P17.27B inilabas ng DBM para sa mabilis na konstruksyon ng 4,960 klasrum

ni Lulet Abania @News | April 22, 2026

Photo: File / DepEd PH

Ipinahayag ng Department of Budget and Management (DBM) nitong Martes, Abril 21 na inaprubahan nito ang pagre-release ng P17.27 bilyon sa Department of Education (DepEd) para mapabilis ang konstruksyon ng 4,960 klasrum sa buong bansa.

Ayon sa ahensya, inaprubahan ni DBM Secretary Rolando Toledo ang isang Special Allotment Release Order (SARO) para sa layuning ito noong Abril 13, 2026.

Ang naturang halaga ay magpopondo sa pagtatayo ng libu-libong silid-aralan sa buong bansa, kabilang ang pagkakaloob ng mahahalagang school furniture at mga kagamitan.

Sinabi pa ng DBM na ang inilabas na pondo ay mula sa P85.40 bilyong Basic Education Facilities (BEF) Fund sa ilalim ng 2026 General Appropriations Act (GAA).

Sa posibleng impeachment trial ni VP Sara… SP Sotto, nakipag-usap sa ilang miyembro ng mayorya

ni Lulet Abania @News | April 20, 2026

Photo: File / Inday Sara Duterte / Senate PH

Ipinahayag ni Senate President Vicente “Tito” Sotto III ngayong Lunes, Abril 20 na inimbitahan niya ang ilang senador mula sa majority bloc para talakayin ang posibilidad ng articles of impeachment laban kay Vice President Sara Duterte na maipadala sa Senado ng House of Representatives.

Ayon kay Sotto, na posibleng maupo bilang presiding officer ng impeachment court na inaasahang maglilitis sa naturang complaint laban kay VP Sara, dapat maghanda ang mga potensyal na senator-judges sa anumang puwedeng mangyari.

“I just wanted to give my colleagues a heads up on the possibility of receiving the Articles of Impeachment from the HOR [House of Representatives]. It’s best that we prepare for it as senator judges,” he said.

Gayunman, nilinaw ng SP Sotto na ang pagtitipon ay hindi caucus o opisyal na pagpupulong ng Senado dahil nag-imbita lamang siya ng mga mayoryang senador para sa isang dinner.

Aniya pa, “[They will] remain impartial and wait for whatever will be presented.”

Bigtime roll back

ni Lulet Abania @News | April 19, 2026

Photo: File

Hinimok ni Pangulong Ferdinand “Bongbong” Marcos, Jr. nitong Sabado, Abril 18 ang mga kumpanya ng langis na ipatupad nang buo ang rollback sa presyo ng mga produktong petrolyo sa gitna ng inaasahang malaking pagbawas nito sa susunod na linggo.

Sa isang video message, sinabi ni PBBM na inaasahang bababa ang presyo ng diesel ng P24.94 kada litro, gasolina ng P3.41, at kerosene ng P2.00.

“Mas malaki ito kaysa sa rollback noong nakaraang linggo at malinaw ang ibig sabihin nito para sa ating lahat. May ginhawang parating,” pahayag ng Pangulo.

Dagdag pa niya, “At sa ating mga oil companies, malinaw naman ang aking panawagan. Ipatupad ninyo ang rollback nang buo, tama, at walang pagkaantala. Ibigay ninyo sa taumbayan ang dapat naman na nasa kanila.”

Matatandaang sinabi ng Department of Energy (DOE) nitong Miyerkules na maaaring asahan ang isa pang round ng rollback sa susunod na linggo.