Gumagawa at bumibili ng pekeng COVID-19 test result, dapat makulong!

ni Leonida Bonifacio Sison - @Boses | February 9, 2021

Mula nang kumalat ang pekeng COVID-19 swab test result, hindi na natapos ang mga ulat tungkol dito. Ito kasi ang requirement para makabalik sa trabaho o makapasok sa mga pasyalan.

At kamakailan, anim na residente ng Metro Manila ang hindi nakapasok sa Boracay matapos magpakita ng pekeng RT-PCR test certification at napag-alamang tatlo rito ang nagpositibo sa COVID-19.

Bago pa ito, dalawang turista ang inaresto rin sa Boracay matapos mapag-alamang peke ang ipinakitang resulta.

Dahil dito, inatasan ng Department of Interior and Local Government (DILG) ang Philippine National Police (PNP) na maging agresibo sa paghahanap sa mga indibidwal o grupo na namemeke ng COVID-19 swab test result.

Nais din ng ahensiya na arestuhin at kasuhan ng PNP ang mga gumagawa, maging ang mga may hawak ng pekeng swab test result.

Matatandaang sa ilalim ng Republic Act (RA) No. 11332 o Mandatory Reporting of Notifiable Disease and Health Events of Public Health Concern Act, maaaring pagmultahin ng P50,000 at makulong ng hindi bababa sa isang buwan at hindi lalampas ng anim na buwan ang lalabag.

Bilang mamamayan, tayo ay may obligasyon din para matigil ang pamemeke ng dokumento.

Oras na para maging responsable ang bawat isa sa atin dahil akala n’yo nakakalusot kayo, pero sa totoo lang, malaking problema ang dala n’yo, hindi lang sa inyong mga sarili kundi pati sa ibang tao.

Totoong mahal magpa-test, pero at least, alam n’yong negatibo kayo sa sakit.

Panawagan naman sa mga awtoridad, pakibilis-bilisan ang pagkilos dahil hangga’t may mga namemeke, hindi matitigil ang gawaing ito.

Kapag may naiulat na nameke ng dokumento, aksiyunan agad. ‘Wag nating hintayin na lalo pang dumami ang gumagawa nito bago tayo maghigpit.

At kayong mga namemeke, kayo ang isa sa mga dahilan kaya napakaraming pasaway. Wala na kayong nagawang maganda kontra pandemya, dinagdagan n’yo pa ang problema.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

“No parking” signages sa mga kalsada, kailangan na

ni Leonida Bonifacio Sison - @Boses | February 8, 2021

May isang linggo pa bago ang deadline ng Road Clearing 2.0.

Paspasan na ang paglilinis ng mga kalsada sa iba’t ibang panig ng bansa para matutukan na ng mga lokal na pamahalaan ang national vaccination program kontra COVID-19.

Dahil dito, bilang bahagi ng road clearing operations, hinikayat ng Department of the Interior and Local Government (DILG) ang lahat ng lokal na pamahalaan na maglagay ng “no parking” signs sa mga kalsada.

Ito ay para hindi na magbalikan pa ang mga sasakyang naitataboy sa ginagawang road clearing operations.

Kasabay nito, inatasan ng DILG ang Philippine National Police (PNP) na tumulong sa LGUs sa kanilang road clearing operation, lalo na kung may nakakaharap silang pasaway na residente.

Iminungkahi rin ng DILG na bigyan ng kapangyarihan ang mga towing services para mabilis na matanggal ang mga sasakyan na nakakasagabal sa mga kalsada at bangketa.

Matatandaang, noong nakaraang taon pa ipinatupad ang nasabing programa, na naglalayong linisin ang lahat ng nakahambalang sa mga kalsada.

Sa totoo lang, nakakalungkot dahil kailangan pang maglagay ng signages para lang mapigilan ang mga pasaway na gumarahe sa kalsada kahit dapat ay kusa na natin itong ginagawa.

Kunsabagay, ganyan naman talaga ang mga Pinoy, kailangan pang pukpukin bago matauhan.

Gayunman, natatandaan n’yo ba ang lalaking nahagip ng rumaragasang SUV dahil napilitang dumaan sa kalsada dahil sa mga nakaparadang tricycle sa sidewalk?

Sa insidenteng ito pa lang, dapat natuto na tayo. Kaya nga nililinis ang mga kalye ay para sa kaligtasan at kaayusan ng lugar at hindi para humanap ng panibagong sakit ng ulo.

Habang hinihimok ng DILG ang mga lokal na pamahalaan, tayong mamaayan ay may dapat ding gawin. Tandaan na kapag sinabing bawal, ‘wag nang pasaway. At isa pa, ang kalsada ay daanan at hindi garahe!

Utang na loob, kung hindi kayo magiging responsableng car owner at residente, ‘wag nang mag-kotse!

Samantala, para matiyak na lahat ay susunod at hindi tayo puro pananakot o babala lang, tiyaking lahat ng lalabag ay masasampolan.

At kayong mga barangay officials, responsible rin kayo sa kaayusan ng inyong lugar.

‘Ika nga, ‘wag puro asa sa mga nakatataas dahil imposibleng maging matagumpay ang operasyong ito kung may nag-iisang pasaway.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Target na makagawa ng 2.8 milyong trabaho ngayong 2021, matupad sana!

ni Leonida Bonifacio Sison - @Boses | February 7, 2021

Isang taon matapos pumutok ang COVID-19 pandemic, milyun-milyong manggagawa pa rin ang walang trabaho sa bansa.

Base sa October 2020 Labor Force Survey ng Philippine Statistics Authority, nasa 8.7% o 3.8 milyon ang unemployment rate sa bansa, na mas mababa sa 17.7% unemployment rate o 7.2 million jobless adults na naitala noong Abril 2020 kung kailan ipinatupad ang lockdown dahil sa COVID-19 pandemic.

Dahil dito, target ng pamahalaan na makalikha ng 2.4 hanggang 2.8 milyong trabaho ngayong taon bilang bahagi ng employment recovery strategy para maibsan ang naging epekto ng COVID-19 pandemic sa hanay ng mga manggagawa.

Noong Biyernes, pumirma sa joint memorandum circular (JMC) sa paglikha ng National Employment Recovery Strategy (NERS) Task Force ang iba’t ibang ahensiya ng gobyerno, kabilang ang Labor and Employment (DOLE), Trade and Industry (DTI), Transportation (DOTr), Tourism (DOT), Budget and Management (DBM), Education (DepEd), Interior and Local Government (DILG), Social Welfare and Development (DSWD), Science and Technology (DOST) at Technical Education and Skills Development Authority (TESDA).

Ang NERS ay isang medium-term plan na layuning makalikha ng mga trabaho.

Sa totoo lang, magandang balita ito para sa mga ordinaryong mamamayan na nawalan ng hanapbuhay, pero mas maganda kung mas maaga itong mapakikinabangan.

Sa kabila kasi ng mga tulong mula sa gobyerno, marami pa rin tayong kababayan na hirap makaraos sa araw-araw.

Gayunman, hangad natin na hindi lang ito maging target o pangarap lang dahil kailangang-kailangan ng ating mga kababayan ng hanapbuhay.

Isa pa, magtatapos ang unang batch ng mga mag-aaral sa K-12 program, kaya inaasahang madaragdagan ang puwersa ng mga manggagawa sa 2022 at mas maraming aplikante.

Kung magkakaroon ng sapat na trabaho para sa ating mga kababayan, dapat nating asahan na makakabawi ang sektor ng paggawa.

‘Yun nga lang, hintay-hintay muna, kaya panawagan sa mga kinauukulan, bilis-bilisan natin ang pagkilos.

At para naman sa ating mga kababayan, tiwala at tiyaga lang, magkakaroon din ng oportunidad.

‘Ika nga, sama-sama tayong babangon ngayong taon, kaya ‘wag tayong mawalan ng pag-asa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com