2 inginuso sa sugal, tiklo sa shabu

ni Maeng Santos | September 11, 2020

Kulong ang dalawang lalaki nang maaktuhang nagka-cara y cruz at makuhanan pa ng higit sa P10,000 halaga ng shabu sa Caloocan City, kahapon ng madaling-araw.

Kinilala ang mga suspek na sina Ike Ruiz, 57, jeepney driver at Roger Albino, 41, truck helper, kapwa ng Bgy. 8, na kakasuhan ng paglabag sa Comprehensive Dangerous Drug Act of 2002 at illegal gambling.

Alas-3:30 ng madaling-araw nang respondehan nina PCpl. Jomel Salaysay at Pat. Jaypee Azucena ang natanggap na tawag mula sa concerned citizen hinggil sa grupo ng kalalakihan na nagsusugal at nambubulahaw.

Pagdating sa lugar, naaktuhan ang mga suspek na nagka-cara y cruz subalit, nagpulasan ang mga ito kaya hinabol sila ng mga pulis hanggang sa makorner sina Ruiz at Albino.

Nang kapkapan, nakuha kay Ruiz ang 0.8 gramo ng shabu na may halagang P5,440 habang 0.7 gramo naman ng shabu na nagkakahalaga ng P4,760 ang narekober kay Albino at nasamsam din ang tayang P300 at tatlong pangara.

2 labandera, tiklo sa P3.4-m shabu

ni Maeng Santos | August 4, 2020

Mahigit sa P3 milyong halaga ng shabu ang nasamsam sa dalawang labandera na bigtime umanong tulak ng ilegal na droga matapos maaresto sa buy-bust operation sa Caloocan City, Linggo ng gabi.

Kinilala ni Northern Police District (NPD) Director P/Brig. Gen. Ronaldo Ylagan ang naarestong mga suspek na sina Mary Jane Malabanan, 49, ng Bgy. 159 at Grace Palacio, 48, ng Bgy. 160, Sta Quiteria.

Narekober sa mga suspek ang aabot sa 500 gramo ng hinihinalang shabu na may standard drug price na P3,400,000 at buy-bust money.

Ani Caloocan Police Chief P/Col. Dario Menor, alas-11:20 ng gabi nang isagawa ang operasyon ng Station Drug Enforcement Unit (SDEU) sa pangunguna nina P/Capt. Joel Guimpatan at P/Capt. Danilo Esguerra, Jr. ng Sub-Station 6, sa harap ng bahay ni Malabanan.

Agad na dinakma ng mga operatiba ang mga suspek matapos bentahan ng shabu ang isang pulis na nagpanggap na buyer kapalit ng P70,000 marked money.

Mister sinita sa face mask, buking sa shabu

ni Maeng Santos | July 21, 2020

Nabisto ang dalang ilegal na droga ng isang mister na mahigit P.3 milyon ang halaga makaraang masita ng mga pulis dahil sa hindi pagsuot ng face mask sa Caloocan City, kamakalawa ng gabi.

Kinilala ni Caloocan Police Chief Col. Dario Menor ang naarestong suspek na si Roger Werble, 45, (user), driver at residente ng Maharlika Village, Taguig City.

Ayon kay Col. Menor, alas-10:05 ng gabi, habang nagsasagawa ng mobile patrol ang mga tauhan ng Caloocan Police SS2 sa P. Jacinto St. Corner Orbano St., Bgy. 87, Caloocan City nang mapansin nila ang suspek na walang suot na face mask.

Nilapitan nina Pat. Rommel Diaz at Pat Allan Delbert Cunanan ang suspek para alamin ang kanyang pagkakilanlan.

Nang buksan ng suspek ang kanyang bag ay tumambad ang tatlong sachets ng hinihinalang shabu.

Agad inaresto ang suspek at narekober sa kanya ang aabot sa 51 gramo ng hinihinalang shabu na tinatayang nasa P346,000 ang halaga at P10,000 cash.