Papasok ng 'Pinas, vax certificate'di na kailangan — DOH

ni Madel Moratillo @News | August 10, 2023

Sa updated guidelines na inilabas ng Department of Health (DOH), nakasaad na kahit ano ang vaccination status ng isang indibidwal ay papayagan itong makapasok sa Pilipinas.

Sa nasabing guidelines, hindi na kailangang magprisinta ng vaccination certificate ang lahat ng international traveler na papasok sa bansa.

Nakadepende naman sa destinasyong bansa kung may vaccination requirements para sa mga lalabas ng Pilipinas.

Kaya payo ng DOH sa mga lalabas ng bansa, alamin muna ang requirements sa bansang pupuntahan.

Para naman sa overseas Filipino workers at seafarers, depende sa agency o kumpanya ang requirements sa vaccination.

Assessment, start na — DSWD.. Nakaluwag-luwag na, out sa 4Ps

ni Madel Moratillo @News | August 9, 2023

Nagsasagawa na ng malawakang assessment ang Department of Social Welfare and Development sa mga benepisyaryong kabilang sa Pantawid Pamilyang Pilipino Program (4Ps).

Sa ilalim nito, tinitignan ang mga benepisyaryo na wala na sa kategoryang mahirap o nasa listahan ng non-poor.

Kasunod ito ng direktiba ni Secretary Rex Gatchalian na i-reassess ang mga nasa listahan ng programa.

Sa pamamagitan ng Social Welfare and Development Indicators tool, aalamin ang kondisyon ng pamumuhay ng pamilyang kabilang 4Ps.

Ang mga benepisyaryo na mapapabilang sa kategorya ng “self-sufficient” ay isasailalim sa case management saka opisyal na lalabas sa programa. Makatatanggap naman ang mga apektadong benepisyaryo ng cash grants depende sa resulta ng assessment at pagsunod sa mga itinakdang kondisyon ng programa.

Teenage pregnancy, tumataas

ni Madel Moratillo @News | August 6, 2023

Naaalarma na ang Commission on Population Development sa pagtaas ng bilang ng teenage pregnancy.

Ayon kay CPD Executive Director Lisa Bersales, sa kanilang monitoring nitong 2022 nasa 5.4 porsyento ng mga nasa edad 15 hanggang 19 ang nabubuntis.

Bagama't mas mababa na ito kumpara sa 8.5% noong 2017, mataas pa rin aniya ang 5.4%.

Pero mas nakakaalarma aniya ang tumataas na trend ng mga nabubuntis sa mga batang babae na nasa edad 10 hanggang 14.

Noong 2016, may naitala aniyang 21.6% sa nasabing age group ang nabuntis.

Ayon kay Bersales, ang maagang pagbubuntis ay may epekto sa katawan ng bata sa kanyang pagtanda.

Ang mga babaeng nasa edad 10 hanggang 19 aniya ay nasa stage palang dapat ng preparasyon sa adulthood at hindi sa pagbubuntis.