Restobar nilooban, suki arestado

ni Maeng Santos @News | September 18, 2023

Kalaboso ang isang kawatan na nanloob sa isang restobar na madalas niyang puntahan sa Navotas City.

Kinilala ni Navotas police chief P/Col. Mario Cortes ang suspek na si Alvin Fernando, 22, ng Bgy. Tangos South.

Sa imbestigasyon ni P/SSgt. Edison Mata, madalas umanong magtungo ang suspek sa Negi’s Bar and Grill sa M. Naval St., Bgy. Sipac-Almacen upang uminom kaya’t kilala na siya ng manager na si Chysser Cruz, 34.

Sa kuha ng CCTV, nakita ang ginawang pagsira ni Fernando sa kandado ng pintuan ng bar, alas-4:37 ng madaling-araw pati na ang pagtangay niya ng P80,000 cash na nakalagay sa kahon bago tumakas, sakay ng electronic bike.

Humingi ng tulong si Cruz sa pulisya at matapos mapanood ang kuha ng CCTV camera sa kanyang mobile phone ay agad iniutos ni Col. Cortes ang pagtugis sa suspek na nagresulta sa pagkakaaresto sa kanya alas-6 ng gabi.

Nabawi sa suspek ang nasa P13,000 nalang at ang ginamit niyang E-bike.

Warden ng Malabon City Jail, sinibak

ni Maeng Santos | June 25, 2023

Inalis na sa puwesto ang warden ng Malabon City Jail matapos magsagawa ng noise barrage at paninira ng mga gamit ang mga persons deprived of liberty (PDLs) makaraang ilipat ang dalawa nilang kasamahan na tumatayong mayores, Biyernes ng hapon.

Sa pahayag ni Chief Insp. Jayrex Bustinera, tagapagsalita ng Bureau of Jail Management and Penology (BJMP), pansamantalang inalis sa puwesto ang warden na si Supt. Joseph Tacdoy at ipinalit bilang OIC si Chief Insp. Vic Luque habang nagsasagawa ng imbestigasyon.

Ayon naman kay Malabon police chief P/Col. Amante Daro, nagsimulang maging marahas ang mga PDLs alas-4:30 ng hapon nang ilabas mula sa pasilidad ang magkapatid na Anthony at Danilo Francisco na kapwa nahaharap sa kasong may kinalaman sa ilegal na droga at sila ring tumatayo bilang mayores sa mga selda ng grupong “Sputnik”, upang ilipat sa Metro Manila District Jail (MMDJ) sa Camp Bagong Diwa, Taguig City.

Ani Col. Daro, inilipat sa Bicutan ang magkapatid matapos maglabas ng “commitment order” o kautusan ang Malabon City Regional Trial Court sa kanilang paglilipat sa MMDJ na mariing tinutulan ng mga PDL.

Nagtungo naman sa lugar si Mayor Jeannie Sandoval upang alamin ang sitwasyon at gumawa ng kaukulang hakbang para matulungang resolbahin ang problema ng mga PDL.

Napasugod din ang mga kaanak ng mga PDL at si Vice Mayor Bernardo “Ninong” Dela Cruz naman ang tumulong para mapahinahon ang mga PDL at inalam ang kanilang mga hinaing.

Maliban sa hirit na alisin sa puwesto ang warden at lima pang opisyal na nakatalaga sa MCJ, inireklamo rin ng mga PDL ang umano’y hindi makataong pagtrato sa kanila at hindi anila makain maski hayop na iniluluto umanong pagkain para sa kanila.

Mga preso sa Malabon City Jail, nag-noise barrage

ni Maeng Santos | June 24, 2023

Nagsagawa ng noise barrage ang mga Person Deprived of Liberty (PDL) na nakapiit sa Malabon City Jail bilang protesta umano sa warden ng nasabing kulungan, Biyernes ng hapon.

Ayon sa ulat, alas-4:30 ng hapon nang magsimulang mag-noise barrage ang mga PDL sa loob ng MCJ na matatagpuan sa Sanciangco St., Bgy. Catmon sa pamamagitan ng pagbasag ng mga salamin ng kulungan.

Pinuprotesta umano ng mga PDL ang warden ng MCJ at ang paglipat ng dalawang PDL na mayores ng nasabing kulungan sa Metro Manila District Jail.

Agad namang nagsagawa ng area security ang mga tauhan ng Malabon City Police malapit sa paligid ng MCJ para masigurong walang makatakas sa mga PDL, maging ang BPF-Malabon ay rumesponde rin sa lugar.

Habang isinusulat ang balitang ito ay nagpapatuloy ang negosasyon sa pagitan ng mga PDL at ng mga awtoridad sa pangunguna ng isang Major.