TikTok, ipagbawal sa gov't. officials — NSC

ni Madel Moratillo @News | September 10, 2023

Pinag-aaralan ng National Security Council ang posibilidad ng pag-ban sa TikTok sa mga uniformed personnel ng gobyerno.

Gayunman, paglilinaw ni NSC Assistant Director General Jonathan Malaya, kailangan itong pag-aralang mabuti lalo at may probisyon sa Saligang Batas patungkol sa freedom of expression and speech.

Kailangan aniyang matiyak na kung iba-ban ang TikTok sa mga empleyado ng gobyerno, ito ay batay sa national security. Ilang bansa na gaya ng Estados Unidos, India, at Canada ang nag-ban sa mga state workers sa TikTok, isang Chinese owned company.

Kasunod ito ng isyu sa posibleng data leak na magamit ng Chinese government.

Paglilinaw pa ni Malaya, sa Pilipinas sakaling kailanganin na i-ban ang TikTok, hindi naman makakasama rito ang public school teachers at mga nasa civilian agency. Sa halip ay para lang sa mga nasa security sector gaya ng Armed Forces.

Ayon naman kay Armed Forces of the Philippines (AFP) spokesperson Col. Medel Aguilar, meron na silang ipinatutupad na patakaran sa paggamit ng TikTok sa militar.

P7.43B gamot ng DOH, expired, mae-expire na — COA

ni Madel Moratillo @News | September 8, 2023

Aabot sa 7.43 bilyong pisong halaga ng mga gamot at iba pang nasa imbentaryo ng Department of Health (DOH) ang expired na, malapit nang mapaso o damaged na.

Batay ito sa pinakahuling report ng Commission on Audit, kung saan nakitaan ng deficient procurement planning, poor distribution at monitoring systems, at iba pang kahinaan sa internal control sa kagawaran na nagresulta umano ng pagkasayang ng pondo ng gobyerno.

Nakasaad sa audit report ang Presidential Decree No. 1445 o ang Government Auditing Code of the Philippines na lahat ng resources ng gobyerno ay dapat ma-manage nang naaayon sa batas para maiwasan ang pagkasayang.

Ang expired na gamot at iba pang imbentaryo ay nagkakahalaga ng P2.391 million, habang ang iba naman ay slow-moving stocks na nagkakahalaga ng P5.6 billion at ang na-delay o hindi naipamahagi ay nagkakahalaga ng P1.5 billion. Binanggit din sa COA

report na may 2.2 milyong vials at 1.6 milyong doses ng wasted at expired COVID-19 vaccines ang nakita.

Mayroon ding 11,976 bakuna ang malapit nang mapaso.

Sinabi umano ng DOH sa COA na naipag-utos na nila ang proper disposal ng expired na mga gamot.

Inatasan na rin umano ng DOH ang kanilang supply officers na regular na mag-monitor ng natitirang stocks bago tumanggap ng deliveries para maiwasan ang overstocking.

Price cap sa bigas, 1 buwan lang — DTI

ni Madel Moratillo @News | September 7, 2023

Hindi umano magiging pangmatagalan ang ipinatutupad na price ceiling sa bigas.

Ayon kay Trade and Industry Asec. Agaton Teodoro Uvero, posibleng abutin lang ito ng ilang linggo o isang buwan. Inaasahan kasing huhupa rin ang presyo nito sa oras na magsimula na ang anihan.

Kapag marami ng suplay ng bigas, sunod ay bababa na ang presyo nito.

Sa pagtaya ng opisyal, posibleng sa susunod na 3 linggo lang ay bumuti na ang suplay ng bigas.

Ang napag-usapan rin naman aniya ay hindi lalagpas ng 1 buwan.

Sa ilalim ng inaprubahang executive order ni Pangulong Ferdinand Marcos, Jr., itinakda ang price ceiling sa regular milled rice sa P41 kada kilo, at P45 kada kilo sa well-milled rice.