasi ‘yung “It started with a ‘Hi’, or ‘Hello’,” dahil ang ending, “Inutangan ka na, iniwan ka pa!”

So paano nga ba ipa-fact check ang iba’t ibang intensyon ng mga taong nangangamusta sa ‘tin? Ayaw na kitang mag-overthink, kaya narito ang mga response na dapat gawin kapag may nangamusta sa ‘yo:

1. MAGING STRAIGHTFORWARD. Prangkahin mo na siya at sabihing, “Magkano ang kailangan mo?” o “May balak ka bang mag-stay?” Assuming and intimidating man pakinggan, pero mas mainam na ‘yun kesa magpaliguy-ligoy pa kayo at ma-misinterpret n’yo pa ang isa’t isa.

2. ‘WAG MAG-ASSUME. Ito na nga ‘yung sinasabi ko na hindi porke kinumusta ka niya ay iisipin mong interested na siya sa ‘yo. Beshie, mag-fact check ka muna bago mag-assume dahil baka naman bored lang siya at naghahanap ng makakausap at nagkataon lang na ikaw ‘yung unang nagreply sa dami ng kinumusta niya.

3. TAGALAN ANG REPLY. Kung sa chat siya nangamusta, huwag mo munang i-seen at reply-an ang chat niya. Hayaan mo lang siyang matabunan sa inbox mo dahil kung talagang importante ang purpose ng pangangamusta niya, magme-message ulit siya sa ‘yo.

4. MAGING HONEST. Ipagpalagay nating mangungutang talaga kaya siya biglang nangamusta, ang dapat mo maging tugon d’yan ay, “Sorry, naka-budget na kasi ‘yung pera ko.” Ngunit kung kailangang-kailangan talaga niya ng pera at medyo nakakaluwag ka naman, eh ‘di pautangin mo na. At least, hindi na humaba ‘yung conversation n’yo sa pagpapaliguy-ligoy.

Nakakalungkot isipin na naaalala lang tayo ng ibang tao kapag may kailangan sila sa atin. Hindi naman required na makausap sila araw-araw, pero gasino man lang ‘yung maramdaman natin ang presence nila paminsan-minsan, without hidden agenda, ‘di ba?