Kahit hinarass na naman ng China.. Resupply mission sa Ayungin Shoal, tagumpay

ni Madel Moratillo / Jeff Tumbado @News | August 23, 2023

Kinumpirma ng National Task Force for the West Philippine Sea ang matagumpay na resupply mission sa BRP Sierra Madre sa Ayungin Shoal.

Sa isang pahayag, sinabi ng Task Force na hindi naging madali ang resupply mission dahil tinangka pa rin silang harangin ng mga barko ng China Coast Guard at Chinese Maritime Militia.

Nagkaroon din umano ng harassment pero sa kabila nito, matagumpay na nakarating ang supply ships Unaizah May 1 at Unaizah May 2 sa BRP Sierra Madre.

Nakaalalay naman sa kanila ang BRP Cabra at BRP Sindangan ng Philippine Coast Guard.

Gayunman, dahil may dati ng water cannon incident na nangyari noong August 5, naka-standby na rin ang Philippine Navy sa buong panahon ng misyon. Matatandaang noong Agosto 5, isang bangka lang ang nakarating at nagtagumpay sa paghahatid ng misyon kaya muling nagsagawa ng resupply mission ngayong buwan.

Target ng Comelec.. Nationwide mall voting sa 2025

ni Madel Moratillo @News | August 21, 2023

Target ng Commission on Elections (Comelec) na makapagsagawa na rin ng mall voting sa 2025.

Samantala, para sa Barangay and Sangguniang Kabataan Elections sa Oktubre, sampung lugar ang susubukan ng Comelec para magsagawa ng mall voting.

Gagawin ito sa Metro Manila at tig-isa naman sa Cebu at Legazpi City.

Ayon kay Comelec Chairperson George Garcia, magsisilbing pilot testing ang mga ito para sa target na mall voting sa 2025.

Ani Garcia, nasa 400 hanggang 500 ang mall sa bansa. Kung magiging matagumpay ito, puwede nang hindi gamitin ang mga eskwelahan bilang polling center at hindi na aniya maiistorbo ang pag-aaral ng mga bata.

Wala naman aniyang dagdag na gastos dito ang Comelec dahil libre itong ipinagkakaloob ng mall owners o operators.

Nitong Sabado, una nang nagkaroon ng mall voting simulation ang poll body sa 4 na lugar bilang paghahanda sa BSKE.

Nanawagan naman sa Comelec si Helen Graido, policy consultant ng election watchdog na Lente, na mailipat sana sa ground floor ng mga mall ang botohan para mas maging accessible sa mga senior citizen, persons with disability, at buntis.

Dekorasyon sa klasrum, bawal — DepEd

ni Madel Moratillo @News | August 20, 2023

Simula sa pagbubukas ng klase sa Agosto 29, wala nang makikitang mga dekorasyon sa wall ng silid-aralan sa mga pampublikong paaralan.

Batay kasi sa inilabas na direktiba ng Department of Education (DepEd), ang mga school grounds, classrooms at pader nito at iba pang school facilities ay dapat malinis mula sa anumang hindi kinakailangang artwork, decorations, tarpaulin, at posters sa lahat ng oras.

Ito ay para umano mas makapag-focus ang mga estudyante.

Bawal din ang oversized na mga signages na may commercial advertisements, sponsorships, o endorsements o anunsyo. Nagpaalala rin ang DepEd na hindi sapat maging tambakan ng mga materyales ang mga silid-aralan at dapat malinis ito mula sa mga bagay na hindi naman ginagamit.

Ayon kay Vice President at DepEd Secretary Sara Duterte, dapat na malinis ang classroom para ang atensyon ng mga estudyante ay nasa guro at libro.