Tips para iwas-aberya sa pagko-commute

ni Justine Daguno - @Life and Style | May 06, 2021

Bagama’t isa ang pagko-commute sa mga bagay na ‘basic’ na bahagi ng pang-araw-araw na gawain ng marami sa atin, naging napakahirap nito dahil sa pandemya na kasalukuyan nating nararanasan. Malaki ang ipinagbago ng paraan ng pagko-commute — nabago ang lahat mula sa ruta hanggang sa sistema. Kaya naman, narito ang ilan sa mga tips para iwas-aberya at ‘easy’ pa rin itong magawa:

1. MAGING PAMILYAR SA LUGAR. Huwag pumunta sa lugar na wala man lang ideya. Limitado ang oras ng biyahe dahil sa pandemya kaya kung bago palang sa lugar na pupuntahan, makabubuti kung magba-background check muna. Alamin sa apps, internet o magtanung-tanong sa mga kakilala ng mga terminals, landmarks at iba pang makatutulong para mas maging pamilyar sa lugar.

2. DAPAT MAY EXTRA MONEY. Travel man o simpleng transaksiyon lang ang dahilan ng pagko-commute, dapat palaging may ekstrang pera. Maraming puwedeng mangyari sa araw-araw na transportasyon tulad ng masisiraan ang sasakyan, cutting-trip at ang masaklap ay maligaw kaya siguraduhing may extra money, bukod pa sa budget na pamasahe.

3. MAGLAAN NG ALLOWANCE SA BIYAHE. Muli, maraming puwedeng mangyari habang nasa biyahe at isa sa mga hindi inaasahan ay ang lagay o daloy ng mga sasakyan. Siguraduhing maglalaan ng allowance sa oras ng appointment o lakad. Puwedeng itantiya kung gaano kalayo ang lugar nang sa gayun ay malalaman kung ilang oras ang ilalaan sa biyahe.

4. SIGURADUHING KOMPORTABLE SA KASUOTAN. Malaking karagdagan sa ‘hassle’ ng pagko-commute kapag hindi komportable ang suot na sapatos o damit. Bago umalis ng bahay, siguraduhing makagagalaw nang maayos sa kasuotan.

5. MAG-OBSERVE SA PALIGID. Isang malaking ‘battle field’ ang kalsada kung saan iba’t ibang problema at personalidad ang maaari nating makasalamuha kaya mahalaga na marunong makiramdam at maging observant sa paligid. Oks lang matulog pero tandaan na ang sasakyan ay hindi kuwarto o personal space, kaya siguraduhin na ikaw pa rin ay alerto.

Mahirap maka-survive kapag kulang sa diskarte. Hindi puwede na palaging walang alam sa mga bagay-bagay dahil kung hindi papalpak ang gawain, malamang ay maisahan naman ng mga mapagsamantala. Kaya bago lumabas, bukod sa may suot na facemask, face shield at may dalang alcohol, ‘wag din kalimutan ang presence of mind. Okie?

Kahit bawal ang outing… 5 tips para feeling fresh ngayong tag-init

ni Justine Daguno - @Life and Style | May 03, 2021

Init na init ka na ba ngayong summer? True naman na ang init, naligo man o hindi ay parang kulang pa rin, ‘kalokah! Pero worry no more dahil hindi naman kailangang magtiis, ‘wag magtiis dahil narito ang ilan sa mga puwedeng gawin para maging feeling fresh in an instant tayo, mga besh!

1. MAGLAKAD-LAKAD. Kung iisipin, ‘exercise’ ang paglalakad at truly na nakakapagpapawis. Pero hindi lang naman ito pampa-‘sweat’, kundi oks din na pang-refresh, hindi man ng katawan kundi ng isipan. Yes, nakatutulong ang paglalakad nang sa gayun ay nakadadaloy nang maayos ang dugo sa utak, dahilan kaya nakapag-function ito nang maayos.

2. UMINOM NANG MARAMING TUBIG. Kumbaga, basic na lang ‘to pero sobrang laki ng epektong maidudulot sa atin. Ang pag-inom ng sapat na dami ng tubig ay nakatutulong para maging hydrated ang katawan na siya namang paraan upang bumaba ang temperatura nito o nare-refresh pa rin sa kabila ng napakainit na panahon.

3. GUMAMIT NG LEMON ESSENTIAL OIL. Oks at refreshing din ang paggamit ng lemon essential oil dahil ang paglanghap nito ay nakapagpapakalma. Bumababa ang temperatura ng katawan kapag relaxed o hindi ito stressed. Kapag galing sa initan o mainit na talakayan, oks na gumamit ng lemon essential oil, pero puwede ring subukan ang eucalyptus at rosemary oil na halos may kaparehong magandang benepisyo.

4. KUMAIN NG MASUSTANSIYA. Ang pagkain ng masustansiya ay malaking bagay din para manatiling fresh ngayong napakainit talaga ng panahon. Pero dapat maging maingat sa mga pagkaing kinokonsumo. Ugaliing kumain ng mga gulay, prutas, nuts at iba pang masustansiyang pagkain.

5. MAGKAROON NG SAPAT NA TULOG. Isa ang pagkakaroon ng sapat na tulog upang maging presko ang tao. Sikaping magkaroon ng sapat na tulog nang sa gayun ay kondisyon ang katawan at isipan upang hindi gaanong maramdaman ang mainit na panahon.

Tuwing summer, sanay tayong mag-outing at magpaka-presko sa dagat o swimming pool pero dahil pandemic, wala munang ibang bakasyon at mananahimik muna ang lahat sa bahay. Well, ito ang dahilan kaya nga may mga simpleng paraan para manatiling fresh, hindi lang ang ‘body’, kundi pati ang ‘mind’, ‘di ba? Ganern!

5 benefits ng apple cider vinegar bilang pampabyuti, alamin!

ni Justine Daguno - @Life and Style | April 26, 2021

Marami sa atin ang skin care is life dahil ‘ika nga, stressed man sa buhay at gipit sa pera, dapat maganda pa rin para maka-awra. Kaya naman, nagsulputan ang iba’t ibang beauty hacks sa internet dahil hindi lahat ay afford ang mga branded na skin care products. Kabilang sa mga sikat na produkto na mura pero epektib na pampabyuti ay ang apple cider vinegar.

Anu-ano nga ba ang mga beauty benefits nito?

1. PANTANGGAL NG ACNE AT PIMPLES. Oks na pantanggal ang apple cider vinegar sa pabalik-balik na acnes at pimples sapagkat ito ay may antibacterial at antifungal substance. Nakatutulong ito para maalis ang bacteria, oils at iba pang dumi sa pores. Para gamitin ay ihalo lamang ito at ang filtered water sa bowl. Gamit ang cotton ay i-apply ito sa apektadong bahagi ng mukha. Ibabad ng 10 minuto bago banlawan ng maligamgam na tubig.

2. PANTANGGAL NG SUNBURN. Ginagamit din ang apple cider vinegar sa sunburns. Ngayong summer, kahit walang getaway ay hindi maiiwasang magkaroon ng sunburn, lalo na kung exposed tayo sa init ng araw nang walang anumang ginagamit na proteksiyon tulad ng sunscreen o lotion. Gamit ang apple cider vinegar ay maaaring mawala ang hapdi na dulot ng sunburn. Ihalo lamang ang kalahating tasa nito sa apat na tasa ng tubig. Ibabad ang malinis na tela sa solution saka ito ipahid sa apektadong balat.

3. PANG-EXFOLIATE. Kung wala masyadong budget para magpa-body scrub, oks ang apple cider vinegar dahil ito ay nagtataglay ng alpha hydroxyl acid na nakaaalis ng dead skin cells at nag-iiwan ng mas maganda at malambot na skin. Maglagay ng isang tasa nito sa bathtub na may maligamgam na tubig. Magbabad dito nang 15 minuto hanggang 20 minuto at hayaang ma-absorb ng balat ang solution saka magbanlaw.

4. PANG-TONER. Dahil may astringent properties ang apple cider vinegar, puwede rin itong gamitin bilang toner na good sa mga may oily skin. Muli, ihalo lamang ang katamtamang dami nito sa maligamgam na tubig, at maglagay ng kaunting essential oil. I-apply ito sa balat gamit ang cotton ball saka ibabad ng ilang minuto bago banlawan. Maaari itong gawin ng isa o dalawang beses, depende sa kaso o sitwasyon ng balat.

5. PANGREMEDYO SA DARK SPOTS AT WRINKLES. Ang apple cider vinegar ay nagtataglay ng alpha hydroxyl acids na nakatutulong para maalis ang dead skin at muling bumalik ang healthy at glowing skin. I-apply lamang ang solution ng apple cider vinegar at tubig gamit ang cotton direkta sa mga dark spots at wrinkles. Ibabad lamang ito sa loob ng 30 minuto saka banlawan gamit ang malamig na tubig. Gawin lamang ang routine dalawang beses sa loob ng anim na linggo para mas makita ang magandang epekto nito.

Totoong hindi madaling magkaroon ng magandang balat, kailangan ng effort para ito ay ma-achieve, kaya sa mga beshy natin d’yan na walang budget para magpa-derma ay pagtiyagaan na lang muna ang mga beauty hacks gamit ang apple cider vinegar. Okie?