Dagdag-sahod sa titser, pinag-aaralan pa — DepEd

ni Madel Moratillo @News | July 12, 2023

Pinag-aaralan pa ng Department of Education (DepEd) ang panawagan para sa dagdag-sahod sa mga guro.

Gayunman, paliwanag ni DepEd spokesperson Michael Poa, hindi puwedeng sila lang ang magdesisyon sa wage hike.

Nabatid na kumuha na ang DepEd ng serbisyo ng third party experts para alamin kung competitive pa ang suweldo ng mga guro.

Nais din aniya nilang malaman ang tamang rate ng dagdag na kanilang ibibigay dahil sa epekto ng inflation.

Bilang sagot naman sa ulat na may ilang guro ang hindi pa nakakatanggap ng performance-based bonus noong 2021, tiniyak ni Poa na makukuha na nila ito pagkatapos ng processing sa loob ng 2 hanggang 3 linggo.

Iginiit din niya na walang nangyaring delay, kundi dahil ito sa proseso.

“It’s really the process, talagang may reconciliation 'yan because 2021 'yung pinag-uusapan natin na bonus year, so we have to make sure na 'yung mga empleyadong tatanggap ay 2021," pahayag ni Poa.

June-March na pasukan, 5 taon pa bago maibalik — DepEd

ni Madel Moratillo @News | July 12, 2023

Hindi pa maibabalik ng Department of Education sa dati ang academic calendar.

Ayon kay DepEd spokesperson Michael Poa, posibleng abutin pa ng 3 hanggang 5 taon bago maibalik ang June to March academic calendar.

Dahil sa matinding init ng panahon, may mga nananawagan na ibalik na sa dati ang pasukan ng eskuwela.

Ayon kay Poa, naghihintay pa sila ng resulta ng final evaluation ng ginawang pag-aaral ng DepEd.

Posible rin naman aniyang bumalik sa dati pero aabutin pa ito ng ilang taon. Kailangan aniyang timbangin ang pros and cons ng pagbabalik ng school calendar sa dati.

Nabatid na ikinukonsidera rin ng DepEd ang minimum number ng school days na sa ngayon ay nasa 200.

Pansamantala, bilang alternatibo sa init ng panahon, nagsabi na sila sa mga pinuno ng eskuwelahan na huwag munang papasukin ang mga bata. Puwede naman aniya ang alternative schooling.

'NBI live show', pinalagan.. Sumasayaw nang sexy sa noontime shows, ipagbawal din — Remulla

ni Madel Moratillo @News | July 11, 2023

Umaasa si Justice Secretary Jesus Crispin 'Boying' Remulla na mabago na ang kultura ng mga Pinoy na kahit mga bata ay ginagawang bikini contestant at pinagsasayaw kahit sa mga noontime show.

Giit ni Remulla, may problema sa bansa at ang ganitong kultura ay dapat maalis na.

Ang pahayag ng kalihim ay kasunod ng labis na pagkadismaya sa kontrobersiyang kinasangkutan ng National Bureau of Investigation na may sexy performers sa isang event.

“Marahil dapat tingnan natin 'yung kulturang 'yan ng mga Pilipino. Sana mga noontime shows, wala nang sumasayaw-sayaw na mga bata. Pati minsan mga batang musmos pinapasayaw-sayaw nila, ginagawang bikini contestant, pinagsusuot ng mga 'di dapat suotin. 'Yung ating kultura bilang Pilipino, dapat ibahin natin. Hindi lang po ito sa NBI kundi sa ating lahat mismo. May problema po bansa natin,” pahayag ni Remulla.

Samantala, tukoy na ng Department of Justice ang opisyal ng NBI na nag-imbita ng sexy dancers sa command conference ng ahensya.

Una rito, nagviral sa social media ang video kung saan may makikitang mga babae na nagsasayaw sa isang event ng NBI.

Tumanggi naman muna si Remulla na pangalanan ang nasabing opisyal. Bagama't kinumpirma niyang nagtangkang lumapit sa kanya ang nasabing opisyal pero inatasan niya itong magpaliwanag “in paper”.

Ayon sa kalihim, tatlong performers umano ang kinuha para sa nasabing event. Giit ng DOJ secretary, walang pera ng gobyerno na ginamit para ibayad sa nasabing dancers.

Ang pera ay galing sa aniya'y “old men” na akala ay mga “adolescent” pa sila.

Ayon sa kalihim, nakakahiya ang pangyayari at hindi niya ito nagustuhan. Dapat ay magsilbing aral aniya ito sa lahat.