Ammonia leak at sunog sa Navotas, 1 patay, 24 naospital

ni Maeng Santos | June 21, 2023

Isang binatilyo na may comorbidities ang nasawi habang 24 iba pa ang naospital matapos makaranas ng hirap sa paghinga dahil sa pagtagas ng ammonia sa isang cold storage facility sa Navotas City, kamakalawa ng gabi.

Alas-10:50 ng Lunes ng gabi nang maganap ang insidente ng ammonia leak sa Icy Point Cold Storage sa Bgy. Northbay Boulevard North kaya agad na lumikas ang mga residenteng nakatira malapit sa lugar habang alas-12:06 naman ng hatinggabi nang sinundan ng pagsiklab ng sunog sa kalapit na mga kabahayan.

Agad rumesponde sa naturang lugar ang City DRRMO-Joint Rescue Team, BFP-Navotas, at mga fire volunteer para pagtulungan na mapigilan ang pagtagas ng ammonia at apulahin ang apoy.

Nagtungo rin sa lugar si Cong. Toby Tiangco, kasama si Vice Mayor Tito Sanchez at Chief NCDRRMO Vonne Villanueva para i-monitor ang insidente at magbigay ng tulong sa apektadong mga pamilya.

Ayon sa Navotas City Public Information Office, ala-1:42 ng Martes ng madaling-araw nang ma-secure ng joint rescue team ang control valve para tumigil ang pagtagas ng ammonia habang ala-1:57 ng madaling-araw nang idineklarang fireout ng BFP ang sunog.

Matapos nito, nag-uwian na sa kani-kanilang bahay ang mga residente habang isinugod naman ang 24 katao, kabilang ang 11 menor-de-edad sa Navotas City Hospital (NCH) at Tondo Medical Center (TMC).

Isinugod din sa MCU hospital ang 16-anyos na binatilyo subalit, namatay din ito kalaunan dahil sa kakapusan ng hininga dulot ng ammonia inhalation habang ayon sa huling ulat ay dalawang pasyente na lang ang nanatili sa NCH.

Iniutos naman ng Pamahalaang Lungsod ng Navotas sa pamumuno ni Mayor John Rey Tiangco ang pansamantalang pagsasara ng Icy Point Cold Storage habang nakabinbin ang imbestigasyon na isasagawa ng BFP-Navotas, City Health Office, Sanidad, City Environment & Natural Resources Office, at Business Permits and Licensing Office.

Nagtalaga rin ang pamahalaang lungsod ng mga health workers at naka-standby na ambulansya sa lugar para magbigay ng agarang pangangalagang medikal, kung kinakailangan.

Online agent, tiklo sa P1M droga

ni Maeng Santos | April 16, 2023

Halos P1 milyong halaga ng pinatuyong dahon ng marijuana ang nasamsam ng pulisya sa isang drug personality sa Valenzuela City, kahapon ng madaling-araw.

Kinilala ni Valenzuela police officer-in-charge P/Col. Salvador Destura, Jr., ang suspek na si Jao Co, 26, online agent, ng Bgy. Dalandanan.

Sa kanyang report kay NPD Director P/BGen. Ponce Rogelio Penones, Jr., sinabi ni Col. Destura na naaresto ng mga operatiba ng SDEU ang suspek matapos bentahan ng isang plastic-wrapped brick ng marijuana na nagkakahalaga ng P11K ang pulis na nagpanggap na buyer.

Ani SDEU chief P/Capt. Joel Madregalejo, isinagawa nila ang buy-bust ala-1:10 ng madaling-araw sa harap ng Dalandanan covered court sa San Simon St., Bgy. Dalandanan, matapos makatanggap ng impormasyon na nagbebenta umano ng

marijuana ang suspek.

Nakuha sa suspek ang walong plastic-wrapped brick ng pinatuyong dahon ng marijuana na tumitimbang ng nasa 8,000 gramo na may standard drug price value na P960,000 at buy-bust money.

Matapos ang pagsabog.. Printing office nagliyab, 4 patay

ni Maeng Santos | April 6, 2023

Nasawi ang apat na manggagawa sa isang printing office matapos sumiklab ang sunog sa kanilang tanggapan sa Valenzuela City, kamakalawa ng hapon.

Hindi muna pinangalanan ni Valenzuela Fire Marshal Supt. Ana Mae Legaspi ang apat na kalalakihang namatay nang ma-trap makaraang sumiklab ang sunog sa pinaglilingkurang printing press sa Bgy. Ugong, sa naturang lungsod.

Sa panayam kay FO1 Kim Alnas ng Valenzuela Bureau of Fire Protection, nagsimula ang sunog alas-3:57 ng hapon matapos marinig ang isang malakas na pagsabog na sinundan ng mabilis na pagsiklab ng apoy.

Mabilis namang nakapagresponde ang mga bumbero ng Valenzuela BFP, pati na ang ilang fire volunteers kaya agad ding nakontrol ang apoy na umabot sa unang alarma bago tuluyang naapula alas-4:35 ng hapon.

Inaalam pa ni Arson investigator FO2 Paul Fajardo ang dahilan at pinagmulan ng pagsabog at pagsiklab ng apoy na tumupok sa hindi pa batid na halaga ng ari-arian.

Agad namang nagtungo si Valenzuela City Mayor Wes Gatchalian, kasama ang opisyal at kawani ng City Social Welfare and Development Office sa pinangyarihan ng sunog, upang makiramay at maghandog ng kaukulang tulong sa naulilang pamilya ng mga nasawi.