Droga ipinadala sa JRS Express, buking

ni Maeng Santos | February 6, 2023

Nasamsam ng pulisya ang ilang paketeng naglalaman ng mataas na uri ng marijuana o “kush” matapos matuklasang kontrabando ang laman nito na ipinadala sa isang sangay ng courier service sa Caloocan City, kamakalawa ng hapon.

Ani Caloocan police chief P/Col. Ruben Lacuesta, kilala na nila ang nagpadala at tatanggap sana ng tatlong paketeng may pitong bungkos ng plastic sachet na naglalaman ng 700 gramo ng high grade marijuana na nagkakahalaga ng P84,000, isang naka-tape na plastic sachet na may lamang 50 gramo ng kush na nagkakahalaga ng P70,000 at 16 na vials ng marijuana oil na may halagang P112,000, at kasalukuyan nang

tinutugis ang mga ito ng kanyang mga tauhan.

Sa imbestigasyon ni P/MSg. Rico Mar William Bonifacio, alas-5:44 ng hapon nang matuklasan ng kawani ng isang sangay ng JRS Express sa Samson Road, Bgy. 72 ang kahina-hinalang paketeng ipinadadala sa kanila ng suspek sa Tagum City sa Davao De Norte kung saan nakalagay ang pangalan ng tatanggap.

Matapos niya itong inspeksiyunin, agad humingi ng tulong sa pulisya ang pamunuan ng sangay ng nasabing courier kaya rumesponde ang mga tauhan ng Grace Park Police Sub-Station 3 upang tugisin ang nagpadala subalit hindi na nila ito inabutan.

Ibinigay na ng courier sa pangangalaga ng Station Drug Enforcement Unit (SDEU) ang naturang kontrabando para sa dokumentasyon at disposisyon habang nagsilbi namang testigo sa inventory ang mga kagawad ng barangay at isang lehitimong mamamahayag.

Sinabi ni Col. Lacuesta na makikipag-ugnayan na rin sila sa Regional Police sa Davao Del Norte upang matunton ang lalaking tatanggap ng pakete habang patuloy ang kanilang follow-up operation para sa ikadarakip ng nagpadala nito.

Vendor, kulong sa baril

ni Maeng Santos | September 15, 2020

Kalaboso ang isang ice vendor matapos magpaputok ng baril sa Malabon City, kamakalawa.

Kinilala ni Malabon police chief Col. Jessie Tamayao ang suspek na si Henry Gososo, 40, ng Bgy. Longos.

Sa imbestigasyon nina PSSg. Diego Ngippol at PCpl. Michael Oben, nakatanggap ng tawag mula sa Bgy. Longos ang Station Intelligence Section hinggil sa napaulat na indiscriminate firing sa Block 8 Teachers Village Pampano St.

Agad nirespondehan ng mga pulis sa pangunguna ni PLt. Joel Aquino ang naturang report kung saan nagsagawa ang mga ito ng round the clock surveillance sa naturang lugar hanggang makarinig sila ng putok ng baril malapit sa kanilang puwesto alas-5:50 ng hapon.

Nang beripikahin ng mga pulis ay nakita nila ang suspek na may bitbit na baril kaya agad nila itong inaresto at nasamsam sa kanya ang isang cal. 38 revolver na kargado ng apat na bala at dalawang basyo ng bala.

2 inginuso sa sugal, tiklo sa shabu

ni Maeng Santos | September 11, 2020

Kulong ang dalawang lalaki nang maaktuhang nagka-cara y cruz at makuhanan pa ng higit sa P10,000 halaga ng shabu sa Caloocan City, kahapon ng madaling-araw.

Kinilala ang mga suspek na sina Ike Ruiz, 57, jeepney driver at Roger Albino, 41, truck helper, kapwa ng Bgy. 8, na kakasuhan ng paglabag sa Comprehensive Dangerous Drug Act of 2002 at illegal gambling.

Alas-3:30 ng madaling-araw nang respondehan nina PCpl. Jomel Salaysay at Pat. Jaypee Azucena ang natanggap na tawag mula sa concerned citizen hinggil sa grupo ng kalalakihan na nagsusugal at nambubulahaw.

Pagdating sa lugar, naaktuhan ang mga suspek na nagka-cara y cruz subalit, nagpulasan ang mga ito kaya hinabol sila ng mga pulis hanggang sa makorner sina Ruiz at Albino.

Nang kapkapan, nakuha kay Ruiz ang 0.8 gramo ng shabu na may halagang P5,440 habang 0.7 gramo naman ng shabu na nagkakahalaga ng P4,760 ang narekober kay Albino at nasamsam din ang tayang P300 at tatlong pangara.